ހަމަލާގައި ސަރުކާރުން ބައިވެރިވިކަމަކަށް ޤަބޫލެއް ނުކުރާނަން: ރައީސް ނަޝީދު
މެއި މަހުގެ ހަ ވަނަ ދުވަހުގެ ރޭ، ކުރީގެ ރައީސް މުޙައްމަދު ނަޝީދުއަށް އަމާޒުކޮށް ދިން ހަމަލާއަކީ، ސަރުކާރުން ބައިވެރި ވެގެން ދިން ހަމަލާއެއް ކަމަށް ކުޑަކޮށް ވެސް ޤަބޫލު ނުކުރައްވާ ކަމަށް ރައީސް ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މަޖިލިހުގެ ރައީސް ނަޝީދާ ބޭނުން ސުވާލެއް ކުރުމުގެ ފުރުސަތު ހުޅުވައިލައިގެން މިރޭ ކްލަބްހައުސްގައި ކުރިއަށްދާ "އާސްކް ސްޕީކަރ" ގެ ތިންވަނަ ޕްރޮގްރާމްގައި، މީހަކު ކުރި ސުވާލަކަށް ޖަވާބު ދެއްވަމުންނެވެ.
އެމަނިކުފާނަށް ދިން ހަމަލާގައި ސަރުކާރުގެ ބައިވެރިވުމެއްވާ ކަމަށް ޤަބޫލުފުޅު ކުރައްވަންތޯ ސުވާލު ކުރުމުން ރައީސް ނަޝީދު ވިދާޅުވީ އެއީ ސަރުކާރުގެ ބައިވެރި ވުމެއް އޮވެގެން ދިން ހަމަލާއެއް ކަމަކަށް ކުޑަކޮށް ވެސް ޤަބޫލެއް ނުކުރައްވާނެ ކަމަށެވެ.
"ހުރިހާ ރައްޔިތުންނަށް ވެސް އެނގިވަޑައިގަންނަވާނެ، ރައީސް ކަމަށް އެ ހުންނެވީ އަޅުގަނޑުގެ ޕާޓީގެ ބޭފުޅެއް، މަޖިލީހުގެ އަގުލަބިއްޔަތު މިއޮތީ އަޅުގަނޑުގެ ޕާޓީގެ. އެހެންވީމަ ސަރުކާރުން ބައިވެރިވެގެން ދިން ހަމަލާއެއް ކަމަށް ދެކެން އަޅުގަނޑަށް ވަރަށް ބޮޑަށް އުނދަގޫ" ރައީސް ނަޝީދު ވިދާޅުވިއެވެ.
ސަރުކާރުގެ ބައިވެރިވުމެއް އެ ކަމުގައި އޮތްކަމަށް ދެކެން އުނދަގޫފުޅު ނަމަވެސް ރައީސް ނަޝީދު ވިދާޅުވީ ބޮން ގޮއްވައިލުމުގައި އަމަލީ ގޮތުން ބައިވެރިވީ އެންމެ ހަތަރު މީހެއް ކަމުގައި ނުވާނެ ކަމަށާއި އެކަން ރޭވީ ކޮން ފަރާތަކުން ކަމާއި އެކަމަށް ޚަރަދު ކުރުމުގައި ބައިވެރިވީ މީހުން ވެސް ހޯދެން ޖެހޭނެ ކަމަށެވެ.
ރައީސް ނަޝީދަށް ދިން ހަމަލާގެ ތަހުގީގަށް ފާރަވެރިވުމަށް އެމްޑީޕީން ވަނީ މެއިހައެއްގެ ނަމުގައި ކޮމިޓީއެއް އުފައްދައިފައެވެ. އެ ކޮމިޓީން ބުނެފައި ވަނީ އެ ހަމަލާ ރާވައި ހިންގުމަށް ތިން މިލިއަން ޑޮލަރު ހިނގައިފައިވާ ކަމަށެވެ.
Ads by STO
