މުޖާޒާއި ތަހުމީނު އިންކާރު ކުރުމުން ދައުލަތުން 200 އެއްހާ ހެކި ހުށަހަޅައިފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ މެއި ހަވަނަ ދުވަހުގެ ރޭ ދިން ބޮމުގެ ހަމަލާއާ ގުޅިގެން ދައުވާކޮށްފައިވާ ތަހުމީން އަހުމަދާއި މުޖާޒު އަހުމަދުގެ މައްޗަށް ދައުލަތުން އުފުލައިފައިވާ ދައުވާތަކަށް އެ ދެ މީހުން މިއަދު އިންކާރު ކުރުމާ ގުޅިގެން ދަޢުލަތުން 200އެއްހައި ހެކި ހުށަހަޅައިފިއެެވެ.
ރައީސް ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ދައުލަތުން ވަނީ ހަތް މީހެއްގެ މައްޗަށް ދައުވާ އުފުލައިފައެވެ. އެ ހަ މީހުންގެ ތެރެއިން ތަހުމީނަށް ހަތަރު ދައުވާއެއް އުފުލައިފައިވެއެވެ. އެއީ ޓެރަރިޒަމް އަމަލެއް ކުރުމުގައި ބައިވެރިވުން، ޓެރަރިޒަމް އަމަލެއް ކުރުމަށް ރޭވުން، ގޮވާ ތަކެތި އެހެން ތަންތަނަށް ގެންދިޔުމަށް އެހީތެރިވެދިނުން، އަދި ޓެރަރިސްޓު ޖަމާއަތަކަށް ތާއީދުކުރުމެވެ. މުޖާޒުއަށް ކޮށްފައިވާ ދަޢުވާތަކުގެ ތެރޭގައި ޓެރަރިޒަމް އަމަލެއް ކުރުމަށް ރޭވުން އަދި ކުށެއް ކޮށްފައިވާ މީހަކު ފިލުވުމަށް އެހީތެރިވެދިނުން ހިމެނެއެވެ.
މިއަދު ކްރިމިނަލް ކޯޓުގައި އާންމުކޮށް ހުޅުވާލައިގެން ބޭއްވި ޝަރީއަތުގެ އަޑުއެހުމުގައި ތަހުމީނާއި މުޖާޒު ދައުވާތަކަށް އިންކާރުކުރަމުން ބުނީ ނުކުރާ ކަމެއްގެ މައްޗަށް ދައުވާކޮށްފައިވާތީ އިންކާރު ކުރީ ކަމަށެވެ. ދައުލަތުން ތަހުމީނާ ދެކޮޅަށް 113 ޝަފަހީ ހެކި އަދި 86 ކިތާބީ ހެކި ހުށަހަޅައިފައިވެއެވެ. އަދި މުޖާޒުއާ ދެކޮޅަށް 103 ޝަފަހީ ހެކި އަދި 80 ކިތާބީ ހެކި ހުށަހަޅައިފައިވެއެވެ. އޭގެ ތެރޭގައި 24 ސިއްރު ހެކި ހިމެނެއެވެ.
ރައީސް ނަޝީދުގެ ހަމަލާއާ ގުޅޭގޮތުން މުހިންމު މައުލޫމާތުތަކެއް ހިއްސާކުރުމަށް މީގެ ކުރިން ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު ވިދާޅުވީ، ރައީސް ނަޝީދަށް މެއި މަހުގެ ހަވަނަ ދުވަހު ދިން ހަމަލާއަކީ، ނަފްރަތުގެ ހަމަލާއެއް ކަމަށާއި، އެމީހުން ގަބޫލުކުރާ ވިސްނުމެއްގެ މައްޗަށް ވަކި ބަޔަކު ލޭ ހުއްދަކޮށްގެން ދީފައިވާ ހަމަލާއެއް ކަމަށް މިހާތަނަށް ތަހުގީގަށް ހޯދުނު ހޯދުންތަކުން ސާބިތުވާ ކަމަށެވެ.
އެގޮތުން އެމީހުންނަކީ، ދިވެހި ބިމަކީ ކުފުރުގެ ބިމެއް ކަމަށް ދެކިގެން، ދިވެހި ދައުލަތް ވެސް ގަބޫލުނުކޮށް، ވަކި ބަޔަކީ "ތޯޣޫތުން" ކަމަށް ދެކޭ ބައެއް ކަމަށް ރިޔާޒް ވިދާޅުވިއެވެ.
