ސާފް ޗެމްޕިއަންޝިޕްގެ ޓައިޓްލް ސްޕޮންސަރަކަށް އުރީދޫ
ދެކުނު އޭޝިއާ ސަރަޙައްދުގެ އެންމެ ބޮޑު ފުޓުބޯޅަ މުބާރާތް ކަމުގައިވާ ސާފް ޗެމްޕިއަންޝިޕްގެ ޓައިޓްލް ސްޕޮންސަރަކަށް، އުރީދޫ މޯލްޑިވްސް ހަމަޖައްސައިފިއެވެ.
އަންނަ އޮކްޓޯބަރު މަހުގެ ފުރަތަމަ ދުވަހު މާލޭގައި ފަށާ ސާފް ޗެމްޕިއަންޝިޕް ކުރިއަށް ދާނީ އެ މަހުގެ ސޯޅަވަނަ ދުވަހުގެ ނިޔަލަށެވެ. މިފަހަރުގެ މި މުބާރާތުގައި ވާދަކުރަނީ ރާއްޖެ ހިމެނޭ ގޮތުން ފަސް ގައުމެކެވެ. އެއީ ދިވެހިރާއްޖެ އިންޑިޔާ، ސްރީލަންކާ، ބަންގްލަދޭޝް އަދި ނޭޕާލެވެ.
މި ފަހަރުގެ ސާފް ޗެމްޕިއަންޝިޕް މުބާރާތުގައި ބޫޓާންއާއި ޕާކިސްތާން ވާދައެއް ނުކުރެއެވެ.
މި މުބާރާތުގެ ޓައިޓަލް ސްޕޮންސަރ އުރީދޫން ވިދާޅުވެފައި ވަނީ މި މުބާރާތް ކުލަގަދަކޮށް ގެންދިޔުމަށް ޓަކައި ކުރެއްވެން ހުރި ހުރިހައި މަސައްކަތެއް ކުރައްވާނެ ކަމަށެވެ.
"ފުޓުބޯޅައަކީ އަޅުގަނޑުމެން ދިވެހިންގެ ލެޔާއި ގުޅިފައިވާ ކުޅިވަރެއް. ހަމަ އެހެންމެ އުރީދޫއާ ވެސް ވަރަށް ގާތް ކުޅިވަރެއް. މިއަހަރުގެ ސާފް ޗެމްޕިއަންޝިޕް ރާއްޖޭގައި ބާއްވަން ހަމަޖެހިފައިވުމީ އަޅުގަނޑުމެން އެންމެން ވެސް ވަރަށް ފަޚުރުވެރިވާކަމެއް. ގައުމީ ފޯރީގައި ބައިވެރިވެ، ސާފް ޗެމްޕިއަންޝިޕްގެ ޓައިޓަލް ސްޕޮންސަރގެ ގޮތުގައި، ފޯރިއާ އެކު ކުލަގަދަކޮށް މި މުބާރާތް ގެންދިޔުމަށް ކުރެވެން ހުރި ހުރިހާކަމެއް ކުރުމަށް އަޅުގަނޑުމެން މިތިބީ އަތުކުރި އޮޅައިލައިގެން" އުރީދޫ މޯލްޑިވްސްގެ ޗީފް ކޮމަރޝަލް އޮފިސަރ ހުސެން ނިޔާޒް ވިދާޅުވެފައިވެއެވެ.
ސާފުގެ ޓައިޓްލް ސްޕޮންސަރު އުރީދޫ މޯލްޑިވްސްއަކީ ރާއްޖޭގެ ކުޅިވަރުގެ އެކިއެކި ހަރަކާތްތަކަށް އަބަދުވެސް ބޮޑު ހޭދައެއް ކުރަމުން އަންނަ ކުންފުންޏެކެވެ.
ސާފް ޗެމްޕިއަންޝިޕުގައި ރާއްޖެ ކުޅޭ ފުރަތަމަ މެޗު އޮންނާނީ އަންނަ މަހުގެ އެއްވަނަ ދުވަހުގެ ރެއެވެ. އެރޭ ރާއްޖޭން ނުކުންނާނީ ނޭޕާލާ ދެކޮޅަށެވެ.
Ads by STO
