ރައީސް ނަޝީދަށް އަމާޒުކޮށް ދިން ހަމަލާއަށް އިންސާފު ހޯދައިދޭނަން: ޑރ. މުއިއްޒު

ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާގެ ފަހަތުގައިވާ މީހުން ހޯދައި، އެމަނިކުފާނަށް އިންސާފު ހޯދައިދޭނެކަމަށް އިދިކޮޅު ކޮންގްރެސް ކޯލިޝަން ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ މާފަންނު އުތުރު ދާއިރާގައި ބޭއްވި ކަންމަތީ ޖަލްސާއެއްގައި ވާހަކަ ދައްކަވަމުން މުޢިއްޒު ވިދާޅުވީ އިންސާފުވެރިކަން ހުރިހާ އެންމެންނަށް ވެސް ގާއިމުކޮށްދޭންޖެހޭ ކަމަށާއި ޝަރުއީ ދާއިރާ ހަގީގީ ގޮތުގައި މިނިވަންކޮށްގެން ކުރާ ވެރިކަމެއް އެކަނިކުފާނު ހިންގަވާނެ ކަމަށެވެ.
އަދި ރައީސް ނަޝީދަށް ދިން ބޮމުގެ ހަމަލާގައި އެމަނިކުފާނަށް އިންސާފު ހޯދައިދެވިފައިނުވާ ކަމަށާއި ސަރުކާރުން ވެސް އެކަމަށްޓަކައި ދޭންވާ ސަމާލުކަމެއް ދީފައެއްނުވާ ކަމަށް މުޢިއްޒު ވިދާޅުވިއެވެ. އެ ހަމަލާއަށް އިންސާފު ހޯދައިދޭނީ އެމަނިކުފާނުގެ ސަރުކާރެއްގައި ކަމަށް މުޢިއްޒު ވިދާޅުވިއެެވެ.
"އެ ހަމާލާއަށް އިންސާފު ހޯދައިދީފައި ނުވޭ، މި ސަރުކާރުން އެކަމަށް ދޭންވާ ސަމާލުކަން ދީފައި ނުވޭ. އެހެންވީމާ އިންސާފުވެރި ސަރުކާރެއް ގާއިމު ކުރުމަށް އަޅުގަނޑުމެން މި އަންނަނީ. އިރާދަކުރެއްވިއްޔާ އެމަނިކުފާނަށް ވެސް އިންސާފު ހޯދައިދޭނީ އަޅުގަނޑުމެންގެ ސަރުކާރެއްގައި" މުޢިއްޒު ވިދާޅުވިއެވެ.
މުޢިއްޒު ވިދާޅުވީ ވަކި މީހަކަށް ވީތީ، ނުވަތަ ވަކި މަގާމެއް އަދާކުރާ މީހަކަށް ވުމަކީ ބޭއިންސާފުން ކަންތައްތައް ކުރަން ޖެހޭނެ ކަމެއް ނޫން ކަމަށާއި ކޮންމެ ރައްޔިތަކީ ވެސް އިންސާފާއި ހަމަހަމަ އުސޫލުގެ ތެރެއިން އުޅެވެން ޖެހޭ މީހެއްކަމަށެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.