ޕާސްޕޯޓް ދޫކޮށްލުމުން ޖާބިރު އެމެރިކާއަށް!
ކާށިދޫ ދާއިރާގެ މެންބަރު އަބްދުﷲ ޖާބިރުގެ ޕާސްޕޯޓް ހިފަހައްޓައިފައި އޮތުމަށް ފަހު ޕާސްޕޯޓް ދޫކޮށްލުމުން އޭނާ އެމެރިކާއަށް ފުރާ ވަޑައިގެންފިއެވެ.
ޖާބިރުގެ ޕާސްޕޯޓް ސިވިލް ކޯޓުން ހިފަހައްޓައިފައި ވަނީ، އޭނާގެ މުވައްޒިފަކަށް ދޭން ޖެހޭ ފައިސާ ދީފައި ނުވާތީ، ޖާބިރުއާ ދެކޮޅަށް މަައްސަލަ ހުށަހެޅުމުންނެވެ. ޖާބިރު ވިދާޅުވީ މިހާރު އެ ފައިސާ ދައްކައިފައިވާ ކަމަށާއި އެއީ މާ ބޮޑު މައްސަލައެއް ނޫން ކަމަށެވެ.
ޕާސްޕޯޓް ދޫކޮށްލުމާ އެކު އޭނާ ފުރައިވަޑައިގަތީ އެމެރިކާގެ ނިއުޔޯކްއަށް ކަމަށްވެއެވެ. މައުލޫމާތު ލިބިފައިވާ ގޮތުގައި ޖާބިރުގެ ޕާސްޕޯޓް ދޫކޮށްދިނީ ވަކި މުއްދަތަކަށެވެ.
ޖާބިރު ރާއްޖެއިން ބޭރަށް ފުރައިވަޑައިގެންނެވިއިރު، އިއްޔެ އެ މަނިކުފާނު ވަނީ ރައީސް މައުމޫންގެ ގެކޮޅަށް ވަޑައިގެން އެސަރަހައްދުގައި ހުންނަވައި ހިތްހަމަނުޖެހުން ފާޅު ކުރައްވައިފައެވެ. އެގޮތަށް ކަންތައް ކުރައްވައިފައި ވަނީ، އޭނާ އަތުން ރައީސް މައުމޫން ނެންގެވި ކަމަށް ބުނާ 29 މިލިޔަން ރުފިޔާ އަނބުރާ ނުދެއްވުމުން ކަމަށް ޖާބިރު "ދެން"އަށް އިއްޔެ ވަނީ ވިދާޅުވެފައެވެ.
Ads by STO
