ދީނީ ހޭލުންތެރިކަން އިތުރު ކުރަން ވީޑިއޯ ކްލިޕް ހެދުމުގެ މުބާރާތެއް ބާއްވަނީ
ދިވެހި ރައްޔިތުންގެ މެދުގައި ދީނީ ހޭލުންތެރިކަން އިތުރުކުރުވުމަށް ވީޑިއޯ ކްލިޕް ހެދުމުގެ މުބާރާތެއް ބޭއްވުމަށް އިސްލާމިކް މިނިސްޓްރީން ނިންމައި މުބާރާތުގެ އުސޫލުތައް އާއްމުކޮށްފިއެވެ.
މި މުބާރާތަކީ ދިވެހި ރައްޔިތުންގެ މެދުގައި ދީނީ ހޭލުންތެރިކަން އިތުރުކުރުމުގެ މަޤްޞަދުގައި، އަމިއްލަ
ފަރުދުންނާއި، ކުންފުނިތަކާއި ޖަމްޢިއްޔާ ޖަމާޢަތްތަކާއި ސަރުކާރުގެ އޮފީސްތަކާއި މުއައްސަސާތަކަށް
ހުޅުވައިލައިގެން މިނިސްޓްރީ އޮފް އިސްލާމިކް އެފެއާޒުން ބޭއްވުމަށް ހަމަޖެހިފައިވާ މުބާރާތެއް ކަމަށް އިސްލާމިކް މިނިސްޓްރީން ވިދާޅުވެއެވެ.
މީސް މީޑިއާ މެދުވެރިކޮށް، އަވަސް، ފަސޭހަ އަދި ޝައުޤުވެރި ވަސީލަތްތައް ބޭނުންކޮށްގެން
ސޯޝަލް ނެޓްވޯކްގެ ތެރެއިން ވީހާ ވެސް ގިނަ ޢަދަދެއްގެ ރައްޔިތުންނަށް ދީނީ އަދި އިޖުތިމާއީ މެސެޖުތަކާއި ނަޞޭޙަތް ފޯރުކޮށްދީ، ދިވެހި ރައްޔިތުންގެ މެދުގައި ދީނީ ހޭލުންތެރިކަން އިތުރު ކުރުމުގެ މަގްސަދުގައި ކުރިއަށް ގެންދާ މި މުބާރާތުގައި އިސްލާމިކް މިނިސްޓްރީގެ މުއައްޒަފުންނަށް ބައިވެރި ނުވެވޭނެކަމަށް އެމިނިސްޓްރީން ވިދާޅުވެއެވެ.
އެއްވަނައަށް ދާ ފަރާތަކަށް 5 ހާސް ރުފިޔާގެ އިނާމެއް ހުށައަޅައިފައިވާ މި މުބާރާތުގައި ބައިވެރިވާން ބޭނުންވާ ފަރާތްތަކުން، ރަޖިސްޓްރޭޝަން ފުރިހަމަ ކުރުމަށް ޓަކައި 14 އޮކްޓޯބަރ 2021ވާ ބުރާސްފަތި ދުވަހުގެ 12:00ގެ ކުރިން ފޯމު ފުރިހަމަ ކުރެއްވުމަށް މިނިސްޓްރީން އެދެއެވެ. އަދި 14 ނޮވެންބަރ 2021 ވާ އާދީއްތަ ދުވަހުގެ 12:00 ގެ ކުރިން މުބާރާތުގެ ބައިވެރިކުރާ ކްލިޕްގެ ސީޑީ މިނިސްޓްރީއަށް ހުށަހެޅުއްވުމަށް ވެސް އެމިނިސްޓްރީން އެދެއެވެ.
