މި ފެންނަނީ ސަރުކާރު ނޭވާ ހޮޅިއަށް އެޅެމުންދާތަން: ސައީދު
މިހާރު ފެންނަމުން މިދަނީ ސަރުކާރު ނޭވާ ހޮޅިއަށް އެޅެމުންދާތަން ކަމަށް މާވަށު ދާއިރާގެ މެމްބަރު އަދި ޕީއެންސީ ނައިބު ރައީސް މުހައްމަދު ސައީދު ވިދާޅުވެއްޖެއެވެ.
ސައީދު ކުރެއްވި ޓްވީޓެއްގައި މި ފަދައިން ވިދާޅުވީ ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމް މަރުގެ މައްސަލަތައް ބަލާ ރިޔާސީ ކޮމިޝަނަށް ހާޒިރުވާން އެންގުމާ ގުޅިގެންނެވެ.
ސައީދު ވިދާޅުވީ މި ފެންނަމުން ދަނީ ސަރުކާރު ނޭވާ ހޮޅިއަށް އެޅެމުންދާތަން ކަމަށާއި ރައީސް ޔާމީނަކީ “ރައީސް އިބްރާހިމް މުހައްމަދު ސޯލިހާއި އެމަނިކުފާނުގެ ބައިވެރިން”ދައްކާ ބިރަށް ގައުމު ދޫކޮށް ފިލަން ވަޑައިގަންނަވާނެ ބޭފުޅެއް ނޫން ކަމަށެވެ. އަދި ރައީސް ސޯލިހަށް އެނގިވަޑައިގަންނަވަންވީ އިންތިޚާބުގައި ވޯޓުލާނީ ބޭރު ރައްޔިތެއް ނޫންކަން ކަމަށެވެ.
ރައީސް ޔާމީން ރިޔާސީ ކޮމިޝަނަށް ހާޒިރުކުރާއިރު މިހާރު ވެސް އެ މަނިކުފާނު ގެންދަވަނީ ފަސް އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ރައީސް ޔާމީން މަރު ކޮމިޝަނަށް ހާޒިރުވާން އަންގައިފައި ވަނީ އަހްމަދު ރިލްވާން ގެއްލުވައިލި މައްސަލައިގެ ތަހުގީގަށެވެ.
