ޕާކިން ފީ 3000 ރުފިޔާއިން 750 ރުފިޔާއަށް ކުޑަކޮށްފި
މާލޭގައި ހުރި ޕާކިން ސްލޮޓްތަކުގެ ކުލި 3000 ރުފިޔާއިން 750 ރުފިޔާއަށް ކުޑަ ކުރުމަށް ސިޓީ ކައުންސިލުން ނިންމަވައިފިއެވެ.
މިރޭ ބޭއްވި ނޫސްވެރީންގެ ބައްދަލުވުމެއްގައި މޭޔަރު ޑރ.މުޙައްމަދު މުޢިއްޒު ވިދާޅުވީ ރަނގަޅު ޕާކިން ސަރަހައްދުތަކެއް ޕާކިން ފީ ނަގަމުންދަނީ އެންމެ އިންސާފުވެރި އަގުތަކެއްގައި ކަމަށް ގަބޫލު ނުކުރައްވާ ކަމަށެވެ.
"ޒޯންތަކުގައި ޕާކް ކުރުމަށް އަދިއެއް ނެތް ހަމަޖައްސައި ދެވިފައެއް. ޖާގައެއް ދެވިފައި އޮވޭ. އެތަނުގައި އޮންނަ ވެހިކަލް ވާރޭ ވެހުނަސް ، އަވި ދިނަސް އޮންނާނީ އެ ގޮތަށް. މާބޮޑު ރައްކާތެރި ކަމެއް ނުލިބޭ" މުޢިއްޒު ވިދާޅުވިއެވެ.
މުޢިއްޒުގެ ވާހަކަފުޅުގައި އިތުރަށް ވިދާޅުވީ، މަގުތައް އޮންނަ ހާލަތުންނާއި، މަގުތައް ބަންދު ކުރުމުން އެންމެ ބޮޑަށް ގެއްލުންވާ އެއް ބަޔަކީ ޓެކްސީ ޑްރައިވަރުންނަށް ކަމަށާއި މިކަން މިހެން އޮއްވާ ޓެކްސީ ޑްރައިވަރުންގެ އަތުން ޕާކު ކުރަން 3000 ރުފިޔާ ދައްކަން ޖެހުމުން ބޮޑެތި ގެއްލުންތަކެއް ކުރިމަތިވާ ކަމަށެވެ. އަދި ޓެކްސީ ތަކަށް ދިމާވާ ގެއްލުންތަކުން ނުސީދާކޮށް ރައްޔިތުންނަށް އަސަރު ކުރަމުންދާ ކަން މުޢިއްޒު ފާހަގަ ކުރެއްވިއެވެ.
"މިހާރު ކަނޑައެޅޭ ޤަވާއިދުގެ ސަބަބުން، އެންމެ އާންމުދަނީ ކުޑަވެ އެންމެ ބޮޑަށް ގެއްލުންވާ ބަޔަކީ ޓެކްސީ ޑްރައިވަރުން. މިކަމުގައި ސީދާ ގޮތުން އަދި ނުސީދާ ގޮތުން އެންމެ ބޮޑު ގެއްލުމެއް ވަނީ މާލޭގެ ރައްޔިތުންނަށް."މުޢިއްޒު ވިދާޅުވިއެވެ.
ޕާކިން މައްސަލަ ހައްލު ކުރުމަށް ޕްލޭން ކުރެވިފައިވާ ގޮތަށް ޕާކިން ފްލޯތަކެއް ހިމެނޭ ގޮތަށް މިކްސްޑް ޔޫސް އިމާރާތްތައް އަޅާނެ ކަމަށް ވެސް މުޢިއްޒު ވިދާޅުވިއެވެ. ނަމަވެސް މިމަސައްކަތް ފެށޭނެ ތާރީޚެއް އަދި ވިދާޅުވާން ދަތި ކަމަށް ވެސް މުޢިއްޒު ވިދާޅުވިއެވެ.
