ފޮތްތަކުގެ ސޮފްޓް ކޮޕީ ވާނީ ފޯރުކޮށްދީފައި، ދަތުުރު ކުރަމުން ދަނީ ޑިޖިޓައިޒް ފޮތްތަކާ ދިމާލަށް: އެޑިއުކޭޝަން
ދިރާސީ އައު އަހަރުގެ ކިޔެވުން ފެށޭއިރު ބައެއް ގްރޭޑްތަކުގެ ފޮތްތަކުގެ ހާޑް ކޮޕީ ލިބިފަައި ނުވި ނަމަވެސް އެ ފޮތްތަކުގެ ސޮފްޓް ކޮޕީ ދަރިވަރުންނަށް ފޯރުކޮށްދީފައިވާ ކަމަށާއި ފޮތްތައް ހަމަނުވި ނަމަވެސް ފިލާވަޅުތައް ނުގެއްލޭނެކަމަށް މިނިސްޓަރ އޮފް އެޑިޔުކޭޝަން ޑރ. އައިޝަތު އަލީ ވިދާޅުވެއްޖެއެވެ.
ސުކޫލުތައް ހުޅުވުމަށް ވަމުންދާ ތައްޔާރީތަކާ ބެހޭ ގޮތުން މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މިނިސްޓަރ ވިދާޅުވީ ފޮތްތައް ގެންނަނީ ރާއްޖޭން ބޭރުން ކަމަށާއި ފޮތްތައް ލިބުން ލަސްވީ ކޮވިޑް-19ގެ ސަބަބުން ދަތުރުފަތުރު ކުރުމަށް ދިމާވި ދަތިތަކެއްގެ ސަބަބުން ކަމަށެވެ.
"އަޅުގަނޑުމެން ކުރިން ޕްލޭން ކުރި ޑެޑްލައިންސްއަށް ކުޑަކޮށް މިއޮތީ ތަފާތު ވެފަ ، އެހެންވީމަ ފޮތްތައް ހާޑު ކޮޕީޒް ފޯރުކޮށްދެވޭނެ ކަމަށް އަޅުގަނޑުމެން މި ބަލަނީ މިމަހުގެ ނިޔަލަށް. ނަމަވެސް އެ ހާޑް ކޮޕީޒް ނުލިބިގެން ދަރިވަރުންނަށް ފިލާވަޅު ނުގެއްލޭނެ ސޮފްޓް ކޮޕީޒް ހުރީމަ. އަޅުގަނޑުމެން ބޮޑަށް ހަމަ ޑިޖިޓައިޒް ފޮތްތަކާ ދިމާލަށް މި ދަތުރު ކުރަނީ އެހެންވީމަ ސޮފްޓް ކޮޕީޒް ހުރިހާ ކުދިންނަށް ފޯރު ކޮށްދެވިފަ ހުންނާނީ ހާޑް ކޮޕީޒް ބޭނުންވާ ފިލާވަޅުތަކަށް ފޮޓޯ ކޮޕީ ނަގާފަ އެ ވެސް އަޅުގަނޑުމެން ހަމަ ފޯރުކޮށްދޭނެ" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިއަހަރު ފޮތްތައް ދޫކުރުން ދެ ގޮތަކަށް ކުރިއަށް ގެންދާނެކަމަށާއި ބައެއް ގްރޭޑްތަކުގެ ދަރިވަރުން އެއްކޮށް ވެސް ކިޔަވާނީ ޑިޖިޓަލައިޒް ފޮތްތަކުން ކަމަށެވެ.
"އަދި ހަމަ ފާހަގަ ކޮށްލާނަން ގުރޭޑް 9އަކާއި 11ގެ ދަރިވަރުން މިފަހަރު ހަމަ މުޅިން ވެސް ކިޔަވާނީ ޑިޖިޓައިޒް ކޮޕީ ބޭނުންކޮށްގެން ފޮތްތަކުން" މިނިސްޓަރ ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ ކިޔަވައިދިނުން ފެށުމަށް ޓަކައި ވާންޖެހޭ އެންމެ ފަހުގެ ތައްޔާރީތައް މިހާރު ވަމުންދާ ކަމަށާއި، ސުކޫލުތަކުގައި ކިޔަވައިދޭނީ ރައްކާތެރިކަމުގެ ފިޔަވަޅުތަކާ އެކުގައި ކަމަށެވެ.
ޢަބަދު ސްކްރީނަށް ނުބަލާށޭ ކިޔާއިރު ފޮތްތައް ޑިޖިޓަލް ކުރީމަ ދެންވާނީ ކިހިނެއް؟