ޚިދުމަތް މެދުކަނޑައިލުމަކީ ނިއުނޯމަލްއަށް ދިޔުމެއް ނޫން: ބޮންޑޭ
މުވައްޒަފަކު ކޮވިޑް-19އަށް ފައްސިވުމުން ޚިދުމަތް މެދުކަނޑައިލުމަކީ ނިއު ނޯމަލްއަކަށް ދިޔުން ނޫންކަމުގައި މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑޭ) ވިދާޅުވެއްޖެއެވެ.
މުއައްޒަފަކު ކޮވިޑް-19 އަށް ފައްސިވެ ހިޔާ ފުލެޓްތަކުގެ ތަޅުދަނޑި ހަވާލުކުރުން މެދުކަނޑައިލުމަށް އިޝާރާތްކޮށް ބޮންޑޭ ކުރެއްވި ޓްވީޓެއްގައި ވިދާޅުވީ މުވައްޒަފަކު ކޮވިޑް-19އަށް ފައްސިވުމުން އަސާސީ ޚިދުމަތް މެދުކަނޑައިލުމަކީ ނިއުނޯމަލްއަށް ގެންދިޔުން ނޫން ކަމަށެވެ.
"ކޮވިޑަށް ޕޮޒިޓިވް ވެގެން ފްލެޓް ހަވާލު ކުރުން މެދުކަނޑައިލުން، ކާޑު ގުދަނުގެ މުއްޒަފަކު ޕޮސިޓިވް ވެގެން ކާޑު ދޫކުރުން ހުއްޓާލުން ފެންކުންފުނި މުއައްޒަފަކު ޕޮސިޓިވް ވެގެން ފެނުގެ ހިދުމަތް މެދުކަނޑާލުމަކީ ރާއްޖެ ނިއުނޯމަލް އަށް ގެނައުމެއް ނޫން" ބޮންޑޭގެ ޓްވީޓްގައި ވިދާޅުވިއެވެ.
ކޮވިޑް-19 ކޮންޓްރޯލްކުރުމަށް ސަރުކާރާއި ކަމާ ބެހޭ ހުރިހާ ފަރާތްތައް ގުޅިގެން ކުރަމުންގެންދާ މަސައްކަތްތަކާ އެކު މިހާރު "ނިއު ނޯމަލް"އަކަށް ރާއްޖޭގެ ހާލަތު ގެނެވިފައިވާ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިއްޔެ ވަނީ ވިދާޅުވެފައެވެ.
ރައީސް ޞޯލިހް މިހެން ވިދާޅުވީ މިހާރު އެންމެ މުހިންމީ ވެކްސިން ޖެހޭ އާބާދީގެ ހުރިހާ ފަރާތްތަކުން ވެކްސިންގެ ދެ ޑޯޒް ފުރިހަމަކުރުން ކަމަށާއި ވެކްސިން ޖެހޭ އާބާދީގެ ހުރިހާ ފަރާތްތަކުން ވެކްސިން ޖަހައި ނިންމުމަށް ބާރު އަޅައި ސަރުކާރުގެ ވުޒާރާތަކާއި އެކި އިދާރާތަކާއި ސަރުކާރު ހިއްސާވާ ކުންފުނިތަކާއި އަދި އަމިއްލަ ކުންފުނިތަކުން ވެސް މަސައްކަތްކޮށްދެއްވުމަށް އެދިވަޑައިގަންނަވާ ކަމަށެވެ.
Ads by STO
