ގުޅިފަޅަކީ ބޯހިޔާވަހިކަމަށް ޚާއްޞަރަށަކަށް ހެދުމަށް މަސައްކަތް ކުރުމަށް ނިންމައިފި
ގުޅިފަޅަކީ ބޯހިޔާވަހިކަމަށް ޚާއްޞަ ރަށަކަށް ހެދުމަށް މާލޭ ސިޓީ ކައުންސިލުން މަސައްކަތް ކުރުމަށް އެ ކައުންސިލުން ނިންމަވައިފިއެވެ.
މިރޭ ބޭއްވި ނޫސްވެރީންގެ ބައްދަލުވުމެއްގައި މާލޭގެ އައު މޭޔަރު ޑރ.މުޙައްމަދު މުޢިއްޒު ވިދާޅުވީ މާލޭގެ ރައްޔިތުން އެދޭ ގޮތަކީ އެ ރަށުގައި ޕޯޓް އެޅުމުގެ ބަދަލުގައި އެ ރަށަކީ ބޯހިޔާވަހިކަމަށް ޚާއްޞަ ރަށަކަށް ހެދުން ކަމަށެވެ. އެހެންކަމުން އެކި ފިޔަވަހިތަކަކަށް ބަހައިލައިގެން އެ މަސައްކަތް ކުރުމަށް ކައުންސިލްގެ އިއްތިފާގުން ނިންމަވައިފައިވާ ކަމަށެވެ.
"އެންމެ ފުރަތަމަ ކަމަކަށް ރައީސުލްޖުމްހޫރިއްޔާގެ އެޕޮއިންޓްމަންޓެއް ލިބުނުހާ އަވަހަކަށް ހުށަހަޅާނަން ރައްޔިތުންގެ އެދުން، އެމަނިކުފާނުގެ ޕްލޭން އަޅުގަނޑުމެން ހިއްސާކުރާނެކަން ޔަގީން ، ޕްލޭނިން މިނިސްޓްރީއާ އަޅުގަނޑުމެން ބައްދަލުކުރާނަން، އަދި ރައްޔިތުންގެ އެދުން އަޅުގަނޑުމެން ހުށަހަޅާނަން" މުޢިއްޒު ވިދާޅުވިއެވެ.
މުޢިއްޒު ވިދާޅުވީ، ތަރައްޤީގެ ޕްލޭނަކީ ރައްޔިތުންނާ ހަމައިން އުފެދިގެން އަންނަ އެއްޗެއް ކަމަށާއި ރައްޔިތުން ބޭނުންވާ ގޮތަށް ނޫން ގޮތަކަށް އޮންނަ ޕްލޭނެއް ވެއްޖިއްޔާ ޕްލޭން ބަދަލުވާން ޖެހޭ ކަމަށެވެ. އަދި ރައްޔިތުން އެދެނީ ގުޅީފަޅަކީ ގެދޮރުގެ މަންޒިލަކަށް ވާން ކަމަށާއި ރައްޔިތުން ހޮވާ ކައުންސިލަކުން މިއަދު މިކުރަނީ ރައްޔިތުންގެ އަޑު އިއްވުމުގެ މަސައްކަތް ކަމަށް މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ، މިމައްސަލައިގައި ސަރުކާރުން އަޑުއަހާނެ ކަމަށް ޤަބޫލުފުޅު ކުރައްވާ ކަމަށާއި ސަރުކާރަކީ ރައްޔިތުންގެ ކިބައިން ފެށޭ ބަޔަކަށް ވީހިނދު ރައްޔިތުންގެ މަސްލަހަތު ހިމެނޭ ކަމެއްގައި ކަން ކުރައްވާނީ ރައްޔިތުން ބޭނުންފުޅުވާ ގޮތަށް ކަމަށް ޤަބޫލުފުޅު ކުރައްވާ ކަމަށެވެ.
