ރައީސް ނަޝީދު ބޭރު ޤައުމެއްގައި ހުންނަވާތީ ކަންބޮޑުވޭ، އެ މަނިކުފާނުގެ އިތުބާރު ނެތް ކަމުގެ ވޯޓެއް ނަގަން އެބަ އުޅޭ: ސަޢީދު
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ ވޯޓެއް ނަގަން، މަޖިލީހުގެ ތެރެއިން މަސައްކަތް ކުރައްވާ ކަމަށް މާވަށު ދާއިރާގެ މެންބަރު މުޙައްމަދު ސަޢީދު ވިދާޅުވެއްޖެއެވެ.
ރައީސް ނަޝީދު މަޖިލީހަށް އިއްޔެ ފޮނުވި ސިޓީއެއްގައި ވިދާޅުވީ، ފުރިހަމަ ރައްކާތެރިކަން އޮތްކަން ޔަޤީން ނުވުމާ ގުޅިގެން މަޖިލީހަށް ހާޒިރުވާން އުޒުރުވެރިވާ ކަމަށެވެ. މިއަދުގެ ޖަލްސާގައި އެމްޑީޕީގެ ބައެއް މެންބަރުން ވެސް ވަނީ ރައީސް ނަޝީދަށް ޖާނުން ފިދާވުމުގެ ހަމަލާއެއް ދީފާނެކަމުގެ އިންޒާރު ދެމުން އަންނަ ކަމަށް ބުނެފައެވެ.
ޖަނަވާރުންގެ ސިއްހަތާ ބެހޭ ބިލްގެ ބަހުސްގައި މިއަދު ވާހަކަދައްކަވަމުން ސައީދު ވިދާޅުވީ، ރައީސް ނަޝީދު ރާއްޖެ އަންނަން ޖެހިލުންވުމަކީ ކަންބޮޑުވާން ޖެހޭ މައްސަލައެއް ކަމަށެވެ. އަދި އެކަން ބަލަން ޖެހޭ ކަމަށާއި ރާއްޖޭގެ ތިން ބާރުގެ ވެރިން ރާއްޖެއިން ބޭރުގައި ތިބެގެން ޤައުމު ނުހިންގޭނެ ކަމަށެވެ. އަދި ފޮރިން މިނިސްޓަރު އެހެން ގައުމެއްގައި ހުންނެވުމަކީ ބޮޑު މައްސަލައެއް ކަމަށާއި އެކަމަށް ސަރުކާރުން ޖަވާބު ދާރީވާން ޖެހޭ ކަމަށް ވެސް ސަޢީދު ވިދާޅުވިއެވެ.
"ދިވެހިރާއްޖޭގެ ތިން ބާރުގެ ވެރިން ހުވާ ކުރުމަށް ފަހު ރާއްޖެއިން ބޭރުގައި ތިބެން ވެއްޖިއްޔާ، މިއީ ކޮންކަހަލަ ދައުލަތެއްތޯ" ސަޢީދު ވިދާޅުވިއެވެ.
ސަޢީދު ވިދާޅުވީ، ރައީސް ނަޝީދުގެ އިތުބާރު ނެތް ކަމުގެ މައްސަލަ ހުށަހަޅަން މަޖިލީހުގެ ތެރެއިން މަސައްކަތް ކުރާ ކަމަށެވެ. އެހެން ނަމަވެސް މިކަމުގެ އިތުރު ތަފްސީލެއް ދެއްވައިފައެއް ނުވެއެވެ.
ރައީސް ނަޝީދުގެ އިތުބާރު ނެތްކަމުގެ ވޯޓެއް ނަގަން އުޅޭ ކަމަށް ތުހުމަތު ކުރެއްވިއިރު، ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ރައީސް ޞާލިޙް ވަނީ އެމަނިކުފާނުގެ އަތްޕުޅުގައި މަޖިލީހުގެ މެޖޯރިޓީ އޮތްކަމަށް ވިދާޅުވެފައެވެ.
