ކޯޓުން އެންގި އެންގުމަށް އަމަލު ނުކުރުމުން އަލީ ވަހީދު ދެ މަހަށް ޖަލަށް
ކޯޓަށް ހާޒިރުވާން އެންގި އެންގުމަށް އަމަލު ނުކުރުމުން ކުރީގެ ޓޫރިޒަމް މިނިސްޓަރ އަލީ ވަހީދު ދެ މަހަށް ޖަލަށް ލާން ހުކުމް ކޮށްފިއެވެ.
މިއަދު މެންދުރު 1:00ގައި ސުޕްރީމް ކޯޓުގައި ތާވަލުކޮށްފައި ވަނީ، އަލީ ވަހީދުގެ ޝަރީއަތް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދިއުމަށް ކްރިމިނަލް ކޯޓުން ނިންމި ނިންމުމުގެ އިސްތިއުނާފު މައްސަލައެކެވެ.
ދައުލަތުން އަލީ ވަހީދާ ދެކޮޅަށް އުފުލައިފައިވާ ޖިންސީ ގޯނާއާއި ރޭޕްގެ ދައުވާތަކާ ގުޅިގެން އަލީ ވަހީދުގެ ޝަރީއަތް ކްރިމިނަލް ކޯޓުގައި އޮންލައިންކޮށް ކުރިއަށް ގެންދާތީ އެ ގޮތަށް ޝަރީއަތް ކުރިއަށް ނުގެންދެވޭނެ ކަމަށް ބުނެ ދައުލަތުން އެ މައްސަލަ އެންމެ ފުރަތަމަ އިސްތިއުނާފު ކުރަން ހުށަހެޅީ ހައިކޯޓަށެވެ.
ނަމަވެސް ހައިކޯޓުން އެ މައްސަލަ ބޭރުކޮށްލުމާ ގުޅިގެން ދައުލަތުން އެ މައްސަލަ ހުށަހެޅީ ސުޕްރީމް ކޯޓަށެވެ.
އަދި އެ ކޯޓުން ވަނީ ދައުލަތުގެ އިސްތިއުނާފް އަޑުއެހުމަށް އަލީ ވަހީދު ރާއްޖެ ވަޑައިގަތުމަށް އަންގައި، މި ދިޔަ މަހުގެ 15ވަނަ ދުވަހު އޭނާއަށް ޗިޓް ފޮނުވައިފައެވެ. ނަމަވެސް މިއަދުގެ ޝަރީއަތަށް އަލީ ވަހީދު ހާޒިރުވެފައި ނުވާތީ، ސުޕްރީމް ކޯޓުން ނިންމީ އޭނާ ވަނީ ކޯޓުގެ ހުރުމަތް ކަނޑައިލައިފައި ކަމަށާއި އެހެންކަމުން ދެ މަހަށް ޖަލަށް ލުމަށެވެ.
މިވަގުތު ރާއްޖޭން ބޭރުގައި ހުންނެވި އަލީ ވަހީދުގެ ޝަރީއަތް އޮންލައިންކޮށް ކުރިއަށް ގެންދަން ދައުލަތުން ދެކޮޅު ހަދައިފައި ވަނީ ރާއްޖޭގެ ގާނޫނު ނުހިނގާ ތަނެއްގައި ހުރެގެން ޝަރީއަތް ކުރުމުގެ ފުރުސަތު ނުދެވޭނެ ކަމަށް ބުނެއެވެ.
Ads by STO
