މަދިރި ގިނަވާތީ މާލެ ސިޓީ ކައުންސިލުން ފޮގް ކުރަން ފަށައިފި
މަދިރި ގިނަވާތީ މާލެ ސިޓީ ކައުންސިލުން ފޮގް ކުރުމާއި މަދިރި ނައްތާލުމުގެ މަސައްކަތް ފަށައިފިއެވެ.
މާލޭގެ މޭޔަރު ޑރ. މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ ވިއްސާރަ މޫސުމާއި އެކު މާލެ ސަރަހައްދުގައި މަދިރި އާލާވުން އިތުރުވުމާ ގުޅިގެން މިހާރު މާލެ އާއި ވިލިމާލެ ފޮގް ކުރަން ފަށައިފައިވާ ކަމަށެެވެ.
މީގެ އިތުރުން ކޮންސްޓްރަކްޝަން ސައިޓުތަކުގައި ފެން ހަރުލާގޮތަށް ހުންނަ ތަންތަން ބަލައި، މަދިރި ބޭސް އެޅުން މިއަދު ފެށިގެންދާނެ ކަމަށް ފާހަގަ ކުރައްވައި މިކަމުގައި ރައްޔިތުންގެ ފަރާތުން ދެއްވާ ފުރިހަމަ އެއްބާރުލެއްވުމަށް މުއިއްޒު ވަނީ ޝުކުރު އަދާކުރައްވައިފައެވެ.
މާލޭގެ މޭޔަރކަމާ މުއިއްޒު ހަވާލުވުމަށް ފަހު ގިނަ ކަންތައްތަކެއް މިހާރު ވެސް ވަނީ ކުރައްވައިފައެވެ. އެގޮތުން މާލޭގެ ބިންތަކާއި މާލެ ސިޓީގައި ގާއިމްކުރެވިފައިވާ މާރުކެޓް ގޮޅިތަކުގެ ކުލި ވެސް ވަނީ ކުޑަކޮށްދެއްވައިފައެވެ. މީގެ އިތުުރުން މާލެ ސިޓީގައި ދިރިއުޅޭ ރައްޔިތުންގެ ފެނާއި ކަރަންޓު ބިލަށް ލުޔެއް ދިނުމަށް ވެސް މުއިއްޒު ވަނީ ގޮވާލައްވާފައެވެ.
މުއިއްޒު މިފަދައިން ގޮވާލައްވައިފައި ވަނިކޮށް ، ރޭ ރައީސް ޞާލިޙް ވިދާޅުވީ އަންނަ މަހުން ފެށިގެން ރާއްޖޭގެ ހުރިހާ ގޭބިސީތަކެއްގެ ކަރަންޓް ބިލުން 40 ޕަސެންޓް، ފެން ބިލުން 30 ޕަސެންޓް، އަދި ވިޔަފާރިތަކުން 20 ޕަސެންޓް ކުޑަކޮށްދޭން ނިންމަވާފައިވާ ކަމަށެވެ.
