ރައީސް ނަޝީދުގެ ތުހުމަތުތަކަށް ރައީސް ޞާލިހު ރައްދު ދެއްވައިފި
ވަކިވަކި ސިފައިން 241 ކޮމެޓީއަށް ހާޒިރުވުމަށް ހުރަސް އަޅުއްވަނީ ރައީސް ސޯލިހް ކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ކުރައްވާފައިވާ ތުހުމަތުތަކާ ގުޅިގެން ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ރައްދު ދެއްވައިފިއެވެ.
ރައީސް ވިދާޅުވީ، ވަކިވަކި ސިފައިން އިންކުއެރީއަށް ހާޒިރުވިޔަ ނުދޭން އަދި 241 ކޮމެޓީގެ އިންކުއަރީއަށް ހުރަސް ނާޅުއްވާނެކަން ޚުދު ރައީސް ނަޝީދަށް ވެސް އެގިވަޑައިގަންނަވާނެ ކަމަށެވެ.
ވަކިވަކި ސިފައިން ހާޒިރުކުރަން ކޮމިޓީން ނިންމައިފައި ވީ ނަމަވެސް ޑިފެންސް މިނިސްޓްރީން އެކަމަށް ދެކޮޅު ހަދައި ކޮމިޓީއަށް ޖަވާބުދާރީ ވާނީ މުއައްސަސާއިން ކަމަށް ބަޔާންކޮށް މަޖިލީހަށް ފޮނުވި ސިޓީގައި ސޮއިކުރައްވައިފައިވާ، ޑިފެންސްގެ ނައިބު ހަސަން ޒަމީލުގެ މައްޗަށް ދައުވާކޮށްދިނުމަށް ރައީސް ނަޝީދު ޕީޖީގައި އެދިފައިވަޑައިގެންފައި ވެއެވެ.
އެއަށްފަހު އެ މައްސަލަ ބަލައިދިނުމަށް އެދި މަޖިލީހުގެ އިޖްތިމާއީ ކޮމެޓީއަށް ވެސް ހުށަހަޅައިފައި ވީ ނަމަވެސް އެކަން ބަލަން އެންމެ ރަނގަޅު ކޮމެޓީއަކީ 241 ކޮމިޓީކަމަށް ނިންމައި، އެމްޑީޕީގެ މެމްބަރުން ވެސް ހިމެނޭ ގޮތަށް އެ މައްސަލަ ވަނީ ކޮމިޓީން ބޭރުކޮށްލައިފައެވެ.
މިކަމާ ގުޅިގެން ހަސަން ލަތީފު މެދުވެރިކޮށް ރައީސް ނަޝީދު އެމްޑީޕީގެ ގައުމީ މަޖިލީހަށް ވަނީ މެސެޖެއް ވެސް ފޮނުވައިފައެވެ. އެ މެސެޖުގައި ރައީސް ސޯލިހް ލޮބީ ކުރައްވައިގެން އެމްއެންޑީއެފްގެ ވަކިވަކި ސިފައިން 241 ކޮމެޓީއަށް ހާޒިރުވިޔަ ނުދޭން މަސައްކަތް ކުރައްވާ ސަބަބަބެއް އެއްގޮތަކަށް ވެސް ނުވިސްނޭ ކަމަށް ވިދާޅުވެފައި ވެއެވެ. އަދި ރައީސް ޞާލިޙް ސިއްރު ކުރައްވަން އުޅުއްވަނީ ކޮން އެއްޗެއްތޯ ވެސް ވަނީ ސުވާލު ކުރައްވައިފައެވެ.
