މޯލްޑިވިއަން ހިންގަން ބޭރުގެ ކުންފުންޏަކާ އެކު ޖޮއިންޓް ވެންޗާއެއް ހެދުމަށް ދަނީ މަޝްވަރާ ކުރަމުން: ރައީސް ޞާލިޙް
ޤައުމީ އެއާލައިން "މޯލްޑިވިއަން" ހިންގުމަށް ބޭރުގެ ކުންފުންޏަކާ އެކު ޖޮއިންޓް ވެންޗާއެއް ހެދުމަށް މަޝްވަރާ ކުރަމުންދާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ރައީސް އޮފީހުގައި މިވަގުތު ކުރިއަށްދާ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ޞާލިޙް ވިދާޅުވީ މޯލްޑިވިއަން ބަނގުރޫޓު ވިޔަނުދޭނެ ކަމަށާއި ކުންފުނި ހިންގުމަށް ކުރަންޖެހޭ ކަންކަން ކުރައްވާނެ ކަމަށެވެ.
"ގައުމީ އެއާލައިން ރަނގަޅު ކުރުމަށް ޓަކައި ބޭރުގެ ފަރާތްތަކާ ވެސް އަޅުގަނޑުމެން ވާހަކަދައްކަމުން އެބަ ގެންދަން، ޖޮއިންޓް ވެންޗާ ހަދަން. ކޮންމެއަކަސް ރާއްޖޭގައި ގައުމީ އެއާލައިނެއް އޮންނަން ޖެހޭނެކަމަށް އަޅުގަނޑު ގަބޫލުކުރަން،" ރައީސް ޞާލިޙް ވިދާޅުވިއެވެ.
މީގެ އިތުރުން ރައީސް ޞާލިޙް ވިދާޅުވީ މޯލްޑިވިއަންގެ ސަބަބުން ނުސީދާ ގޮތުން ލިބޭ އެތައް ފައިދާތަކެއް ހުރި ކަމަށެވެ. އެ ގޮތުން ސަރުކާރުން ސަބްސިޑައިޒްކޮށްގެން ވެސް މޯލްޑިވިއަންގެ ދަތުރުފަތުރުގެ ހިދުމަތް ކުރިޔަށް ގެންދާނެކަމަށް ވެސް ރައީސް ވިދާޅުވިއެވެ.
ރައީސް ޞާލިޙް ވިދާޅުވީ މޯލްޑިވިއަންއަކީ މީގެ ކުރިން ވެސް ގެއްލުމުގައި ހިންގަމުން އައި ކުންފުންޏެއް ކަމަށާއި މި ވޭތުވެ ދިޔަ އަހަރުތަކުގެ ތެރޭގައި ވެސް އަދި ކޮވިޑްގެ ހާލަތާ އެކު ވެސް ކުންފުނީގެ މާލީ ހާލަތަށް އެއްވެސް ހެޔޮ އަސަރެއް ކޮށްފައި ނުވާ ކަމަށެވެ.
