ހަމަލާގެ އިންކުއަރީ: “ނޭނގި ހިނގި ކަމެއްނޫން”
މިދިޔަ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއަކީ ނޭނގި ހިނގައިފައި އޮތް ކަމެއް ކަމަށް ގަބޫލެެއް ނުކުރެވޭ ކަމަށް ފުލުހުންގެ އިސްވެރިއަކު ވިދާޅުވެއްޖެއެވެ.
އޮފިޝަލް އެ ވާހަކަ ހިއްސާ ކޮށްފައި ވަނީ ރައްޔިތުންގެ މަޖިލީހުން ހިންގި އިންކުއަރީގައެވެ.
މިއަދު އާއްމު ކުރި އިންކުއަރީ ރިޕޯޓުގައިވާ ގޮތުގައި އަންނޯންސްތައް (ހިނގައިދާނެ ކަންކަން) ގިނަވެގެން ގޮސް އެއްވެސް އިންޓެލިޖަންސް އިދާރާއަކަށް ނޭނގި ވެސް މިފަދަ ކަމެއް ހިނގުން އެކަށީގެންވާ ކަމަށާއި މިއީ ނޭނގި ހިނގައިފައި އޮތް ކަމެއް ނޫން ކަމަށް ގަބޫލުކުރާ ކަމަަށެވެ.
“އެހެންނަމަވެސް، މި ސްޕެސިފިކް އިންކުއަރީ ހިންގޭ، މި ހަމަލާއާ ގުޅިގެން މި ހިންގޭ އިންކުއަރީއާ ގުޅޭގޮތުން ދަންނަވާ ކަމަށްވަންޏާ، އަޅުގަނޑަށް މިހާރު އެނގޭ އެއްޗަކީ، ކޮންމެވެސް އެއް ހިސާބަކުން އެނގިފައި މިއޮތީ. މިއީކީ ނޭނގި ހިނގާފައި އޮތްކަމެއް ނޫން ކަމަށް އަޅުގަނޑު ޤަބޫލުކުރަނީ، ކޮންމެވެސް އެއް މޭރުމަކުން މި ފަދަ ކަމެއް ހިނގައިފާނެކަމުގެ ކޮންމެވެސް ވަރެއްގެ އިންޕުޓުތަކެއް ކޮންމެވެސް ބޭފުޅުންނަށް ކުރީ ބައިގައި ލިބިވަޑައިގެން އޮވެ ހިނގައިފައިވާ ހަމަލާއެއް” ފުލުހުންގެ އިސްވެރިއަކު އިންކުއަރީއަށް މައުލޫމާތު ދެއްވަމުން ވިދާޅުވެފައިވެއެވެ.
މީގެ އިތުރުން ވެސް މި އިންކުއަރީއަށް ލިބުނު މައުލޫމާތަށް ބަލާއިރު ރައީސް ނަޝީދަށް ދިން ހަމަލާ ދެނެގަނެވޭނެ މިންވަރަށް، “އިންޑިކޭޓަރސް" ނުވަތަ "ފްލޭގް" ވާންޖެހޭ ޒާތުގެ މަޢުލޫމާތުތަކެއް
އެމް.އެން.ޑީ.އެފްއަށް ލިބިފައިވާކަމަށް މިއަދު އާއްމު ކުރި ރިޕޯޓުގައި ވަނީ ވިދާޅުވެފައެވެ.
“މި އިންކުއަރީއަށް ހޯދުނު މަޢުލޫމާތުތަކުގެ އަލީގައި، މި އިންކުއަރީއަށް ޤަބޫލު ކުރެވެނީ މޭ 6، 2021 ގައި ރައީސް މުޙައްމަދު ނަޝީދަށް ދިން ހަމަލާ ދެނެގަނެވޭނެ މިންވަރަށް، "އިންޑިކޭޓަރސް" ނުވަތަ "ފްލޭގް" ވާންޖެހޭ ޒާތުގެ މަޢުލޫމާތުތަކެއް އެމް.އެން.ޑީ.އެފް އަށް ލިބިފައި ހުރިކަމަށެވެ.” ރިޕޯޓުގައި ވިދާޅުވެފައިވެއެެވެ.
ރައީސް މުޙައްމަދު ނަޝީދަށް ބަޔަކު ފާރަލާކަމުގެ މަޢުލޫމާތު އެމް.އެން.ޑީ.އެފްއަށް ލިބިފައިވާ ކަމަށާއި އެމް.އެން.ޑީ.އެފްއަށް ލިބިފައިހުރި މަޢުލޫމާތަށް ބަލާއިރު ރައީސް މުޙައްމަދު ނަޝީދަށް ދީނީ ހަރުކަށި ފިކުރުގެ ބަޔަކު ފާރަލިކަން އެމް.އެން.ޑީ.އެފްއަށް އެނގިފައިވާކަމަށް ރިޕޯޓުގައި ފާހަގަކޮށްފައިވެއެވެ. އަދި މިއިންކުއަރީއަށް މަޢުލޫމާތުދިން ޑީ.އައި.އެސް މާހިރުންގެ ބަހުންނާއި، އެމް.އެން.ޑީ.އެފްއިން ފޮނުވާފައިވާ ލިޔެކިޔުމުން މިކަން ކަށަވަރުވާ ކަމަށާއި މި އިންކުއަރީއަށް މަޢުލޫމާތު ލިބިފައިވާގޮތުގައި ދިވެހިރާއްޖޭގެ ހައި ލެވެލް ޓާގެޓަކަށް އަމާޒުކޮށް ހަމަލާއެއް ދިނުމަށް ރާވަމުންދާކަމަށް މަޢުލޫމާތު ޑިސެންބަރު 22، 2020 ވަނަ ދުވަހު ލިބިފައިވާ ކަމަށާއި، ރައީސް މުޙައްމަދު ނަޝީދަށް ހަރުކަށި ފިކުރުގެ ފަރާތްތަކުން ސަރވައިލްކުރަމުން ދާކަމުގެ މަޢުލޫމާތު
ލިބިފައިވާކަމަށް އެމް.އެން.ޑީ.އެފްއިން މި އިންކުއަރީއަށް މަޢުލޫމާތު ދީފައިވާކަމަަށް ވެސް ރިޕޯޓުގައި ވަނީ ވިދާޅުވެފައެވެ.
