ވެމްކޯގެ ވާހަކަތައް މުޢިއްޒު ދޮގުކުރައްވައިފި
މާލެ ސަރަހައްދުގެ މަގުތަކަށް ކުނި ނުނެރެ، ވެމްކޯގެ މުވައްޒިފުން ގޭގެއަށް ވަދެ ކުނި ނެގުމަށް ނުނިންމާކަމަށް ވެމްކޯއިން ހާމަ ކުރެއްވުމުން، ވެމްކޯއަށް މާލޭ މޭޔަރު ޑރ.މުޙައްމަދު މުއިއްޒު ރައްދު ދެއްވައިފިއެވެ.
މުޢިއްޒު ކުރެއްވި ޓްވީޓެއްގައި ވިދާޅުވީ މާލެ ސިޓީ ކައުންސިލާއި ވެމްކޯއާ ދެމެދު ކުނި ނެގުމުގެ ކަންކަން ބަދަލު ކުރުމާ ގުޅޭގޮތުން މަޝްވަރާ ކޮށްފައިވާއިރު ދޮގު ބަޔާންތައް ނެރުމަކީ ވަރަށް ޒިންމާދާރުކަން ކުޑަކަމެއް ކަމަށެވެ. އަދި ސިޓީ ކައުންސިލާއި ވެމްކޯއާ ދެމެދު މަޝްވަރާ ކޮށްފައިވާ ގޮތުގެ މަތިން ޢަމަލު ކުރައްވާނެ ކަމަށް އުންމީދު ކުރައްވާ ކަމަށް ވެސް މުޢިއްޒު ވިދާޅުވިއެވެ.
މީގެ އިތުރުން މުޢިއްޒު ވަނީ ކޮންމެ މަހަކު ވެމްކޯއަށް ކައުންސިލުން ކުރަން ޖެހޭ ޚަރަދުގެ ތަފްސީލް ވެސް ހާމަ ކުރައްވައިފައެވެ. މުޢިއްޒު ވިދާޅުވީ ކައުންސިލާއި ވެމްކޯއާ ދެމެދު ވެފައިވާ އެއްބަސްވުމާ އެއްގޮތަށް މާލޭގެ ކުނި ނެގުމާއި މެނޭޖްކުރުން ކުރިޔަށް ނުގެންދާކަމަށެވެ. އަދި އެކަމަކީ ސިޓީ ކައުންސިލުން އިސްލާޙުކުރަވަން މަސައްކަތް ކުރާނެކަމެއްކަމަށް ވެސް މުޢިއްޒު ވިދާޅުވިއެވެ.
ވެމްކޯއިން އިއްޔެ ނެރުނު ނޫސް ބަޔާނެއްގައި ވިދާޅުވެފައި ވަނީ ކޮވިޑް-19އިން ރައްކާތެރިވުމަށް ޓަކައި އެޅުނު ޙާއްސަ ފިޔަވަޅެއްގެ ގޮތުން 2020، އޭޕްރިލް 16އިން ފެށިގެން އެ ކޯޕަރޭޝަނުން މާލެ ސަރަހައްދުގެ ގޭބިސީތަކުން ކުނި ނެގުމަށް އުސޫލެއް ޢާންމުކޮށް، އެއަށް އަމަލުކުރަމުންދާ ކަމަށެވެ. އަދި ނޫސް މަޖައްލާތަކުގައި ދައުރުވަމުންދާ އެ ކޯޕަރޭޝަނުން ކުނި ނެގުމުގެ އުސޫލަށް ބަދަލުގެނެވިފައިވާ ވާހަކައަކީ ސައްޙަ މަޢުލޫމާތެއް ނޫން ކަމަށާއި މާލެ ސަރަހައްދުގެ އާންމު ހާލަތު ރަނގަޅުވަމުން ދިޔުމާ ގުޅިގެން އެ ކޯޕަރޭޝަނުން ގޭބިސީތަކަށް ފޯރުކޮށްދެމުންދާ ހިދުމަތްތަކަށް ބަދަލު ގެނައުމަށް އެޗް.ޕީ.އޭއާއި ސަރުކާރުގެ ކަމާ ބެހޭ އިދާރާތަކާ މަޝްވަރާކޮށް ގޮތެއް ނިންމުމަށް ފަހު އެކަން އިއުލާނު ކުރާނެކަމަށް ވެމްކޯއިން ވިދާޅުވިއެވެ.
Ads by STO
