ޝާހިދަށް ދެ މަގާމުގައި ނުހުރެވޭނެ، އެކަން ގާނޫނާ ހިލާފް: ޖަމީލް
ފޮރިން މިނިސްޓަރު އަބްދުﷲ ޝާހިދަށް ދެ މަގާމުގައި ނުހުންނެވޭނެ ކަމަށާއި އެއީ ގާނޫނާ ހިލާފު ކަމެއް ކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިފަދައިން ވިދާޅުވެފައި ވަނީ ރޭ އިދިކޮޅުން "މިނިވަން ކަމުގެ ދިފާޢުގައި-ދިވެހީން"ގެ ނަމުގައި ފެއްޓެވި ކެންޕެއިން އިފްތިތާޙްކޮށްދެއްވުމަށް ވާހަކަފުޅު ދައްކަވަމުންނެވެ.
ޖަމީލް ވިދާޅުވީ ގާނޫނު އަސާސީގައި އެއީ ގާނޫނާ ހިލާފު ކަމެއްކަން ސާފުކޮށް ބަޔާންކޮށްފައި އޮއްވައި، ރައީސް އިބްރާހިމް މުހައްމަދު ސޯލިހު އެގޮތަށް އަމަލުކުރައްވަމުން ގެންދަވާތީ މި ސަރުކާރަކީ ޣައިރު ގާނޫނީ ސަރުކާރެއް ކަން ހާމަވާ ކަމަށެވެ.
މީގެ އިތުރުން ޖަމީލް ވިދާޅުވީ މިނިސްޓަރަކު މިނިސްޓަރުކަމުގައި ހުންނަވައިގެން އިތުރު އެއްވެސް މަސައްކަތެއް ނުވަތަ ވަޒީފާއެއް އަދާ ކޮށްގެން ނުވާނެކަން ގާނޫނު އަސާސީގައި ބަޔާންކޮށްފައިވާ ކަމަށެވެ.
ޖަމީލް މިފަދައިން ވިދާޅުވެފައި ވަނީ ފޮރިން މިނިސްޓަރ ކަމުގެ މަގާމުގައި ހުންނެވި ޝާހިދު ވަނީ އދ.ގެ އާންމު މަޖިލީހުގެ ރައީސްކަން ކުރައްވާތީ އެކަމަށް އިޝާރާތް ކުރައްވައެވެ.
