ތިން ފުލުހުން ވަޒީފާއިން ވަކި ކުރުން މަޑުޖައްސައިލުމަށް ހައިކޯޓުން އަމުރުކޮށްފި
ފުލުހުންގެ ގާނޫނުގެ ދަށުން އުފައްދައިފައިވާ ޕޮލިސް ބޯޑުން ވަކިކުރަން ނިންމައިފައިވާ ތިން ފުލުހުން ވަޒީފާއިން ވަކި ކުރުން މަޑުޖައްސައިލުމަށް ހައިކޯޓުން މިއަދު އަމުރުކޮށްފިއެވެ.
ޕޮލިސް ބޯޑުން ވަކި ކުރަން ނިންމައިފައި ވަނީ ޗީފް ސުޕްރިންޓެންޑެންޓް އަބްދުﷲ ޝަރީފާއި، ސުޕްރިންޓެންޑެންޓް އިސްމާއިލް ޝަމީމްގެ އިތުރުން ސުޕްރިންޓެންޑެންޓް މުހައްމަދު ދާއޫދުއެވެ. މި ތިން ފުލުހުން މިރޭ 00:00އިން ފެށިގެން ވަޒީފާއިން ވަކިވާނެ ކަމަށް އަންގައި، ކުރިން ވަނީ ނޯޓިސް ދީފައެވެ.
ފުލުހުންގެ ގާނޫނުގެ ދަށުން އުފައްދައިފައިވާ ޕޮލިސް ބޯޑުން ހަތް އޮފިސަރަކު ވަކިކުރަން ނިންމި މައްސަލަ، ސިވިލް ކޯޓުގައި ކުރިއަށްދާއިރު އެ މައްސަލަ ނިމެންދެން އެ އޮފިސަރުން ވަޒީފާއިން ވަކިކުރުން ފަސްކޮށްދިނުމުގެ ވަގުތީ އަމުރަކަށް ވަނީ އެދިފައެވެ. އަދި އެ އަމުރު ނެރެދެވެން ނެތް ކަމަށް ސިވިލް ކޯޓުން ކަނޑައެޅުމުން އެ މައްސަލައިގެ އިސްތިއުނާފީ އަޑުއެހުންތައް މިއަދު ހައިކޯޓުގައި ވަނީ ފަށައިފައެވެ. އެގޮތުން ހައިކޯޓުން ނިންމީ އެ މައްސަލައިގައި ވަކި ގޮތެއް ނިމެންދެން އެ ތިން އޮފިސަރުން ވަޒީފާއިން ވަކި ކުރުން ފަސް ކުރުމަށެވެ.
މިއަދު ހައިކޯޓުގައި ކުރިއަށް ގެންދިޔަ އަޑުއެހުމުގައި އޮފިސަރުންގެ ފަރާތުން ހަތަރު އިސްތިއުނާފީ ނުކުތާއެއް ހުށަހަޅައިފައިވެއެވެ. އެގޮތުން ސިވިލް ކޯޓުގައި ހިނގާ މައުލޫއީ މައްސަލަ ނިމެންދެން އެ އޮފިސަރުން ވަޒީފާއިން ވަކިކުރުން ފަސްކޮށްދިނުމުގެ ވަގުތީ އަމުރު ނެރެދެވެން ނެތް ސަބަބު ސިވިލް ކޯޓުން ބަޔާންކޮށްފައި ނުވާކަން ވެސް ފާހަގަ ކޮށްފައިވެއެވެ.
