ރާއްޖޭގެ އެއްވެސް ރައްޔިތަކަށް ރައްކާތެރިކަމެއް ނެތްކަން ދޭހަވޭ: އިންތި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ހަމާޒުކޮށް ހަމަލާއެއް ދެވުމުން، ރާއްޖޭގެ އެހެން އެއްވެސް ރައްޔިތަކަށް ރައްކާތެރިކަމެއް ނެތްކަން ހާމަވެގެންދާ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) ވިދާޅުވެއްޖެއެވެ.
ޓެރަރިޒަމް މަނާކުރުމުގެ ގާނޫނަށް އިސްލާހު ގެނައުމުގެ ބިލަށް މިއަދުގެ ރައްޔިތުންގެ މަޖިލީހުގައި ބަހުސްކުރައްވަމުން އިންތި ވިދާޅުވީ، މެއި މަހުގެ ހަވަނަ ދުވަހު ރައީސް ނަޝީދަށް އަމާޒުކޮށް އެމަނިކުފާނު ދިރިއުޅުއްވާ ގެކޮޅު ކައިރިން ދިން ނިރުބަވެރި ހަމަލާއަކީ ރާއްޖޭގެ ކޮންމެ ފަރާތަކަށްދިން ހަމަލާއެއް ކަށެވެ.
"އެމަނިކުފާނަށް ދިން ހަމަލާއަކީ ރާއްޖޭގެ ހަމަ ކޮންމެ ފަރާތަކަށްވެސް ދިން ހަމަލާއެއްގެ ގޮތުގައި ބަލަން ޖެހޭނީ. އެމަނިކުފާނަށް އެވަރުގެ ހަމަލާއެއް ދިނީމާ އެއްވެސް އެހެން ރައްޔިތަކަށް ރައްކާތެރިކަމެއް ނެތޭ. ޓެރެރިސްޓުންގެ ކިބައިން ރައްކާތެރި ކަމެއް ނެތޭ" އިންތި ވިދާޅުވިއެވެ.
އިންތިގެ ވާހަކަފުޅުގައި އިތުރަށް ވިދާޅުވީ، ފުލުހުންގެ ތަފާސް ހިސާބަށް ބަލާއިރު، މިހާރުވެސް ރާއްޖޭގައި ޖެހިގެން ހުންނަ މީހާ މަރައިލަން ފަސް ނުޖެހޭ 1،400 މީހުން ބްރެއިން ވޮޝްކޮށްފައި އެބަތިބި ކަމަށެވެ. އަދި މިފަދަ ހައްދު ފަހަނަ އަޅައި ގޮސްފައި ތިބި މީހުން ތިބީ ހައްޔަރުކޮށްފައި ނޫން ކަަމަށާއި މިއީ ރާއްޖޭގެ ރައްޔިތުންގެ ސަލާމަތާ ރައްކާތެރި ކަމަށް އޮތް ހުރަހެއް ކަމަށެވެ.
ރައީސް ނަޝީދަށް ދިން ހަމަލާއާ ގުޅުވައިގެން ބައެއް ފަރާތްތަކުން އެމަނިކުފާނު ވިކްޓިމައިޒްކޮށް ވާހަކަ ދައްކަވާ ކަމަށް ތުހުމަތު ކުރައްވާ މިއަދުގެ ޖަލްސާގައި އިންތި ވިދާޅުވީ، ރައީސް ނަޝީދު ދައްކަވާ ވާހަކަތަކުގެ މާނަ އޮޅުވައިލައިގެން މީޑީއާތަކާއި މަޖިލީހުގެ ބައެއް ބޭފުޅުން ވާހަކަ ދައްކަވާތީ އެކަމާ ހިތާމަ ކުރައްވާ ކަމަށެވެ. އަދި ރައީސް ނަޝީދު މީހުން ނުޙައްޤުން ހައްޔަރު ކުރަން ނުގޮވާނެ ކަމަށް ވިދާޅުވެ، އިންތި ވިދާޅުވީ، ރައީސް ނަޝީދަކީ ނުޙައްޤުން އެތައް އަނިޔާއެއް ލިބިފައިވާ ބޭފުޅެއް ކަމަށާއި އެހެން ފަރާތްތަކަށް އެފަދަ އަނިޔާއެއް ލިބުމަށް އެމަނިކުފާނު ނޭދޭނެ ކަމަށެވެ. އަދި ރައީސް ނަޝީދު ގޮވައިލައްވަނީ ހައްދު ފަހަނަ އަޅާފައިވާ ފަރާތްތައް ހައްޔަރު ކުރުމަަށް ކަމަށާއި އެމަނިކުފާނުގެ ފުރާނަފުޅަށް ނުރައްކާވާ ހަމަލާއެއް އަމާޒުވި އެއް ސަބަބަކީ އެގޮތަށް ވާހަކަފުޅު ދެއްކެވުން ކަމަށް ވެސް އިންތި ފާހަގަ ކުރެއްވިއެވެ.
"ރާއްޖޭގައި ހައްދު ފަހަނަ އަޅައި ދިއުމާ ދެކޮޅަށް އެންމެ ވަރުގަދަ އަޑެއްގެ ގޮތުގައި ހުންނެވީ ރައީސް މުޙައްމަދު ނަޝީދު. އެމަނިކުފާނު އަވަހާރަކޮށްލަން ހަމަލާ ދިނީ ވެސް އެ ސަބަބާ ހުރެ." އިންތި ވިދާޅުވިއެވެ.
އިންތި އިތުރަށް ވިދާޅުވީ، މީގެ ކުރީ ސަރުކާރުތަކުން ނޫސްވެރިންނާއި ސިޔާސީ މީހުން ޓެރެރިޒަމްގެ ލޭބަލް އަޅުވާ ހައްޔަރު ކުރި ނަމަވެސް މި ސަރުކާރުން މަސައްކަތް ކުރާނީ ޓެރެރިސްޓް ހަމަލާތައް ދޭ، އެކަން ރާވާ، އެކަމަށް ހިތްވަރުދޭ ފަރާތްތައް ހައްޔަރު ކުރުމަށް ކަމަށެވެ. އަދި މީހަކު ޚިޔާލު ފާޅު ކުރާ ގޮތަކުން، ނޫނީ ލިޔާ ލިޔުމަކާ ޚިޔާލު ތަފާތު ވެގެން އެއީ ޓެރެރިސްޓެއްކަމަށް ނުވާނެ ކަމަށް ވެސް އިންތި ވިދާޅުވިއެވެ.
ނަޝީދު އަކީ ޔޫކޭ/އިންޑިޔާ/ޑެންމާކު ސޮރެއް.
އެގޮތް އިންތިއަށް އެގިވަޑައިގަތީ ރައީސް ނަޟީދުދުވާލީމައި