ވެކްސިން ޖަހައިފައިވާ ބެލެނިވެރިންނަށް "ގްރީން ކާޑް" ދެނީ
ވެކްސިން ފުރިހަމަ ނުކުރާ ފަރާތްތަކަށް ސުކޫލުތަކަށް ނުވަދެވޭ ގޮތަށް ހަމަޖެއްސުމާ ގުޅިގެން ވެކްސިން ފުރިހަމަކޮށްފައިވާ ފަރާތްތަކަށް "ގްރީން ކާޑެއް" ދޫކުރުމަށް މަސައްކަތް ކުރަމުންދާކަމަށް އެ މިނިސްޓްރީން ވިދާޅުވެއްޖެއެވެ.
ސުކޫލުތައް ހުޅުވުމަށް ވަމުންދާ ތައްޔާރީތަކާ ބެހޭ ގޮތުން މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެޑިޔުކޭޝަން މިނިސްޓްރީގެ ޑިރެކްޓަރ ޖެނެރަލް ފާތިމަތު އައްޒަ ވިދާޅުވީ އޯގަސްޓު މަސް ނިމޭއިރު ސުކޫލުތަކާ ގުޅިގެން ބެލެނިވެރިންނަށް ވަކި ކާޑެއް ތައާރަފްކުރަން މިހާރު މަސައްކަތް ކުރަމުންދާ ކަމަށެވެ. މިކާޑަކީ ބެލެނިވެރިން ވެކްސިން ފުރިހަމަކޮށްފައިވާކަން ކަށަވަރު ކުރުމަށް ދޫކުރާ ކާޑެއް ކަމަށް ވެސް އައްޒަ ވިދާޅުވިއެވެ.
"އޯގަސްޓު މަސް ނިމޭއިރު ސުކޫލުތަކާ ގުޅިގެން ބެލެނިވެރިންނަށް ވަކި ކާޑެއް ތައާރަފްކުރަން މިހާރު އަޅުގަނޑުމެން މިކިޔަނީ ގްރީން ކާޑޭ އެއަށް އިނގޭތޯ. ދެން އަޅުގަނޑުމެން ބަލާނީ ސުކޫލުތަކުން އެންމެ ފަސޭހަ ގޮތައް އެ ތައާރަފް ކުރެވޭނީ ކިހިނެތްތޯ. އަޅުގަނޑުމެންނަށް ބެލެނިވެރިން ކުދިން ބަލާ އަންނަ އިރު ވެކްސިން ޖަހާފަ ހުރި ކަން ކަށަވަރު ކުރެވޭނެ އެންމެ ރަނގަޅުގޮތެއް ހޯދާފަ އަޅުގަނޑުމެން މިހާރު ސުކޫލުތަކާ އެކީގައި އެ ކާޑު ތައާރަފް ކުރުމުގެ މަސައްކަތް ކުރިއަށް ދާނެ" އައްޒަ ވިދާޅުވިއެވެ.
ދަރިވަރުންގެ ކިޔެވުން މެދުކެނޑުމެއް ނެތި ކުރިއަށް ގެންދިޔުމަށް ޓަކައި ގިނަ މަސައްކަތްތަކެއް އެޑިޔުކޭޝަން މިނިސްޓްރީން ދަނީ ކުރަމުންނެވެ. މިގޮތުން ދަރިވަރުންނަށް ވެކްސިން ދިނުމުގެ ކުރިން ވެކްސިން ދިނުމުގައި ބެލެނިވެރިންގެ އިއުތިރާޒެއް އޮތްތޯ ބެލުމަށް އެޑިއުކޭޝަން މިނިސްޓްރީން ރާއްޖޭގެ ސުކޫލުތަކަށް ވަނީ އަންގައިފައެވެ.
Ads by STO
