ހުޅުމާލޭގައި އަލަށް ހަދާ ކޯވިޑް ފެސިލިޓީގެ މަސައްކަތް އޮކްޓޯބަރުމަހު ނިމޭނެ: އެޗް.ޑީ.ސީ
ކޯވިޑް-19ގެ ބަލި މީހުންނަށް ފަރުވާ ދިނުމަށް ހުޅުމާލޭގައި އަލަށް ހަދާ ކޯވިޑް ފެސިލިޓީގެ މަސައްކަތް އޮކްޓޯބަރުމަހަށް ނިމޭނެކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީން ވިދާޅުވެއްޖެއެވެ.
އެޗް.ޑީ.ސީން ވިދާޅުވީ، މިހާރު ކުރިއަށްދަނީ އިމާރާތުގެ އެތެރޭގައި ކުރަންޖެހޭ ޕާޓިޝަންގެ މަސައްކަތާއި، ފެބްރިކޭޝަންގެ މަސައްކަތާއި، ކުލަލުމާއި ސީލިންގގެ މަސައްކަތްތައްކަމަށެވެ.
އެޗް.ޑީ.ސީން ވިދާޅުވީ އެ ކޯޕަރޭޝަނުން މަސައްކަތްކުރަނީ ވީހާވެސް އަވަހަށް ފެސިލިޓީގެ މަސައްކަތް ނިންމާ، ސަރުކާރާއި ހަވާލުކުރުމަށްކަމަށެވެ. އަދި މި ފެސިލިޓީގެ ގާތްގަނޑަކަށް 41 އިންސައްތަ މަސައްކަތް އެއްކޮށް ނިމިފައިވާކަމަށެވެ. ފެސިލިޓީގެ މަސައްކަތްތައް އެއްކޮށް ނިމޭނެކަމަށް އެޗް.ޑީ.ސީން ލަފާކޮށްފައިވަނީ އަންނަ އޮކްޓޯބަރުމަހަށެވެ.
އެ ފެސިލިޓީގައި ބޭނުންކުރާ އިކުއިޕްމަންޓްތަކަށް ބަލާއިރު ހުޅުމާލޭ މެޑިކަލް ފެސިލިޓީގައި ބޭނުންކުރި ގިނަ އިކުއިޕްމަންޓްތަކެއް އެތަނުގައިވެސް ބޭނުންކުރާނެ ކަމަށާއި އޭގެ އިތުރަށް ބޭނުންވާ ސާމާނު ހޯދުމުގެ މަސައްކަތް މިހާރު ކުރަމުންދާކަމަށް ހެލްތު އިމަރޖެންސީ އޮޕަރޭޝަން ސެންޓަރުގެ ތަރުޖަމާން ޑރ. ފާތުމަތު ނަޒްލާ ރަފީޤު ވަނީ ވިދާޅުވެފައެވެ.
