އީސައަށް ކުރާ ތުހުމަތު މަތިޖަހާ ފޮރުވާނެކަން ޔަގީން: ޖަމީލް
ރައްޔިތުން މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސަ ގެވެށި އަނިޔާ ކުރި މައްސަލައެއް ފުލުހަށް ހުށަހެޅި އެ މައްސަލަ ފުލުހުން ބަލަން ފެށި ނަމަވެސް މި މައްސަލަ މަތިޖަހައި ފޮރުވާނެ ކަމަށް ކުރީގެ ނާއިބު ރައީސް އަދި އިދިކޮޅު ކޯލިޝަންގެ އެޑްވައިޒަރު ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
އީސައާ ބެހޭ ގޮތުން މިފަދަ މައްސަލައެއް ފުލުހަށް ހުށަހެޅިފައިވޭތޯ ފުލުހަށް ކުރި ސުވާލަށް ފުލުހުން ޖަވާބު ދީފައެއް ނުވެއެވެ. އަދި މިފަދަ އެއްވެސް މައްސަލައެއް ފުލުހަށް ލިބިފައިވާ ކަމަށް ޚުދު އީސާއަށް ވެސް އެނގިވަޑައިނުގަންނަވާ ކަމަށް ބުނެ އެކަމާ ބެހޭ ގޮތުން އެއްވެސް ބަހެއް ވިދާޅުވެފައެއް ނުވެއެވެ.
މައުލޫމާތު ލިބިފައިވާ ގޮތުގައި އީސަ ދިރިއުޅޭ އެޕާޓްމެންޓުގެ އަވައްޓެރިއަކު ވަނީ އީސަ ދިރިއުޅޭ އެޕާޓްމެންޓު ތެރެއިން އަނިޔާ ކުރާ އަޑު އިވޭ ކަމަށް ބުނެފައެވެ. އަދި ފުލުހުން ހަރަކާތްތެރިވި ދުވަހު އޭނާ އަނބިމީހާއަށް އަނިޔާ ކުރީ ދަރިފުޅު ކުރިމަތީގައި ކަމަށް ވެސް މައުލޫމާތު ލިބެއެވެ.
މިކަމާ ގުޅިގެން ޖަމީލު ކުރެއްވި ޓުވީޓެއްގައި ވިދާޅުވެފައި ވަނީ، ކިތަންމެ ވަރަކަށް މިފަދަ މައްސަލަތައް ހުށަހެޅި ކަމުގައި ވިޔަސް އެމްޑީޕީގެ މަޖިލިސް މެމްބަރުންނާއި ވަޒީރުންނަށް ގާނޫނު ހިންގަން ނުކުޅެދިފައިވާ ކަމަށާއި، ރައީސް އިބްރާހިމް މުޙައްމަދު ޞާލިހު ވެރިކަން ކުރައްވަނީ ހަމައެކަނި ޕާޓީއަށް ޓަކައި ކަމަށެވެ. އަދި ނަމެއްގައި ގާނޫނު ހިންގުން ހުއްޓައިލަން ޖެހޭ ކަމަށް ވެސް ޖަމީލު ކުރެއްވި ޓުވީޓްގައި ފާހަގަ ކުރައްވައިފައި ވެއެވެ.
އީސަ މިހާރު ކައިވެނި ބައްލަވައިގެން އުޅުއްވަނީ ނައިބު ރައީސް ފައިސަލް ނަސީމްގެ ކޮއްކޯފުޅު އަސްރާ ނަސީމާއެވެ.
