ނަޝީދުގެ ހަށިފާރަވެރިންނަށް ތައުރީފު ހައްގު، ސިފައިން ހިތްވަރު ގަދަ : މެމްބަރުން

މިދިޔަ މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާ ދިން ވަގުތު އެމަނިކުފާނުގެ ހަށިފާރަވެރިންގެ ގޮތުގައި ތިއްބެވި ބޭފުޅުންނަކީ ހިތްވަރު ގަދަ، ތަައުރީފު ހައްގު ސިފައިކަމަށް ވިދާޅުވެ ރައްޔިތުންގެ މަޖިލީހުގެ މެމްބަރުން، ރައީސް ނަޝީދުގެ ހަށިފާރަވެރިންނަށް ތައުރީފު ކުރައްވައިފިއެވެ.

Ads by Sosun Fihaara

ރައީސް ނަޝީދަށް ދިން ހަމަލާއާ ގުޅިގެން އެމަނިކުފާނުގެ ސެކިއުރިޓީ ބްރީޗްވީ ގޮތާ ގުޅޭގޮތުން މަޖިލީހުން ކުރިއަށް ގެންދިޔަ އިންކުއަރީ ނިންމާލައި 241 ކޮމިޓީން އެކުލަވައިލި ރިޕޯޓަށް ރޭ ކުރި ބަހުސްގައި ގިނަ މެމްބަރުން ވަނީ ހަށިފާރަވެރިން ކުރެއްވި މަސައްކަތްތަަކުގެ އަގު ވަޒަން ކުރައްވާ އެބޭފުޅުންނަށް މެމްބަރުން ވަނީ ތައުރީފު ކުރައްވައިފައެވެ.

މި ގޮތުން ރައްޔިތުންގެ މަޖިލީހުގެ ނައިބު ރައީސާ އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވެސް ވަނީ ރައީސް ނަޝީދުގެ ހަށިފާރަވެރިންނަށް ތައުރީފު ކުރައްވާފައެވެ. އަދި ހާއްސަކޮށް ސާޖަންޓް އިލްހާމް އަހުމަދުގެ ނަން އީވާ ވަނީ ފާހަގަ ކުރައްވައިފައެވެ.

ގުރައިދޫ ދާއިރާގެ މެމްބަރު ގައްސާން މައުމޫން ވެސް ރައީސް ނަޝީދުގެ ހަށިފާރަވެރިން ކުރެއްވި މަސަައްކަަތަށް ތައުރީފް ކުރައްވައިފައެވެ. އޭނާ ދެއްކެވި ވާހަކަފުޅުގައި ރައީސް ނަޝީދު ވެއްޓިވަޑައިގެން ބިންމަތީ ނުޖެހެނީސް ހިފަހައްޓަވައި ކާރަކަށް ލައިގެން އެ މަނިކުފާނު ހޭފުޅުހުރިކަން ކަށަވަރުކުރަމުން ހޮސްޕިޓަލަށް ގެންދެވިކަމަށާއި އެބޭފުޅުން އަމަލުކޮށްފައި ވަނީ އޮޕަރޭޝަން ޕްރޮސީޖާގައި ކަނޑައެޅިފައި އޮތްގޮތަށް އަކުރުން އަކުރަށް ކަމަށް ވިދާޅުވިއެވެ. އަދި އެއީ ހިތްވަރުގަދަ ދިވެހި ސިފައިން ކަމަށް ވެސް ގައްސާން ވިދާޅުވިއެވެ.

ހަމަ މިފަދައިން މަޑަވެލީ ދާއިރާގެ މެމްބަރު ހުސެއިން ފިރުޝާން ވެސް ވަނީ ރަައީސް ނަޝީދުގެ ހަށިފާރަވެރިން ކުރެއްވި މަސައްކަތަށް ސެލިއުޓް ކުރައްވާކަމަށް ވިދާޅުވެފައެވެ. ފިރުޝާން ވިދާޅުވީ އެއީ މި ގައުމަށް ލިބިފައި ހުރި ޖަވާހިރުތަކެއް ކަމަށާއި އަމިއްލަ ނަފްސަށް ނުވިސްނަވައި ރައީސް ނަޝީދުގެ ހަށިކޮޅާ ދޭތެރޭ ވިސްނައިގެން ކުރެއްވި މަސައްކަތަކީ ހަމަ ޔަގީނުން ވެސް ދިވެހި ރައްޔިތެއްގެ ހައިސިއްޔަތުން އެ ބޭފުޅުންނަށް ޓަކައި ފަހުރުވެރިވާ ކަމެއްކަމަށް ވެސް ފިރުޝާން ވިދާޅުވިއެވެ.

ރައީސް ނަޝީދަށް އަމާޒުކޮށް ދިން ނުރައްކާތެރި ޓެރަރިސްޓް ހަމަލާގައި ސައިކަލު ގޮއްވައިލީ ޕްރައިވެޓް މުހައްމަދު ރިޝްވާން ރައީސް ނަޝީދުގެ ކާރުކޮޅުގެ ދޮރުކޮޅު ހުޅުވުމަށް އަތް ޖައްސައިލި ވަގުތުކަމަށާއި އިވުނު ބާރުއަޑާ އެކު ރައީސް ނަޝީދު ބިންމައްޗަށް ވެއްޓިވަޑައިގަންނަވަނިކޮށް ސާޖަންޓް އިލްހާމްގެ ހުޝިޔާރުކަމާ އެކު ރައީސް ނަޝީދު ވެއްޓުނަ ނުދީ ހިފެހެއްޓެވިކަމަށް 241 ކޮމިޓީގެ ރިޕޯޓުގައި ވަނީ ހާމަ ކުރައްވައިފައެވެ. އަދި އައިއީޑީ ގޮވިލެއް ބާރު ގަދަކަމުން ރައީސް ނަޝީދުގެ ކާރުގެ ޑްރައިވަރު ސްޓާފް ސާޖަންޓް އަބްދުﷲ އާއިދުގެ ކަންފަތަށް އެވަގުތު އެއްވެސް އަޑެއް ނުއިވުނު ކަމަށާއި އަދި ކާރު ސްޓާޓް ނުކުރެވުނު ކަމަށް ވެސް ރިޕޯޓްގައި ވަނީ ފާހަގަކޮށްފައެވެ.