އިތުރަށް ޖަމާކުރެވުނު މުސާރަ އަނބުރާ ނުދިން 32 މީހެއްގެ މުސާރައިން އެބައި ކަނޑަނީ
ނިމިދިޔަ އޯގަސްޓު މަހުގެ މުސާރަ ދިންއިރު ސިއްހީ ދާއިރާގައި މަސައްކަތް ކުރާ މީހުންނަށް އިތުރަށް ދެވުނު މުސާރަ ހޯދުމަށް ކުރި މަސައްކަތުން މިހާތަނަށް 32 މުވައްޒަފެއްގެ އަތުން އަނބުރާ ފައިސާ ނުލިބޭތީ އެމީހުންގެ މުސާރައިން ކަނޑައިގެން އެ ބައި ހޯދުމަށް ފިނޭންސް މިނިސްޓްރީން ނިންމައިފިއެވެ.
މިދިޔަ މަހުގެ މުސާރަ ޖަމާކުރިއިރު، މުސާރަ ޝީޓުގެ އަދަދުތައް އިސްފަސްވެގެން ބައެއް މީހުންނަށް މަދުން އަދި ބައެއް މީހުންނަށް އިތުރަށް މުސާރަ ޖަމާވިކަމަށް ފިނޭންސުން ކުރިން ވަނީ ބުނެފައެވެ. އެގޮތުން އިތުރަށް ޖަމާވި ބައެއް މުވައްޒަފުންނަށް 70،000ރ. ވެސް ޖަމާކޮށްފައިވެއެވެ.
އެނގިފައިވާ ގޮތުގައި މުސާރައިގެ ގޮތުގައި އިތުރަށް ފައިސާ ޖަމާވީ 1،796 މީހަކަށެވެ. އޭގެ ތެރެއިން އެ ފައިސާ އަނބުރާ ނުދައްކާ މިހާރު ތިބީ 32 މީހުންނެވެ.
ފިނޭންސުން މައުލޫމާތު ދީފައިވާ ގޮތުގައި މުސާރަ މަދުން ޖަމާވި 34 މުވައްޒަފުންނަށް މިހާރު އެ ފައިސާ އަނބުރާ ޖަމާކޮށް ނިމިއްޖެ ކަމަށް ވެސް ފިނޭންސުން ވަނީ ބުނެފައެވެ.
