ޕީޕީއެމްއިން ޓެރެރިސްޓުންނަށް ހިތްވަރުދޭ ކަމަށް އިލްޔާސް ތުހުމަތު ކުރައްވައިފި!
އިދިކޮޅު ކޯލިޝަންގެ މައި ޕާޓީ ޕްރޮގްރަސިވް ޕާޓީ އޮފް ދަ މޯލްޑިވްސް (ޕީޕީއެމް) ގެ ބޭފުޅުންނާ ޓެރެރިސްޓުންނާ އޮތީ ކޮން ގުޅުމެއްތޯ ބައްލަވަން ޖެހޭ ކަމަށާއި އެޕާޓީން ޓެރެރިސްޓުންނަށް ހިތްވަރުދޭ ކަމަށް ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވެއްޖެއެވެ.
ޓެރެރިޒަމް މަނާ ކުރުމުގެ ޤާނޫނަށް ބަހުސް ކުރައްވަމުން މިއަދު މަޖިލީހުގައި އިލްޔާސް ވިދާޅުވީ، އެމަނިކުފާނު ޕީޕީއެމް/ޕީއެންސީ ކޯލިޝަންއާ މެދު ކަންބޮޑުވާ އެއް ސަބަބަކީ އެބޭފުޅުންގެ ސަރުކާރުގައި ދީނީ ލޭބަލް އަޅައިގެން ތިބި ޓެރެރިސްޓުން ކުރައްވާ ކަންތަކާ އަޅައިނުލާ އޮތް އޮތުން ކަމަށެވެ.
"އަޅުގަނޑު ޕީޕީއެމް/ޕީއެންސީއަށް ކަންބޮޑު ވާން ޖެހޭ އެހެން ސަބަބެއް އެބަ އޮތް. މި ބޭފުޅުންގެ ވެރިކަމުގައި ދީނާ ޚިލާފު އެތައް ކަމެއް ކުރިއިރު މި ޓެރެރިސްޓުންގެ ގޮތުގައި ދީނީ ހެޓް އަޅައިގެން ތިބޭ ބޭފުޅުން، މިބޭފުޅުން ކުރައްވާ އެއްވެސް ކަމަކާ އަޅާ ނުލައްވާ. މި ބޭފުޅުންނާ އެ މީހުންނާ އޮތީ ކޮން ގުޅުމެއްތޯ ބަލާ ވިސްނަން ޖެހޭ."އިލްޔާސް ވިދާޅުވިއެވެ.
އިލްޔާސް ވިދާޅުވީ، ޤައުމު ސަލާމަތް ކުރެވޭނީ ޕީޕީއެމް ބޭފުޅުން ޓެރެރިސްޓުންނާ ދުރުވެގެން ކަމަށެވެ. "ޕީޕީއެމްއަ ށްވެސް ޕީއެންސީއަށް ވެސް އަޅުގަނޑު ގޮވާލަން އޮތީ މިއީ އަޅުގަނޑުމެން އެމްޑީޕީގެ އެކަނި ރާއްޖެއެއް ނޫނޭ. މިއީ ތިބޭފުޅުންގެ ރާއްޖެއޭ. މިޤައުމު ސަލާމަތް ކުރެވޭނީ ތިބޭފުޅުން ޓެރެރިސްޓުންނާ ދުރުވެގެންނޭ. އެ ބޭފުޅުންނަށް ހިތްވަރު ނުދީ، މިކަމައިގެން ކުރިޔަށް ދާން ޖެހޭ، ކުރިޔަށް ގޮސްގެންނޭ." އޭނާ ވިދާޅުވިއެވެ.
އިލްޔާސްގެ ވާހަކަފުޅު ކުރިޔަށް ގެންދަވަނިކޮށް، ނައިފަރު ދާއިރާގެ މެންބަރު އަހުމަދު ޝިޔާމް ވަނީ ނިޒާމީ މައްސަލައެއް ނަންގަވައި، ރާއްޖޭގައި ރެޖިސްޓްރީކޮށްގެން ހިންގާ ޕާޓީއެއް ޓެރެރިސްޓުންނާ ގުޅުވައިގެން ވާހަކަ ދައްކަވާތީ ހިތާމަ ކުރައްވާ ކަމަށް ވިދާޅުވެފައެވެ. ނަމަވެސް ރިޔާސަތުގައި މިއަދު އިންނެވި މަޖިލީހުގެ ނައިބު ރައީސާ އީވާ އަބްދުﷲ ވިދާޅުވީ، ޕީޕީއެމް ޓެރެރިސްޓުންނާ ގުޅުވާ ވާހަކަ ދެއްކެވި ކަމަކަށް ފާހަގަ ނުކުރެވޭ ކަމަށާއި އަދި އިލްޔާސް އެފަދަ ގޮތަކަށް ކަންތައް ނުކުރައްވާނެކަން ކަށަވަރު ކަމަށެވެ.
ނިޒާމީ މައްސަލަ ބަލައި ނުގަތުމުން އިލްޔާސްގެ ވާހަކަ ކުރިޔަށް ގެންދަވަމުން އޭނާ ވިދާޅުވީ، ޕީޕީއެމްއާ ޓެރެރިސްޓުންނާ ގުޅުވާ ވާހަކަ ނުދައްކަވާ ކަމަށާއި ޕީޕީއެމްގެ ސަރުކާރުގައި އެފަދަ ފަރާތްތަކާ މެދު ފިޔަވަޅު ނޭޅުއްވީތީ އެކަން ފާހަގަ ކުރެއްވީ ކަމަށެވެ. އަދި ޕީޕީއެމްއިން ސިޔާސީ ފައިދާ ނެގުމުގެ މަޤްސަދުގައި ޓެރެރިސްޓުންނަށް ހިތްވަރު ލިބޭ ވާހަކަ ދައްކަވާ ކަމަށް އަނެއްކާ ވެސް އިލްޔާސްވަނީ ތުހުމަތު ކުރައްވައިފައެވެ.
"ތިބޭފުޅުން އެމީހުނަށް ހިތްވަރު ލިބޭ ކަންތައް ނުކުރައްވައްޗޭ.... ތިބޭފުޅުން ސިޔާސީ ފައިދާއެއް ނެގުމުގެ ބޭނުމުގައި އެކަހަލަ ކަންކަމަށް ތުހުމަތު ކުރެވޭ މީހުންނަށް ހިތްވަރު ދޭތަން ފެނޭ" އިލްޔާސް ވިދާޅުވިއެވެ.
އިލްޔާސް ވަނީ ހަރުކަށި މީހުން ޓްރެއިނިންގް ޕްރޮގްރާމްތައް ފަޅު ރަށްރަށުގައްޔާއި ކަނޑުމަތީގައި ހިނގާ ކަމަށް އެމަނިކުފާނަށް ސައްޙަ މަޢުލޫމާތު ލިބޭ ކަމަށް ވިދާޅުވެފައެވެ.
"ޓެގް އަޅުވައިގެން މިމީހުންގެ ކަންތައް ބަލަން ޖެހޭ. ކަނޑު މަތީގައި މި މީހުންގެ ޕްރޮގްރާމްތައް ހިންގާ. ފަޅު ރަށްރަށުގައި ހިންގާ. ފިނޮޅުތަކުގައި ހިންގާ. ރޭގަނޑު ދަންވަރާ އެކީ މީހުން މި ޕްރޮގްރާމްތައް ހިންގާ ކަމަށް އަޅުގަނޑަށް މަޢުލޫމާތު ލިބޭ." އިލްޔާސް ވިދާޅުވިއެވެ.
ރައީސް ނަޝީދަށް އަމާޒުކޮށް ހަމަލާއެއް ދޭން އުޅޭ ކަމަށް އާންމު މީހެއްގެ ފަރާތުން މައުލޫމާތު ލިބުނު ކަމަށް މީގެ ކުރިން އިލްޔާސް ލަބީބް ވަނީ ވިދާޅުވެފައެވެ. އަދި އެ މައުލޫމާތު އޭރު ޑިފެންސް މިނިސްޓަރު މާރިޔާ އަހުމަދު ދީދީ އަށް ދެއްވައިފައި ވާނެ ކަމަށް ވެސް އޭރު އެމަނިކުފާނު ވިދާޅުވިއެވެ.
" ދީނީ ހެޓް އަޅައިގެން އެބަ ތިބި ޓެރެރިސްޓުން ވާގިދޭ ފަރާތްތައް، އެމީހުންނަށް ހިތްވަރުދޭ ފަރާތްތައް. އެމީހުންނަށް ފަތުވާ ނެރޭ ފަރާތްތައް. ލޭ ހުއްދަ ކުރާ ފަރާތްތައް. އެ ފަރަތާތްތަކަށް އެންމެ ތަންކޮޅެއް ވެސް ދޫކޮށްގެން ނުވާނެ. އަޅުގަނޑުމެން ނުތިބޭނަން ބަލާކަށެއް." އިލްޔާސް ވިދާޅުވިއެވެ.
އިލްޔާސްގެ ވާހަކަފުޅުގައި މަޖިލީހުން ޓެރެރިސްޓުން ހުއްޓުވުމަށް ޤާނޫން ފާސްކުރާނެ ކަމަށާއި މިފަދަ މީހުން ހައްޔަރުކޮށް ޤާނޫން ތަންފީޒް ކުރުމަށް ހޯމް މިނިސްޓަރަށް ވަނީ ގޮވައިލައްވައިފައެވެ.
އިލިޔާހާ. ކަލޯ ބުނިޔަސް ތިޔައީ ތެދެއް. ބޮޑު ވަގު ވެރިކަމުގަ ހުރިއިރު ޕީޕީއެމާ ޕީއެންސީ ޔާ ލާޖެއްސުމުގައި ރުބެލްކުޅިވެސް ކުޅުނޫ ވަގުން އަބަދުވެސް އެންމެންނަށް ދިނީ ” ޓެރަރިސްޓް ” ލަޤަބު. އެހެންވީމަ ކަލޯ ބުނިޔަސް ޕީޕީއެމަށް ހަމައެނގޭނީ މިބުނާހެން ހަމަޓެރަރިސްޓުން އުފެއްދުމާ ޓެރަރިސްޓުންނަށް ރުބެލްގެ އޯގާތެރިކަން ދަސްކޮށްދިނުން