ޓެރަރިސްޓެއް ކަމަށް ބުނާތީ އަމީންގެ ޙައްޤުތައް ގެއްލޭކަމަށް ބުނެ ޝަކުވާ!
އައިއެސް ޖަމާއަތުގެ ރާއްޖޭގެ ލީޑަރު ކަމަށް ތުހުމަތުކުރާ ޏ. ފުވައްމުލަކު މާދަނޑު/ ކަރިއްޔާވިލާ، މުހައްމަދު އަމީންގެ މައްސަލަ މީޑިއާތަކުން ރިޕޯޓުކުރާއިރު އޭނާ އަކީ ޓެރަރިސްޓެއްކަން ދޭހަވާގޮތަށް އެކަން ކުރާތީ އެއީ އައިބު ގޮތެއް ކަމަށާއި އޭގެ ސަބަބުން އަމީންގެ ހައްގުތައް ގެއްލޭ ކަމަށް ބުނެ އޭނާގެ ފަރާތުން ސުޕްރީމް ކޯޓުގައި ކަންބޮޑުވުން ފާޅުކޮށްފިއެވެ.
އަމީންގެ މައްޗަށްކޮށްފައިވާ ޓެރަރިޒަމްގެ ދައުވާތައް ހައިކޯޓުން ބާތިލުކޮށް އޭނާ މިނިވަންވި މައްސަލަަ ޕްރޮސެކިއުޓަރ ޖެނެރަލްގެ އޮފީހުން ސުޕްރީމް ކޯޓުގައި ވަނީ އިސްތިއުނާފްކޮށްފައެވެ.
މި މައްސަލައިގެ އަޑު އެހުމުގައި އަމީންގެ ފަރާތުން އެ ޝަކުވާ ހުށަހަޅުއްވަމުން އޭނާގެ ވަކީލް ވިދާޅުވީ، އެ ދައުވާތައް ހައިކޯޓުން ބާތިލްކުރުމުން ވެސް މީޑިއާތަކުން އޭނާގެ މައްސަލަ ރިޕޯޓުކުރަމުން އަންނަނީ ވަރަށް "އައިބު" ގޮތަކަށް ކަމަށެވެ.
އަމީންގެ ވަކީލު ވިދާޅުވީ، ރާއްޖޭގެ ގާނޫނު އޮންނަ ގޮތުން، އެގޮތަށް ޕަބްލިޝް ކުރުމަކީ ޓެރަރިޒަމް މަނާކުރުމުގެ ގާނޫނުގައި ވެސް މަނާކަމެއް ކަމަށެވެ.
މީގެ އިތުރުން އަމީންގެ ވަކީލު ވިދާޅުވީ، އެ އަމުރު ތަންފީޒުކުރުމުން ވެސް މީޑިއާތަކުން ކޮމާކޯޅީގައި އޭނާއަކީ ވަކި ބާވަތެއްގެ ކުށެއް ކޮށްފައިވާ މީހެއް ކަމަށް ބުނެ ރިޕޯޓުކުރަމުން އަންނަ ކަމަށާއި، އަމީންގެ ވީޑިއޯއާއި ފޮޓޯ ބޭނުންކުރާއިރު ހަތިޔާރާއި އައިސިސް ލޯގޯއާ އެކު އެކި ކަހަލަ އެޑިޓްތައް ކޮށްގެން ވެސް ބޭނުންކުރަމުން އަންނަ ކަމަށެވެ. ނަމަވެސް މިފަދައިން ކަންތައް ކުރަމުން އަންނަ މީޑިއާއެއްގެ ނަން ހާމަ ކުރައްވައިފައެއް ނުވެއެވެ.
މިކަމާ ގުޅޭގޮތުން އުއްތަމަ ފަނޑިޔާރު މުއުތަސިމް އަދްނާން ވިދާޅުވީ އެ މައްސަލައާ ގުޅޭގޮތުން ކޯޓުން ވަކިގޮތެއް ބަލާ ނިންމެވުމަށް ފަހު އަންގަވާނެ ކަމަށެވެ.
