ހުޅުމާލޭ ދެވަނަ ފިޔަވަހީގައި ދެ ސުކޫލެއް އަޅައިދޭނެ ބަޔަކު ހޯދަނީ!
އަލަށް އާބާދުވާން ފަށައިފައިވާ ހުޅުމާލޭ ދެވަނަ ފިޔަވަހީގައި ދެ ސުކޫލެއް އަޅައިދޭނެ ބައެއް ހޯދުމަށް ފިނޭންސް މިނިސްޓްރީން އިއުލާނުކޮށްފިއެވެ.
މި މަސައްކަތަށް ރާއްޖެެއާއި ބޭރުގެ ކުންފުނިތަކަށް ކުރިމަތިލެވޭނެކަމަށާއި ބީލަށް ހުޅުވުން އޮންނާނީ އަންނަ މަހުގެ 17ވަނަ ދުވަހުގައި ކަމަށް ފިނޭންސް މިނިސްޓްރީން ވިދާޅުވެއެވެ.
ހުޅުމާލޭގެ ދެވަނަ ފިޔަވަހީގައި 14 ސްކޫލެއް އަޅަން ވަނީ ނިންމައިފައެވެ. އަދި ބައެއް ސްކޫލުތައް އެޅުމަށް މިހާރު ވަނީ އެކި ކުންފުނިތަކާ ހަވާލު ވެސް ކޮށްފައެވެ. އޭގެ ތެރޭގައި ޕްރައިވެޓް އިންޓަނޭޝަނަލް ސްކޫލުތައް ވެސް ހިމެނެއެވެ. އެގޮތުން ހުޅުމާލޭގެ ދެވަނަ ފިޔަވަހީގައި އިންޓަނޭޝަނަލް ޕްރައިވެޓް ސްކޫލެއް އަޅަން އައިލެންޑާޒް އެޑިޔުކޭޝަން މޯލްޑިވްސްއާ މިދިޔަ ހޮނިހިރު ދުވަހު ވަނީ ހަވާލުކޮށްފައެވެ.
ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފުލެޓްތަކުގައި މީހުން ދިރިއުޅެން ފަށާފައިވާއިރު ހުޅުމާލޭ ދެވަނަ ފިޔަވަހިން އަދި ޒަރޫރީ ބޭނުންތައް ފުއްދޭނެ ގޮތްތައް ނެތް ކަމުގެ ޝަކުވާތައް ދަނީ ކުރެވެމުންނެވެ. އަދި މިކަންކަން ހައްލުކޮށް ދިނުމަށް އެޗްޑީސީން ދަނީ މަސައްކަތް ކުރަމުންނެވެ.
