މިވަގުތު މޮނިޓަރިންގައި އެންމެ ގިނަ ދުވަސްވީ ދުވާފަރު، ހަރަކާތްތެރި 118ވޭދަނަ!
ކޮވިޑް-19 ވޭދަނަ އެއްފެނި މޮނިޓަރިންއަށް ލައިފައިވާ ރ. ދުވާފަރުގައި މި ވަގުތު ވެސް ހަރަކާތްތެރި 118 ވޭދަނަ އެބައޮތްކަމަށް އެރަށު ސިއްހީމަރުކަޒުން ބުނެފިއެވެ.
"ދެން"އަށް މައުލޫމާތު ދެއްވަމުން ދުވާފަރު ސިއްހީ މަރުކަޒުގެ ސީނިއާ އެޑްމިން އޮފިސަރ އާމިރު އަހުމަދު ވިދާޅުވީ އެރަށުގައި މިވަގުތު ހަރަކާތްތެރި ވޭދަނައިގެ ގޮތުގައި 118 ވޭދަނަ ރިޕޯޓްކޮށްފައި ވާކަމަށެވެ.
"އިއްޔެ އެއްވެސް ނަތީޖާއެއް ނުލިބޭ. އެހެންވެސް 124 އެބައިން ނަތީޖާ ނުލިބި މިވަގުތު. މިވަގުތު 118 މީހުންނަށް ބަލިޖެހިފައި ތިބި އިރު ޖުމްލަ 802 މީހަކަށް މިހާތަނަށް ވަނީ ބަލި ޖެހިފައި" އާމިރު ވިދާޅުވިއެވެ.
އާމިރު ވިދާޅުވީ ދުވާފަރުގެ ކޮވިޑް-19 ގެ ވޭދަނަތަކާ ގުޅިގެން އިއުލާނުކޮށްފައިވާ ކާފިއުގެ ވަގުތު އިތުރުކޮށްފައިވާ ކަމަށާއި މިހާރު ހަވީރު 4 ފަތިހު 4އަށް ކާފިއު އިއުލާނުކޮށްފައިވާ ކަމަށެވެ. އަދި ހަމަ އެެންމެ ރަށުތެރޭގެ ހާލަތު މިވަގުތު އޮތްގޮތުން ރަށް މޮނިޓަރިންއިން އަވަހަށް ނެގުމަށް އޮތީ ދެގޮތެއް ކަމަށާއި އެގޮތުން ވެސް އެންމެ އަވަހަށް ނެގޭނީ މިވަގުތު ރަށުގައި އަޅައިފައިވާ ފިޔަވަޅުތަކަށް އަވަހަށް ބޯލެނބުމަށް އިލްތިމާސް ކުރައްވާ ކަމަށެވެ.
"މި ވަގުތު ރަށުގައި އަޅައިފައިވާ ފިޔަވަޅުތަކާ އެކު ކުރިއަށް އޮތް 14 ދުވަސްތެރޭ ރަށް މޮނިޓަރިންއިން ނެގިދާނެކަމަށް އުއްމީދު ކުރަން. އެހެންވީމަ އަޅުގަނޑު އިލްތިމާސް ކުރަން ފިޔަވަޅުތަކަށް ބޯލަނބަން. ކަރަންޓީނު ވުމުގައި ވެސް އެއްބާރުލުން ދޭން ވެސް ވަރަށް ބޮޑަށް އެދެން. އެކަހެރިވެލަން އެދެނީ ކަމެއް އޮތީމައި ތިމާއާއި އެންމެންގެ ރައްކާތެރިކަމަށް." އާމިރު ވިދާޅުވިއެވެ
އާމިރު ވިދާޅުވީ މިހާ ގިނަދުވަހު ރަށް މޮނިޓަރިންގައި އޮތުމަކީ ހުރިހާ މީހުންނަށް ވެސް ވަރަށް ބޮޑެތި ދަތިތަކާއި ކުރިމަތިލާން ޖެހިފައިވާއިރު މޮނިޓަރިންއިން ނެގުމަށް އާބާދީގެ 60 އިންސައްތައަށް ވެކްސިން ޖެހުމަށް މަހެއްހާ ދުވަސް ބޭނުން ބޭނުންވާނެ ކަމަށާއި އެންމެއަވަހަށް މޮނިޓަރިން އިން ނެގުމަށް ހުރިހާ ރައްޔިތުން ވެސް އެއްބާރުލުން ދިނުމަށް އިލްތިމާސް ކުރައްވާކަމަށެވެ.
