މިރޭ 9 ޖަހާއިރު އަލީ ވަހީދުގެ ނޫސްވެރިންނާ ބައްދަލު ކުރަނީ
ކުރީގެ ޓޫރިޒަމް މިނިސްޓަރ އަލީ ވަހީދު މިރޭ 9 ޖަހާއިރު ނޫސްވެރިންނާ ބައްދަލު ކުރަން ނިންމައިފިއެވެ.
އަލީ ވަހީދު ވަނީ ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމަށް ތުހުމަތު ކުރެވޭ މައްސަލައެއްގައި ދައުވާ އުފުލައިފައި ވަނިކޮށް، ބޭސްފަރުވާއަށް އިނގިރޭސި ވިލާތަށް ވަޑައިގެންނެވި ގޮތަށް، ރާއްޖެ ވަޑައިނުގެން އެ ގައުމުގައި މަޑު ކުރައްވައިފައެވެ. އަދި ވިސާގެ މައްސަލައެއްގައި އޭނާ ވަނީ ދާދި ފަހުން އެޤައުމުގެ ފުލުހުންގެ ބެލުމުގެ ދަށަށް ވެސް ގެންގޮސްފައެވެ.
ދެންމެ އަލީ ވަހީދު ކުރެއްވި ޓްވީޓެއްގައި ވިދާޅުވީ، މިރޭ 9 ޖަހާއިރު ނޫސްވެރިންނާ ބައްދަލު ކުރަން ނިންމަވައިފައިވާ ކަމަށާއި މިރޭގެ ނޫސްވެރިންގެ ބައްދަލުވުމުގައި އޭނާ ފްރޭމް ކުރި ގޮތާއި ޕީޖީއާއި އެމް.އެމް.ޕީއާރު.ސީގެ ޚިޔާނާތާ ގުޅޭ މައުލޫމާތުތައް ހާމަކުރައްވާނެ ކަމަށެވެ.
"އިރާދަފުޅުން މިރޭ ރާއްޖެ ގަޑިން 9 ޖަހާއިރު އަޅުގަނޑު ނިއުސް ކޮންފަރެންސެއް ބާއްވާނަން. މިރޭގެ ނިއުސް ކޮންފަރެންސްގައި އަޅުގަނޑު ފްރޭމްކޮށް އަޒުލުކުރި ގޮތާއި، ރައީސް ޔާމީން ޖަލަށްލާން ނިންމި ނިންމުމާއި، ޕީޖީއާ އެމް.އެމް.ޕީ.އާރު.ސީގެ ޚިޔާނާތާ އޮތް ގުޅުމާއި އުތުރު ތިލަފަޅު ހިމެނޭ" އަލީ ވަހީދު ވިދާޅުވިއެވެ.
އިނގިރޭސި ވިލާތުގައި ހުންނަވައިގެން މީގެ ކުރިން ވެސް އަލީ ވަހީދު ވަނީ ނޫސްވެރިންނާ ބައްދަލު ކުރައްވަން މަސައްކަތް ކުރައްވައިފައެވެ. އެފަހަރު ވިސާގެ މައްސަލައެއް ޖެހިގެން އަލީ ވަހީދު ފުލުހުންގެ ބެލުމުގެ ދަށަށް ގެންދިޔައީއެވެ. އަލީ ވަހީދު އޭރު ވިދާޅުވީ، އޭނާ ހައްޔަރު ކުރީ، ދައުލަތް "އޮރިޔާން" ކޮށްލަން އުޅުމުން ކަމަށެވެ. ބެލެވޭ ގޮތުގައި މިރޭގެ ނޫސްވެރިންގެ ބައްދަލުވުމުގައި އަލީ ވަހީދު ސަރުކާރުގެ ގިނަ ސިއްރުތަކެއް ހާމަކުރައްވާނެއެވެ.
