މާލޭ ދަފުތަރުގައި ޖެހުން މެދުކަނޑައިލަން ނިންމައިފި
މާލޭގެ ދަފްތަރުގައި ޖެހިފައި ތިބި ރައްޔިތުންނަށް ގެދޮރުގެ މައްސަލަ ހައްލުކުރާނޭ ގޮތުގެ މަގު ޗާޓެއް ސަރުކާރާ މަޝްވަރާކޮށް ،ކަނޑައެޅެންދެން އަދި ދަފްތަރުގައި ޖެއްސުމުގައި ގެންގުޅޭ އުޞޫލުތައް ހަރުދަނާ ކުރެވެންދެން މާލޭ ދަފްތަރުގައި ޖެއްސުން މެދުކަނޑައިލަން މާލޭ ސިޓީ ކައުންސިލުން ނިންމައިފިއެވެ.
މާލޭ ސިޓީ ކައުންސިލުން ދެންމެ ބޭއްވި ނޫސްވެރިންގެ ބައްދަލުވުމެއްގައި މާލޭ ސިޓީގެ މޭޔަރު ކަމަށް އަލަށް އިންތިޚާބުވެ ވަޑައިގެންނެވި މޭޔަރު ޑރ.މުޙައްމަދު މުޢިއްޒު ވިދާޅުވީ މިހާރުވެސް 17 ހާހެއްގައި ރައްޔިތުން ދަފްތަރުގައި ޖެހިފައި އެބަތިބި ކަމަށާއި އެ ރައްޔިތުންގެ ތެރެއިން ބޯހިޔާވަހިކަން ލިބިފައި ތިބީ ކިތައް ބޭފުޅުންނަށްތޯއާއި ދެން ތިބި މީހުންނަށް ބޯހިޔާވަހިކަން ލިބޭނީ ކިހިނެއްތޯ ކަނޑައަޅަން ބޭނުންފުޅުވާނެ ކަމަށާއި ދަފްތަރުގައި ޖެހުމަށް ގެންގުޅޭ އުޞޫލަކީ އެންމެ ރަނގަޅު އުޞޫލުތޯ ޔަގީން ކުރައްވަން ބޭނުންފުޅުވާ ކަމަށެވެ. އެހެންކަމުން މި މަގުސަދުތައް ހާޞިލް ކުރުމަށް ސިޓީ ކައުންސިލުން ނިންމެވީ މިވަގުތަށް ދަފްތަރުގައި ޖެއްސުން މެދުކަނޑައިލުމަށް ކަމަށް މޭޔަރު ވިދާޅުވިއެވެ.
މުޢިއްޒު ވިދާޅުވީ، މިހާރު ދަފްތަަރުގައި ޖެއްސެނީ ނަމެއްގައި ކަމަށާއި މިކަން ހަރުދަނާކޮށް، ޤާނޫންތަކަށް ގެންނަން ޖެހޭ ބަދަލުތަކާއި އުސޫލުތަކަށް ގެންނަން ޖެހޭ ބަދަލުތައް ގެނެވެންދެން ދަފްތަރުގައި ޖެހުން މެދު ކަނޑާލަން ނިންމާފައިވާ ކަމަށެވެ.
"މަރުހަލާ ތަކަކުން ގޮސް، އެކަން ހައްލު ކުރާނެ ގޮތުގެ މަގު ޗާޓެއް، ކަނޑައަޅަން ބޭނުން. ދަފްތަރުގައި ޖެހިފައިތިބި ރައްޔިތުންނަށް އެކަން ހައްލު ކުރާނެ ގޮތެއް ކަނޑަ އަޅާފަ، އަދި އިތުރަށް ދަފްތަރުގައި ޖެހޭ އުސޫލު އެއީ ރަނގަޅު އުސޫލެއްތޯ ބަލާ، އެ މަޤްސަދު ހާސިލްކޮށްދިނުމުގައި އެންމެ ރަނގަޅު އުސޫލެއްތޯ ޔަޤީންކޮށް. ޤާނޫނަށް ގެންނަން ޖެހޭ ބަދަލުތައް ގެެނެވޭދެކަށް އިތުރަށް ދަފްތަރުގައި ނުޖައްސާގޮތަށް މި ނިންމީ" މުޢިއްޒު ވިދާޅުވިއެވެ.
