މަސައްކަތް މިކުރަނީ ލަސްތަކެއް ނުވެ ރާއްޖެ ދިޔުމަށް: ރައީސް ނަޝީދު
ލަސްތަކެއް ނުވެ ރާއްޖެ ވަޑައިގަންނަވަން މަސައްކަތް ކުރައްވާ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދަށް ދެމުން ގެންދިޔަ ސެކިއުރިޓީ ބްރީޗްވި ގޮތާ، ގުޅޭ ގޮތުން ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީ (241) ކޮމިޓީން ތައްޔާރު ކުރި ޕާލިމަންޓްރީ އިންކުއެރީ ރިޕޯޓް އެމަނިކުފާނަށް އެރުވުމަށް ބޭއްވި ރަސްމިއްޔާތުގައި ވާހަަކަ ދައްކަވަމުން ވިދާޅުވީ، ބޭސްފަރުވާއަށް އަދިވެސް ދުވަސްކޮޅަކު ރާއްޖޭން ބޭރުގައި ހުންނަވަން ޖެހިވަޑައިގަންނަވާ ކަމަށެވެ.
މަޖިލިސް ރައީސް އިތުރަށް ވިދާޅުވީ، ރާއްޖެ އެނބުރި ވަޑައިގަންނަވާއިރު ފުރިހަމަ ސިއްހަތެއްގައި ވަޑައިގެންނެވުން ބޭނުންތެރި ކަމަށެވެ. އަދި މާ ލަސްތަކެއް ނުވެ އެނބުރި ވަޑައިގަންނަވަން މަސައްކަތް ކުރައްވަމުން ގެންދަވާ ކަމަށް ވެސް އެ މަނިކުފާނު ވިދާޅުވިއެވެ.
"އަޅުގަނޑަށް ދުވަސްކޮޅަކު ރާއްޖެއިން ބޭރުގައި ހުންނަން ޖެހޭނެ އެއީ ބޭސްފަރުވާއަށް ޓަކައި ވެސް އަދި އަޅުގަނޑު އެނބުރި އަންނައިރުގައި އިރާދަކުރެއްވިއްޔާ ހެޔޮ ހާލުގައި ރަނގަޅު ސިއްޙަތުގައި އައުން ބޭނުންތެރި ކަމަކަށް ވާތީވެ" އިންކުއަރީ ރިޕޯޓު އެރުވުމަށް ބޭއްވި ރަސްމިއްޔާތުގައި ރައީސް ނަޝީދު ވިދާޅުވިއެވެ.
މެއި މަހުގެ 6ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ނިރުބަވެރި ހަމަލާގެ ސަބަބުން ލިބިވަޑައިގެންނެވި އަނިޔާތަކަށް އޭޑީކޭގައި ފަރުވާ ހޯދެއްވުމަށް ފަހު އެމަނިކުފާނު ފުރަތަމަ ވަޑައިގެންނެވީ ޖަރުމަނުވިލާތަށެވެ. އެއަށްފަހު މިހާރު އެ މަނިކުފާނު ހުންނެވީ އިނގިރޭސިވިލާތުގައެވެ.
