ޚަބަރު

ބޮމުގެ ހަމަލާއާއި މިނިސްޓަރ މާރިއާއަށް ލިބުނު މައުލޫމާތާ ގުޅުމެއް ނެތް: ފުލުހުން

ރައުފާ ރަޝީދު ، ދެން އޮންލައިން

ކުރީގެ ރައީސް މުހައްމަދު ނަޝީދު އަވަހާރަކޮށްލަން ހަމަލާއެއް ދޭން އުޅޭކަމަށް ބުނެ ޑިފެންސް މިނިސްޓަރ މާރިޔާ އަޙްމަދު ދީދީއާ ލިބިފައިވާ މަޢުލޫމާތާއި 6 މޭގެ ބޮމުގެ ހަމަލާއާ ގުޅުމެއް ނެތްކަމަށް ފުލުހުން ވިދާލުވެއްޖެއެވެ.

Ads by MWSC

ރައީސް ނަޝީދަށް ދިން ހަމަލާއާ ގުޅޭ އެންމެ ފަހުގެ މައުލޫމާތުތައް ހިއްސާކުރަން ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ ޑިފެންސް މިނސްޓަރަށް ލިބުނު މަޢުލޫމާތާ ގުޅިގެން ސުވާލުކުރަން ޖެހޭ ބައެއް ފަރާތްތަކާ ސުވާލުކޮށްފައިވާ ކަމަށެވެ. އަދި ހަމަލާއާ ޑިފެންސް މިނިސްޓަރ މާރިޔާ އަޙްމަދު ދީދީއާ ލިބިފައިވާ މަޢުލޫމާތާއި ސީދާ ގޮތުން ގުޅުމެއް އޮތްކަމަށް ބެލެވޭ ހެއްކެތް ނެތް ކަމަށް ރިޔާޒު ވިދާޅުވިއެވެ.

މީގެ އިތުރުން ރިޔާޒް ވިދާޅުވީ ރައީސް ނަޝީދުގެ އަރިހުން ވެސް މިކަމާ ގުޅޭ ބައެއް މައުލޫމާތު ސާފުކުރަން ޖެހޭ ކަމަށާއި ނަމަވެސް މިހައިތަނަށް ރައީސް ނަޝީދުގެ ބަހެއް ލިބިފައި ނުވާ ކަމަށެވެ. ހަމަލާއާ ގުޅޭގޮތުން މައުލޫމާތު ދިނުމަށް ރޭ ބޭއްވި ނޫސްވެރިންގެ ބައްދަލުވުމުގައި ހަމަލާގެ ގިނަ މައުލޫމާތު ފުލުހުން ވަނީ އާންމުކޮށްފައެވެ. އެގޮތުން އެ ޙަމަލާ ދިނުމަށް ހުޅުމާލެ އަދި މާލޭގައި އެ މީހުން ހަރަކާތްތެރިވި ސަރަޙައްދުތައް ދެނެގަނެ ރޭގެ ބައްދަލުވުމުގައި އެކަމާ ގުޅޭ ވީޑިއޯއެއް ވެސް ފުލުހުން ވަނީ ޙިއްސާކޮށްފައެވެ.

Ads by HDC

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!