ހިފެހެއްޓީ މާ ކުރިން ކެންސަލު ކޮށްފައި އޮތް އަލީވަހީދުގެ ޕާސްޕޯޓެއް!
ޖިންސީ ގޯނާ ކުރިކަމުގެ ދައުވާ އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ހިފަހައްޓައިފައި ވަނީ، މާ ކުރިން ވެސް ކެންސަލު ކޮށްފައިވާ ޕާސްޕޯޓެއްކަން ހާމަވެއްޖެއެވެ.
ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާއާއި ރޭޕް ކުރި ކަމުގެ ދައުވާތަކެއް އުފުލިފައި ވަނިކޮށް އަލީ ވަހީދު މިދިޔަ ފެބްރުއަރީ މަހު ރާއްޖެއިން ބޭރަށް ވަޑައިގަތީ، އޭނާގެ ޕާސްޕޯޓް ހިފަހައްޓާފައި ވަނިކޮށް ޕާސްޕޯޓް ހިފެހެއްޓުމުގެ އަމުރު ކްރިމިިނަލް ކޯޓުން ބާތިލު ކުރުމުންނެވެ. އޭރު ދައުލަތުން ބުނަމުން ދިޔައީ އަލީ ވަހީދުގެ ޕާސްޕޯޓް ކޯޓުން ދޫކުރީ ޑޮކްޓަރުންގެ ލަފައަށް ބިނާކޮށް ކަމަށެވެ.
ނަމަވެސް ޕާސްޕޯޓު މައްސަލައިގައި ހައިކޯޓުން އިއްޔެ ކުރި ހުކުމުން ހާމަވެފައި ވަނީ، އަލީ ވަހީދުގެ ހިފެހެއްޓީ މާ ކުރިން ވެސް ކެންސަލު ކޮށްފައިވާ ޕާސްޕޯޓެއް ކަމަށެވެ.
ހާމަވެފައިވާ ގޮތުގައި އެއިރު ހިފަހައްޓައިފައި ވަނީ ޓޫރިޒަމް މިނިސްޓަރު ކަމުގައި އަލީ ވަހީދު ހުންނެވިއިރު، އޭނާއަށް ދޫކޮށްފައި އޮތް ޑިޕްލޮމެޓިކް ޕާސްޕޯޓެވެ. އެކަމަކު އެއީ މިދިޔަ އަހަރުގެ އޮގަސްޓް މަހު ކެންސަލް ކޮށްފައިވާ ޕާސްޕޯޓެއް ކަމަށް ހައި ކޯޓުގެ ހުކުމުގައި ވެއެވެ.
އަލީ ވަހީދު ރާއްޖެއިން ބޭރަށް ފުރައިވަޑައިގަތީ އަމިއްލަ ޕާސްޕޯޓުގައި ކަމަށް ވާތީ އޭނާ އެއްވެސް އިރަކު ފުރުން މަނާކޮށްފައި ނެތް ކަމަށް ހައިކޯޓުގެ ހުކުމުގައިވެއެވެ.
"އަލީ ވަހީދު ދިވެހިރާއްޖެ ދޫކޮށް ދިޔައީ އޭނާއަށް ދޫކޮށްފައިވާ އޯޑިނަރީ ޕާސްޕޯޓްގައެވެ. މި އޯޑިނަރީ ޕާސްޕޯޓަކީ އެއްވެސް އިރެއްގައި ހިފަހައްޓައިފައިވާ އަދި ހިފެހެއްޓުމަށް އެދިފައިވާ ޕާސްޕޯޓެއް ވެސް ނޫނެވެ. އެހެންވެ، އަލީ ވަހީދު ރާއްޖެ ދޫކޮށް ފުރައިގެން ދިޔައީ ކްރިމިނަލް ކޯޓުން އަލީ ވަހީދުގެ ޕާސްޕޯޓް ދޫކޮށްލުމުން ކަމަށް ބުރަވާން ޖެހޭ ސަބަބެއް ނެތެވެ." ހައި ކޯޓުގެ ހުކުމުގައިވެއެވެ.
މީގެ އިތުރުން ހައިކޯޓުގެ ހުކުމުގައި ބުނެފައި ވަނީ ދައުލަތުގެ ވެރިންގެ ހައިސިއްޔަތުން ދޫކުރާ ޑިޕްލޮމެޓިކް ޕާސްޕޯޓްތަކަކާއި އާންމުންނަށް ދޫކުރާ އޯޑިނަރީ ޕާސްޕޯޓްތައް އެއް ވަގުތެއްގައި ބޭނުން ކުރުމުގެ ފުރުސަތު ނޯންނައިރު، އަލީ ވަހީދުގެ ޕާސްޕޯޓް ހިފަހައްޓަން އެދުމުގެ ކުރިން އޭނާ ގެންގުޅުއްވީ ކޮން ޕާސްޕޯޓެއްކަން ދައުލަތުން ބަލައިފައި ނުވާ ކަމަށެވެ.
