ރައީސް ނަޝީދަށް ހަމަލާ ދޭން ތައްޔާރުވާން ފެށީ 2019 ވަނަ އަހަރު: ފުލުހުން
ކުރީގެ ރައީސް މުހައްމަދު ނަޝީދަށް ހަމަލާ ދޭން ތައްޔާރުވާން ފެށީ 2019ވަނަ އަހަރު ކަމަށް ފުލުހުން ވިދާޅުވެއްޖެއެވެ.
ރައީސް ނަޝީދު އަވަހާރަ ކޮށްލަން އަމާޒުކޮށް، މެއި މަހުގެ ހަ ވަނަ ދުވަހުގެ ރޭ ދިން ހަމަލާއާ ގުޅިގެން ފުލުހުން މިރޭ ކުރިއަށްގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ، ރައީސް ނަޝީދަށް ހަމަލައިދޭން ތައްޔާރު ވާން ފަށައިފައި ވަނީ 2019ވަނަ އަހަރުން ފެށިގެން ކަމަށް މިހާތަނަށް ކުރި ތަހުގީގުން ހާމަވެފައިވާ ކަމަށެވެ.
މިރޭގެ ބައްދަލުވުމުގައި ވާހަކަ ދައްކަވަމުން އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ރިޔާޒް ވިދާޅުވީ، މި ހަމަލާގައި ބޭނުންކުރި ސައިކަލު އެންމެ ފުރަތަމަ ގަނެގެން ގެނެސްފައި ވަނީ 2019 ވަނަ އަހަރު ކަމަށާއި މ.ޔާގޫތުގޭ ކައިރީގައި ވެސް ބޮން ގޮއްވައިލަން އެއިރު މަސައްކަތް ކުރި ކަމަށެވެ.
މި ބައްދަލުވުމުގައި އިތުރަށް ވިދާޅުވީ، ރައީސް ނަޝީދަށް ހަމަލާދޭން އިރުޝާދުދީ، އެކަމަށް ވިސްނައި ދިނުމުގައި އިސްކޮށް ހުރި މީހާ އައްޑޫން މިއަދު ހައްޔަރު ކޮށްފައިވާ ކަމަށެވެ.
ސީޕީ ހަމީދު ވިދާޅުވީ ރައީސް ނަޝިދަށް ދިން ހަމަލާ ރޭވުމުގެ ތުހުމަތުގައި އައްޑޫން ހައްޔަރުކުރީ ހއ. ހޯރަފުށީ އަލަނާސިގޭ މުހައްމަދު ތަސްނީމް ކަމަށެވެ. ސީޕީ ވިދާޅުވީ، ތަސްނީމަކީ 2017 ގައި މާލޭގައި ހިންގަމުން އައި އަމިއްލަ ކުންފުންޏެއްގެ އޮފީސްތެރޭގައި ބޮމެއް ހެދުމުގައި އަމަލީ ގޮތުން މަސައްކަތް ކުރަނިކޮށް، އެ އަހަރުގެ އޭޕްރީލް 24 ގައި ހައްޔަރުކޮށްފައިވާ މީހެއް ކަމަށް ވެސް ސީޕީ ހާމަ ކުރެއްވިއެވެ.
Ads by STO
