ކުއްލި ނުރައްކަލުގެ ހާލަތު އިއުލާނު ކުރަން ޖެހޭ ހާލަތެއް އޮތް ކަމަކަށް ނުދެކެން: ޑރ. ޝަހީމް
ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަން ޖެހޭ ފަދަ ހާލަތެއް އޮތްކަމަށް ދެކިވަޑައިނުގަންނަވާ ކަމުގައި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ހަރުކަށި ފިކުރަށް ނިސްބަތްވާ މީހުން ހައްޔަރުކުރުމަށް ރާއްޖޭގައި ކުއްލި ނުރައްކަލުގެ ހާލަތު އިއުލާނު ކުރުމަށް ގޮވައިލާ ޤަރާރެއް އެމްޑީޕީގެ ޤައުމީ މަޖިލީހުން ވަނީ ފާސްކޮށްފައެވެ.
ރައްޔިތުންގެ މަޖިލީހުގެ ވެސް ރައީސް، މުޙައްމަދު ނަޝީދު ވިދާޅުވެފައި ވަނީ އެއީ އެއްވެސް ހާލަތެއްގައި ރައީސް ޞާލިޙަށް ޤާނޫނުން ލިބިދޭ ބާރަށް އަރައި ގަތުމަށް ކުރެއްވިކަމެއް ނޫން ކަމަށެވެ.
ކުއްލި ނުރައްކަލުގެ ހާލަތު އިއުލާނު ކުރެއްވުމަށް ރައީސް ނަޝީދު ކުރައްވާ މަސައްކަތާ ގުޅިގެން ޑރ. ޝަހީމް މިއަދު ވިދާޅުވީ މި ހާލަތަކީ ޤައުމަށް ދިމާވެފައިވާ ގޮންޖެހުންތަކުން އަރައިގަތުމަށް މަސައްކަތް ކުރަންވީ ވަގުތު ކަމަށާއި މި ވަގުތުގައި، ޤައުމުގެ ހާލަތު އަނެއްކާ ވެސް އިިތުރަށް ގޯސްވެގެންދާނޭ ގޮތަކަށް ޖާގަ ދެވިގެން ނުވާނެ ކަމަށެވެ.
"ޤާނޫނު އަސާސީގެ ބާރު ކަނޑުވައިލައި ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަން ޖެހޭ ފަދަ ހާލަތެއް އޮތްކަމަށް ނުދެކެން. މިވަގުތަކީ ޤާނޫނު އަސާސީ ނަގަހައްޓައި، ޤާނޫނުތައް ހިންގައި ޤައުމީ މަސްލަހަތު އިސްކޮށް ގޮންޖެހުންތަކުން އަރައިގަތުމަށް މަސައްކަތް ކުރަންވީ ވަގުތު ކަމުގައި ދެކެން." ޑރ. ޝަހީމް ވިދާޅުވިއެވެ.
މީގެ އިތުރުން ޑރ. ޝަހީމް ވިދާޅުވީ ހަރުކަށި ފިކުރާއި ޓެރެރިސްޓުންނާ ދެކޮޅަށް އަޅަން ޖެހޭ ފިޔަވަޅު އެޅުމަށް ޤާނޫނުތަކުން މިހާރު ވެސް ގިނަ ބާރުތަކެއް ދީފައިވާ ކަމަށާއި އެ ކަންކަން ކުރުމަށް ޤާނޫނީ ޒިންމާ އަދާކުރައްވާ ފަރާތްތަކަށް އެއްވެސް ހުރަހެއް ނެތި ޤާނޫނީ ބާރުވެރިކަން ލިބިދީފައިވާ ކަމަށެވެ.
