"އީޖާދީ މަންސަ" މުބާރާތުގެ ރަންވަނަތައް ހޯދި ފަރާތްތަކަށް ދެވަނަ ފިޔަވަހިން ވިޔަފާރި ޔުނިޓްތަކެއް ދީފި
ހުޅުމާލޭ ދެވަނަ ފިޔަވަހީގައި ކުދި އަދި މެދު ފަންތީގެ ވިޔަފާރިތައް ތަރައްގީ ކުރުމަށް "އީޖާދީ މަންސަ"ގެ ނަމުގައި ހިންގި މުބާރާތުގެ ރަންވަނަތައް ހޯދި ނުވަ މީހަކަށް ހައުސިން ޑިވްލޮޕްމަންޓް ކޯޕަރޭޝަން (އެޗް.ޑީ.ސީ)އިން ސެޓްފިކެޓާއި ވިޔަފާރި ޔުނިޓްތަކެއް ހަވާލުކޮށްފިއެވެ.
އެޗްޑިސީގެ "އީޖާދީ މަންސަ"އަކީ ހުޅުމާލޭގައި އެންމެ ކުދި، ކުދި އަދި މެދު ފަންތީގެ ވިޔަފާރިތަށް އިތުރުކުރުމަށް އެޗްޑީސީން ކުރިއަށް ގެންދިޔަ ހާއްސަ މުބާރާތެކެވެ.
މި މުބާރާތް ކުރިއަށް ގެންދިއުމުގެ މައިގަނޑު އަމާޒަކީ ހުޅުމާލޭގައި އައު ވިޔަފާރިތައް ފެށުމަށް އެހީވެދިނުން ކަމަށް އެޗްޑީސީން ވިދާޅުވިއެެވެ. އަދި މީގެ ސަބަބުން ވިޔަފާރިތައް އިތުރަށް ފުޅާވެ، ހުޅުމާލޭގެ ރައްޔިތުންނަށް އިތުރު ހިދުމަތްތަކާއި ޕްރޮޑަކްޓުތައް ތައާރަފުކުރެވޭނެ މަގުފަހިވެގެން ދާނެ ކަމަށެވެ.
ގޭގައި ކުރާ ވިޔަފާރިތަކަށާއި އޮންލައިން ވިޔަފާރިތަކަށާއި މުޅިން އަލަށް ވިޔަފާރިއެއް ފެށުމަށް ޝައުގުވެރިވާ ފަރާތްތަކަށް ހާއްސަކޮށްގެން ފުރުޞަތު ހުޅުވައިލުމުން 36 މީހަކު ޕްރޮޕޯސަލް ހުށަހެޅި ކަމަށް އެޗްޑީސީން ވަނީ ވިދާޅުވެފައެވެ.
ވަނަވަނައަށް ދިޔަ މީހުންނަށް، ހުޅުމާލޭ ދެވަނަ ފިޔަވަހީގައި "ހިޔާ" މަޝްރޫޢުގެ ދަށުން ތަރައްޤީކޮށްފައިވާ ފުލެޓުތަކުގެ ތިރީ ބުރިން 550 އަކަފޫޓު ހިމެނޭ ވިޔަފާރި ޔުނިޓްތަކެއް، އެޗް.ޑީ.ސީން ކަނޑައަޅާ ވަކި މުއްދަތަކަށް ދޭ ގޮތަށް ވަނީ ހަމަޖެހިފައެވެ.
