ވަތަނިއްޔާއިން އުރީދޫއަށް: 16 އަހަރުގެ ދިގު ދަތުރު ވަރުބަލި ކަމަކާ ނުލައި ކަސްޓަމަރުންގެ ޚިދުމަތުގައި!
ރާއްޖޭގެ އެންމެ ގިނަ ބަޔަކު މިހާރު ބޭނުންކުރަމުން އަންނަ މުއާސަލާތީ ޚިދުމަތް ކަމަށްވާ "އުރީދޫ"އަށް މިއަދު މިވަނީ އުފާވެރި 16 އަހަރު ފުރިފައެވެ.
މިއަދަކީ "ވަތަނިއްޔާ"ގެ ނަމުން ވުޖޫދުވި އުރީދޫއަށް، ގަތަރުގެ އެންމެ ބޮޑު އެއް ކުންފުނިން ރާއްޖޭގައި ފޮރިން އިންވެސްޓްމަންޓެއްގެ ގޮތުގައި އިންވެސްޓް ކުރި ދުވަހެވެ. އެގޮތުން 2005ވަނަ އަހަރުގެ އޯގަސްޓް މަހުގެ 1ވަނަ ދުވަހު އެ ކުންފުނިން ރާއްޖޭގައި ހިދުމަތް ދޭން ފަށާފައިވާއިރު، މިހާތަނަށް ވަރަށް ގިނަ ހެޔޮ ބަދަލުތައް ވެސް މިވަނީ ކަސްޓަމަރުންނަށް ގެނެސްދީފައެވެ.
އުރީދޫން ރާއްޖޭގެ މުއާސަލާތީ ހިދުމަތްތަކަށް ގެނެސްދިން އެންމެ ބޮޑު ހެޔޮ އެއް ބަދަލަކީ ވާދަވެރިކަމުގެ ބަދަލުގެ އިތުރުން ޑިޖިޓަލް ޒަމާނަކަށް ރާއްޖެ އިތުރަށް ތައާރަފް ކޮށްދީ، ޑިޖިޓަލް ދުނިޔެއަށް ދިވެހިން ބޮޑަށް ލޯ ހުޅުވައި ދިނުމެވެ.
އެކަމާ ބެހޭގޮތުން އުރީދޫގެ ސީއީއޯ އަދި އެމްޑީ ނަޖީބު ހާން ވިދާޅުވެފައި ވަނީ، އެ ކުންފުނީގެ މަގުސަދަކީ އިންޓަނެޓްގެ ދުނިޔޭގެ އެންމެ ފަހުގެ ޓެކްނޮލޮޖީ ރާއްޖެއަށް ގެނެސް ދިނުން ކަމުގައެވެ. އުރީދޫގެ އެ ލަނޑުދަނޑި ވަރަށް ފުރިހަމަކަމާ އެކު އެ ކުންފުނިން ދަނީ ހާސިލް ކުރަމުންނެވެ.
ސޯޅަ އަހަރަކީ ކުރު ދަތުރެއް ނޫނެވެ. އުރީދޫއަށް ފާއިތުވީ މި 16 އަހަރު ދުވަހުގެ ތެރޭގައި އެ ކުންފުނިން ވަނީ ރާއްޖޭގައި ވަރަށް ގިނަ ހިދުމަތްތަކެއް ތައާރަފް ކޮށްދީފައެވެ.
އެގޮތުން ފާހަގަ ކޮށްލެވޭ އެއް ކަމަކީ އުރީދޫ، ދިވެހިންގެ ހިއްސާ އޮންނަ ކުންފުންޏަކަށް ބަދަލު ވުމެވެ. އިނީޝިއަލް ޕަބްލިކް އޮފަރިން (އައިޕީއޯ)އާ އެކު ދިވެހިންނަށް ދުނިޔޭގެ އެންމެ ބޮޑު އެއް ކުންފުނީގައި ހިއްސާ ވުމުގެ ޝަރަފު އުރީދޫން ވަނީ ދިވެހިންނަށް ހޯދައިދީފައެވެ.
މުއާސަލާތީ ޚިދުމަތެއްގެ ގޮތުގައި މިހާރު ގިނަ އަދަދެއްގެ ދިވެހީން އިޚްތިޔާރު ކުރާ އުރީދޫން ވަނީ 3ޖީ އާއި 4ޖީ ގެ ހިދުމަތްތައް ވެސް ދީފައެވެ. މީގެ އިތުރުން "ވައިފައި ކޯލިން" ފަދަ ދިވެހިންނަށް ކުރިން އެނގިފައި ނުވާ ހިދުމަތްތައް ވެސް އުރީދޫން ވަނީ ފޯރުކޮށްދީފައެވެ.
މިޒަމާނުގައި އެންމެ ބޭނުންވާ އެއް ހިދުމަތް ކަމަށްވާ އިންޓަނެޓްގެ ހިދުމަތް ދޭން އުރީދޫއަށް ހުއްދަ ލިބުމާ އެކު އެ ކުންފުނިން ވަނީ ރާއްޖޭގެ އާބާދީގެ 70 އިންސައްތައަށް "ސުޕަނެޓް"ގެ ހިދުމަތް ދީފައެވެ. މީގެ އިތުރުން 5ޖީގެ ހިދުމަތް ދީ ފިކްސްޓް ބްރޯޑްބޭންޑް އެއާފައިބާ ވެސް އިފްތިތާހް ކޮށްފައިވެއެވެ. އަދި ހަތް ޑިޖިޓަލް ސެންޓަރު ވެސް އެ ކުންފުނިން ހަދައިފައި ވެއެވެ.
އުރީދޫން ތައާރަކޮށްފައިވާ ތަފާތު ހިދުމަތުގެ ތެރޭގައި ފަސޭހަކަމާ އެކު ބޭނުން ވަގުތެއްގައި ހިދުމަތް ދެވޭ ގޮތަށް މާލެ، ހުޅުމާލެ އަދި ކުޅުދުއްފުށީގައި "ޑިޖިޓަކް ކިއޮސްކް" ގާއިމްކޮށްފައިވެއެވެ. އަދި ޑިޖިޓަލް ފައިސާ "އެމް ފައިސާ" އާއި އީކޮމާސް ހިދުމަތެއްގެ ގޮތުގައި "މޫލީ" ވެސް އެ ކުންފުނިން ތައާރަފްކޮށްފައިވެއެވެ.
މީގެ އިތުރުން އުރީދޫ މޯލްޑިވްސް ފާހަގަވެފައި ވަނީ އުފާވެރި މުނާސަބަތުތަކާއި ދަތި ހާލަތްތަކުގައި ވެސް ރައްޔިތުންނާ ވަރަށް ގާތުން މަސައްކަތް ކުރާ ހީވާގި ކުންފުންޏެއްގެ ގޮތުގައެވެ. އެގޮތުން ކޮވިޑްގެ އާލަމީ ވަބާ ރާއްޖޭގައި ފެތުރުމުން، އުރީދޫން ވަނީ އެ ހާލަތުގައި ވެސް ރާއްޖެއަށް އެކި ގޮތްގޮތުން އެހީތެރިވެދީފައެވެ. އެގޮތުން ކޮވިޑްގެ ސަބަބުން ސްކޫލްތަކަށް ގޮސްގެން ކިޔެވުން ބަންދުކުރި އިރު، އުރީދޫން ވަނީ ގޭގައި ތިބެގެން އެކުދިންނަށް ތައުލީމު ހާސިލު ކުރެވޭނެ މަގުފަހި ކޮށްދިނުމަށް ޚާއްސަ ލުއިތަކެއް ދީފައެވެ. އަދި ރާއްޖެއިން ކޮވިޑް-19އާ ދެކޮޅަށް ކުރާ މަސައްކަތްތަކަށް ގަތަރު އުރީދޫ ގްރޫޕާއި އުރީދޫ މޯލްޑިވްސްއިން ވަނީ 2.5 މިލިއަން ރުފިޔާގެ އެހީއެއް ވެސް ވެދީފައެވެ.
ރާއްޖެއަށް އެންމެ ބޮޑު އާމްދަނީއެއް ލިބޭ އެއް ދާއިރާއަކީ ފަތުރުވެރިކަމުގެ ދާއިރާއަށް ވީ ހިނދު، އުރީދޫން ވަނީ އެ ދާއިރާއަށް ވެސް އެހީތެރިކަމުގެ އަތެއް ދިއްކޮށްލައިފައެވެ. އެގޮތުން މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމްއެމްޕީއާރްސީ)އާ އެކު އިޝްތިހާރު ކޮށްދިނުމަށް އުރީދޫން ބައިވެރިވެ "ވިޒިޓް މޯލްޑިވްސް ނައު" ކެމްޕޭންގެ ދަށުން އުރީދޫ އޮޕަރޭޓް ކުރާ 10 ގައުމެއްގެ 117 މިލިއަނަށް ވުރެ ގިނަ ކަސްޓަމަރުންނަށް އަމާޒުކޮށް ރާއްޖޭގެ ރީތިކަން ޕްރޮމޯޓް ކުރަން ޑެސްޓިނޭޝަން ކެމްޕެއިނެއް އެ ކުންފުނިން ދަނީ ހިންގަމުންނެވެ.
ހިދުމަތުގެ ފެންވަރު ރަނގަޅުކޮށް، އިތުބާރު ހުރި ގުޅުމެއް ކަސްޓަމަރުންނާ އެކު މި ފާއިތުވީ 16 އަހަރު ގާއިމް ކޮށްފައިވާ އުރީދޫއަށް ވަނީ އިންޓަނޭޝަނަލް ބިޒްނަސް އެވޯޑްސްގައި ބައިނަލްއަގުވާމީ ގިނަ އެވޯޑުތަކެއް ވެސް ހާސިލު ކޮށްފައެވެ. އެގޮތުން ހާސިލު ކޮށްފައިވާ އެވޯޑުތަކަކީ:
- ގޯލްޑް ސްޓީވީ - ކޮންޕެނީ އޮފް ދަ އިޔަރ (ޓެލެކޮމިއުނިކޭޝަންސްގެ ދާއިރާއިން، މެދު ފަންތީގެ ވިޔަފާރިތައް)
- ސިލްވަ ސްޓީވީ - މޯސްޓް އިނޮވޭޓިވް ކޮންޕެނީ އޮފް ދަ އިޔާ ( 2500 މުވައްޒަފުނާއި ހަމައަށް)
- ބްރޮންޒް ސްޓީވީ - މޯބައިލް ސައިޓް އެންޑް އެޕް (ވިޔަފާރި)
- ބްރޮންޒް ސްޓީވީ - މޯސްޓް ވެލުއަބަލް ކޯޕޮރޭޓް ރެސްޕޯންސް
- ގޯލްޑް ސްޓީވީ - އެވޯޑް ފޯ އިނޮވޭޝަން އިން އެޕްސް
- ގޯލްޑް ސްޓީވީ - އެވޯޑް ފޯ އިނޮވޭޝަން އިން ކަސްޓަމާ ސާވިސް
- ސިލްވަ ސްޓީވީ - އެވޯޑް ފޯ އެކްސަލެންސް އިން އިނޮވޭޝަން އިން ޓެކްނޮލޮޖީ
ފާއިތުވީ 16 އަހަރު އުރީދޫން ރާއްޖެއަށް ދީފައިވާ އަގުހުރި ހިދުމަތްތަކަށް "ދެން"ގެ ފަރާތުން ވެސް ވަރަށް ޚާއްސަ ޝުކުރެއް އަދާކޮށް، އަހަރީ ދުވަހުގެ ހެޔޮ އެދުމާއި ތަހުނިޔާ އަރިސް ކުރަމެވެ.
