ލިސްޓްގައި ހިމެނޭ ސިޔާސީ ބޭފުޅުން ވަގުތުން މަޤާމުން ވަކި ނުކުރައްވާތީ މީކާއިލްގެ ފާޑު ކިޔުން ސަރުކާރަށް
ރައްޔިތުންގެ މަޖިލީހުގެ ޖޮއިންޓް ކޮމިޓީން އާއްމުކުރި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ)ގެ ޚިޔާތުގެ ލިސްޓްގައި ހިމެނޭ ސިޔާސީ މަޤާމުތަކުގައި ތިއްބެވި ފަރާތްތައް ތަހުގީގަށް ފަހު ވަކިކުރަން ސަރުކާރުން ނިންމާފައިވާތީ، އެކަމަށް ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ފާޑު ވިދާޅުވެއްޖެއެވެ.
އެމްއެމްޕީއާރުސީގެ ހިޔާނާތުގެ ފައިސާއިން މަންފާކޮށްފައިވާކަމަށް ތުހުމަތު ކުރެވޭ، އަދި ފައިސާ ލިބުނު މީހުންގެ ތެރެއިން ދައުލަތުގެ މަގާމުތަކުގައި ތިބި 119 ހިމެނޭހެން ޖުމްލަ 281 ނަމާއެކު މިދިޔަ ހަފްތާގައި މަޖިލީހުގެ ޖޮއިންޓް ކޮމިޓީން ވަނީ ޚިޔާނާތުގެ ލިސްޓް އާއްމުކޮށްފައެވެ. އެކޮމިޓީން ނެރުނު ރިޕޯޓްގައި ސިޔާސީ މަޤާމު ހައިސިއްޔަތު ބޭނުންކޮށްގެން މިހާރު ހިނގަމުންދާ ތަހުގީގަށް ނުފޫޒް ފޯރުވާނެކަމަށް ބެލެވޭތީ، ލިސްޓްގައި ނަން އޮތް ފަރާތްތައް ވަކި ކުރަން ވަނީ ލަފާ ދެއްވައިފައެވެ. ނަމަވެސް މަޤާމުތަކުގައި ތިއްބެވި ބޭފުޅުން ވަކި ކުރާނީ ތަޙްޤީޤް ކުރުމަށް ފަހުގައި ކަމަށް ރައީސް އޮފީހުން ވަނީ ވިދާޅުވެފައެވެ.
މިކަމާ ގުޅިގެން އެމްއެމްޕީއާރުސީގެ ހިޔާނާތުގެ މައްސަލައިގެ ޖޮއިންޓް ކޮމިޓީގެ ރިޕޯޓަށް ބަހުސް ކުރައްވަމުން މީކާއިލް ވިދާޅުވީ، ލިސްޓްގައި ނަން އޮތް ކޮންމެ މީހަކީ ކޮންމެވެސް ހިސާބަކުން ޚިޔާތުގެ މައްސަލައިގެ ތެރެއަށް ވަންނަ މީހެއް ކަމަށާއި އެއްވެސް އަސާސެއްނެތި ލިސްޓްގައި ނަން ޖަހާފައި ނޯންނާނެ ކަމަށް އެސެޓް ރިކަވަރީ ކޮމިޝަނުން ވެސް ވިދާޅުވި ކަމަށެވެ.
"މިލިސްޓްގައި ހަމަ ނަމެއް ޖަހައިލައިފައެއް ނޫން މިއޮތީއެއް. މި ލިސްޓްގައި ކޮންމެވެސް އަސާސެއްގެ މައްޗަށް މެނުވީ ނަމެއް ހިމަނާފައި ނުވާނެ ކަމަށް އެސެޓް ރިކަވަރީ ކޮމިޝަނުން ވެސް އެބަ ބުނޭ." މީކާއިލް ވިދާޅުވިއެވެ.
ސަރުކާރަށް ފާޑު ވިދާޅުވަމުން މީކާއިލް ވިދާޅުވީ، ލިސްޓްގައި ނަން އޮތް ފަރާތްތައް މަޤާމުން ދުރު ނުކުރަން ސަރުކާރުން ނިންމި ނިންމުމަކީ ވަރަށް ޒިންމާދާރުކަން ކުޑަ ނިންމުމެއް ކަމަށެވެ. އަދި ވަގުތުން ވަގުތަށް ހުރިހާ ފަރާތްތައް ސަސްޕެންޑް ކުރަން މީކާއިލް ވަނީ ގޮވައިލައްވައިފައެވެ.
މީކާއިލް އިތުރަށް ވިދާޅުވީ، މިލިސްޓް ފެނުމުން ތަހްޤީޤް ހިނގާފައިވާ ސްޕީޑް ފެނުމުން ލަދުގަތްކަމަށާއި ދެ އަހަރާ ބައި ވެގެންދާއިރު ރިޔާސީ ކޮމިޝަނެއް ހަދައި ދައުލަތުގެ ބަޖެޓުން އެމީހުންނަށް ޚަރަދުކޮށް މިއީ ނެރެވެން ޖެހޭ ނަތީޖާ ނޫން ކަމަށެވެ. މިގޮތުން ލިސްޓްގެ %60 އަކީ މައުލޫމާތު އެއްކުރުމުގެ ހަމައިގައި އޮތް ފަރާތްތައްކަން މީކާއިލް ފާހަގަ ކުރެއްވިއެވެ.
Ads by STO
