އަލީ ވަހީދުގެ ޕާސްޕޯޓް ހިފެހެއްޓި މައްސަލައަށް ކުރިއެރުމެއް ނުލިބޭނެ: ވަކީލު ޝާހު
ޓޫރިޒަމް މިނިސްޓްރީގެ ގިނަ އަންހެން މުއައްޒަފުންތަކަކަށް ޖިންސީ ގޯނާ ކުރުމުގެ ތުހުމަތުގައި ދައުވާ އުފުލާފައިވާ ކުރީގެ ޓޫރިޒަމް މިނިސްޓަރ އަލީ ވަހީދު ޕާސްޕޯޓް ހިފެހެއްޓުމަށް ކްރިމިނަލް ކޯޓުން އަލުން އަމުރު ނެރުނު ނަމަވެސް މައްސަލައަށް އިތުރު ކުރިއެރުމެއް ނުލިބޭނެ ކަމަށް ގާނޫނީ ވަކީލު އަލީ ޝާހު ވިދާޅުވެއްޖެއެވެ.
ގާނޫނީ ވަކީލު އަލީ ޝާހު މިހެން ވިދާޅުވީ ސީއެންއެމްގެ ތަފްސީލް ޕްރޮގްރާމްއަށް ފޯނުން ދެއްވި އިންޓަރވިއުއެއްގައެވެ.
އަލީ ވަހީދުގެ ޕާސްޕޯޓް ހިފެހެއްޓުމުގެ އަމުރަކަށް އެދުމަށް ފުލުހުންގެ ކިބައިން ޕްރޮސެކިއުޓާ ޖެނެރަލް އަނެއްކާ ވެސް އެދިފައިވާއިރު އަލީ ވަހީދު މިހާރު ވެސް ހުންނެވީ ރާއްޖެއިން ބޭރުގައެވެ.
މިކަމާ ބެހޭ ގޮތުން ވާހަކަދައްކަވަމުން ވަކީލު ޝާހު ވިދާޅުވީ ޕާސްޕޯޓު ހިފެެހެއްޓުމުގެ އަމުރު އާންމުކޮށް ނެރެނީ އަދުލުވެރި ޝަރީއަތަކަށް ހުރަސް އެޅޭނެ ފަދަ ކަންކަން ހުއްޓުވުމަށާއި ދައުވާ ލިބޭ ފަރާތް ފިލައިގެން ދިއުން ހުއްޓުވުމުގެ ގޮތުންކަމަށް ވުމުން އަލީވަހީދުގެ މައްސަލައިގައި ޕާސްޕޯޓް ހިފަހައްޓައިގެން ލިބޭނެ ކުރިއެރުމެއް ނޯންނާނެ ކަމަށެވެ. ރާއްޖޭން ބޭރުގައި ހުއްޓާ ޕާސްޕޯޓު ހިފަހައްޓަން އަމުރު ނެރުމަކީ އާންމު އުސޫލެއްގެ ގޮތުން ކުރާ ކަމެއް ވެސް ނޫންކަން ޝާހު ފާހަގަ ކުރެއްވިއެވެ.
އަލީ ވަހީދުގެ ޝަރީއަތް ކުރިއަށްދާ ގޮތާ މެދު ހިތްހަމަ ނުޖެހި، ޕީޖީ އޮފީހުން އެ މައްސަލަ ވަނީ ހައިކޯޓަށް ހުށައަޅާފައެވެ. ޕީޖީ އޮފީހުން އެ މައްސަލަ ހައި ކޯޓަށް ހުށަހަޅައިފައި ވަނީ އޮންލައިންކޮށް، ދިވެހިރާއްޖޭގެ އިހްތިސާސް ނުހިނގާތަނެއްގައި ހުންނަވާ ކުރީގެ އަލީ ވަހީދުގެ ޝަރީއަތް ކުރިއަށް ގެންދިއުމަށް ކްރިމިނަލް ކޯޓުން ނިިންމުމުން، އެ ޝަރީޢަތަކީ ހިންގޭނެ ޝަރީޢަތެއް ނޫންކަމަށް ކަނޑައަޅައިދިނުމަށް އެދިއެވެ.
