ގަރާޖުތަކާއި ވޯކްޝޮޕްތައް އިންޑަސްޓްރިއަލް ވިލެޖަށް ބަދަލު ކުރުމަށް ނިންމައިފި
މާލެ ސިޓީގައި ހުރި ގަރާޖުތަކާއި ވޯކްޝޮޕްތަކާއި ގުދަންފަދަ ތަންތަން އިންޑަސްޓްރިއަލް ވިލެޖަށް ބަދަލު ކުރުމުގެ މަސައްކަތް ކުރުމަށް މާލޭ ސިޓީ ކައުންސިލުން ނިންމަވައިފިއެވެ.
މިރޭ ބޭއްވި ނޫސްވެރީންގެ ބައްދަލުވުމެއްގައި މޭޔަރު ޑރ.މުޙައްމަދު މުޢިއްޒު ވިދާޅުވީ މި ނިންމުން ނިންމައިފައި ވަނީ ކައުންސިލްގެ އިއްތިފާގުން ކަމަށާއި ހިތް ފަސޭހަ މާލެއަކަށް ޓަކައި މިއީ ކޮންމެހެން ކުރަން ޖެހޭ ކަމެއް ކަމަށެވެ.
"މާލެ ސިޓީގެ ޓްރެފިކްގެ މައްސަލަ އިންތިހާއަށް ބޮޑުވޭ ، އަދި ގޭގެ ކައިރީގައި އެކި ކަހަލަ އިންޑަސްޓްރިއަލް މަސައްކަތް ކުރުމުގެ ސަބަބުން ރައްޔިތުންނަށް ވަރަށް ބޮޑަށް އުނދަގޫވޭ ، މި ގަރާޖުތަކާއި މި ވޯކްޝޮޕްތަކާއި ގުދަންތަކަށް ތަކެތި ބޭލުމަށް މަޑުކޮށްލާ ކޮންމެ ފަހަރަކު ޓްރެފިކް ޖޭމްވޭ ، އެހެންވެ މިހުރިހާ ކަމަކަށް ބަލާއިރުގައި މިކަންކަން ހައްލުވާން އަންނަނީ މިކަންކަމަށް ޚާއްޞަކޮށް ހިއްކިފައި އޮތް އިންޑަސްޓްރިއަލް ވިލެޖަށް މިތަންތަން ބަދަލުކުރުމުގެ މަސައްކަތް ކުރެވިގެން" މުޢިއްޒު ވިދާޅުވިއެވެ.
މުޢިއްޒު ވިދާޅުވީ، ގަރާޖްތަކާއި، ގުދަންތައް އިންޑަސްޓްރިއަލް ވިލެޖަށް ބަދަލު ކުރުމުގެ މަސައްކަތް ކުރުމަށް ކައުންސިލުން ނިންމާފައިވާ ކަމަށާއި މާލެ ހިތް ފަސޭހަ ތަނަކަށް ހެދެން އޮތީ، މީހުން ދިރިއުޅޭ ސަރަހައްދުތަކުގައި ހުންނަން ނުޖެހޭ ތަންތަން، އެސަރަހައްދުތަކުން އެހެން ތަނަަކަށް ބަދަލު ކުރެވިގެން ކަމަށެވެ. އަދި މި ކަމަށް އޮތް ހައްލަކީ މާލޭ އިންޑަސްޓްރިއަލް ވިލެޖް ކަމަށް މުޢިއްޒު ތަކުރާރު ކުރެއްވިއެވެ.
"ފުރަތަމަ ކަމަކަށް މާލޭ ސިޓީގައި ހުރި، ގުދަންތަކާއި ގަރާޖްތަކާއި ވޯކްޝޮޕްތަކުގެ ތަފްސީލް ސާވޭއެއް ހަދާނަން. މިހާރުގެ ހާލަތު ދެނެގަންނަން. ދެން އިންޑަސްޓްރިއަލް ވިލެޖްގެ ޕްލޭން ހަދާ، ކަމާބެހޭ ވުޒާރާއާ މަޝްވަރާކޮށްގެން އެތަން ތަރައްޤީ ކުރާނެ ބަޔަކު ހޯދާ، އެތަން ހަދަން ނިންމާފައި މިވަނީ" މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ، އިންޑަސްޓްރިއަލް ވިލެޖްގައި ތަރައްޤީ ކުރެވިގެންދާ ވެއަރހައުސްތަކުން، އަލަށް ގަރާޖް ހިންގުމާއި ވޯކްޝޮޕް ހިންގުން ފަދަ ކަންކަމަށް ޝައުގުވެރިވާ ފަރާތްތަކަށް ވެސް ފުުރުސަތު ދިނުމަށް ނިންމައިފައިވާ ކަމަށެވެ. އަދި މާލޭ ކައުންސިލުން ބޭނުން ވަނީ، އިންޑަސްޓްރިއަލް ވިލެޖްގެ ހަޤީޤީ ބޭނުން ހިފޭނެ ގޮތަކަށް ތަރައްޤީ ކުރުން ކަމަށް ވެސް މުޢިއްޒު ވިދާޅުވިއެވެ.
