ވެކްސިން ނުޖަހާ މީހުން ދަތުރު ކުރުން މަނާ ކުރަނީ!

ކޮވިޑް-19އިން ދިފާއުވުމަށް ވެކްސިން ޖަހައިފައިވޭތޯ ކަށަވަރުކޮށްފައި ނޫނީ ދަތުރުކުރުމަށް ފުރުސަތު ނުދިނުމަށް ޓްރާންސްޕޯޓް މިނިސްޓްރީން އަންގައިފިއެވެ.

Ads by STELCO

ޓްރާންސްޕޯޓް މިނިސްޓްރީން ވަނީ އެއްގަމާއި ކަނޑާއި ވައިގެ ދަތުރުފަތުރާ ގުޅޭ ޢާންމު ޚިދުމަތްދޭ ފަރާތްތަކުން، ކޯވިޑުގެ ވެކްސިން ޑޯޒްތައް ފުރިހަމަ ނުކުރާ ފަރާތްތަކަށް ޚިދުމަތްދިނުމާ ގުޅޭ އުސޫލެއް އެކުލަވައިލައިފައެވެ.

އެގޮތުން، އެއްގަމާއި ކަނޑުދަތުރު ކުރުމުގެ ޚިދުމަތް ފޯރުކޮށްދޭ ފަރާތްތަކުންނާއި، އަދި ޑޮމެސްޓިކް ވައިގެދަތުރު ކުރުމުގެ ޚިދުމަތް ފޯރުކޮށްދޭ ފަރާތްތަކުން ވެސް އެޗް.ޕީ.އޭގެ ގައިޑްލައިންގައި ޝަރުތު ކޮށްފައިވާ ކަންކަން ކަށަވަރު ކުރުމަށްފަހު މެނުވީ ޚިދުމަތް ނުދިނުމަށް ޓްރާންސްޕޯޓް މިނިސްޓްރީން ވަނީ އަންގައިފައެވެ.

އަންނަ މަހުގެ 1 ވަނަ ދުވަހުން ފެށިގެން ވެކްސިން ޖެހުމަށް ޝަރުޠުހަމަވެ، ވެކްސިންގެ އެއްވެސް ޑޯޒްއެއް ފުރިހަމަކޮށްފައި ނުވާ ފަރާތްތަކާ މެދު، ދަތުރުފަތުރުގެ ޚިދުމަތް ފޯރުކޮށްދޭ ފަރާތްތަކުން ޚާއްޞަ ސަމާލުކަމެއް ދިނުމަށް ވެސް ޓްރާންސްޕޯޓް މިނިސްޓްރީން އަންގައިފައިވެއެވެ.

މީގެ އިތުރުން ރައްޔިތުންނާ ގާތުން ދޭންޖެހޭ ޓެކްސީގެ ޚިދުމަތްތައް ދޭފަރާތްތަކުން ވެސް ޚިދުމަތް ދޭންވާނީ ކަސްޓަމަރަކީ ވެކްސިން ޖަހައިފައިވާ މީހެއްކަން ކަށަވަރު ކުރުމަށްފަހުގައިކަމަށް ވަނީ ވިދާޅުވެފައެވެ.

ޓްރާންސްޕޯޓް މިނިސްޓްރީން ވިދާޅުވީ މިގޮތައް އަމަލުކުރަން ނިންމީ ވެކްސިން ޖެހުމަށް ޝަރުތު ހަމަވާފަރާތްތަކުން ވެކްސިން ފުރިހަމަކުރުމަށް ބާރު އެޅުމުގެ ގޮތުން ކަމަށެވެ.