ކޮވިޑް-19އާ ގުޅިގެން ސިއްޙީ ދާއިރާއަށް 1،711 މިލިއަން ރުފިޔާ ޚަރަދުވެއްޖެ
ރާއްޖޭގެ ކޮވިޑް-19ގެ ހާލަތާ ގުޅިގެން މިހާތަނަށް ސިއްޙީ އަދި އިޖުތިމާޢީ ދާއިރާއަށް 1،711.2 މިލިއަން ރުފިޔާ ޚަރަދުވެފައިވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ ، ކޮވިޑް-19 އާ ގުޅިގެން ކޮށްފައިވާ ޚަރަދުތަކަށް ބަލާއިރު، މި މަހުގެ 20 ގެ ނިޔަލަށް ޖުމްލަ 3،429.4 މިލިއަން ރުފިޔާ ޚަރަދުވެފައިވާ ކަމަށެވެ.
އޭގެތެރެއިން 1،711.2 މިލިއަން ރުފިޔާ ސިއްޙީ އަދި އިޖުތިމާއީ ދާއިރާއަށް ޚަރަދު ކޮށްފައިވާއިރު، އެންމެ ބޮޑު ޚަރަދެއް އޭގެ ތެރެއިން ކޮަށްފައި ވަނީ މެޑިކަލް ކޮންސިއުމަބަލްސްއަށް ކަމަށް ވެސް މިނިސްޓަރ ވިދާޅުވިއެވެ.
"އޭގެއިތުރުން ފްރަންޓްލައިން އެލަވަންސް އަދި އެހެނިހެން މުވައްޒަފުންގެ ޚަރަދު ވެސް އެބަ ހިމެނޭ. އެކަމަށް 148.9 މިލިއަން ރުފިޔާ ޚަރަދުވެފައިވޭ" މިނިސްޓަރ އަމީރު ވިދާޅުވިއެވެ.
ފިނޭންސް މިނިސްޓަރ އިތުރަށް ވިދާޅުވީ މިހާތަނަށް ކޮށްފައިވާ ޚަރަދުތަކަށް ބަލާއިރު، އިކޮނިމިކް ރިލީފް ޕެކޭޖްތަކުގެ ޚަރަދަށް 1،718.1 މިލިއަން ރުފިޔާ ޚަރަދު ވެފައިވާ ކަމަށެވެ.
