ޒުވާނުންގެ އާބާދީގެ ދެބައިކުޅަ އެއްބައި ވަޒީފާއެއް ނެތި!

ރާއްޖޭގެ ޒުވާނުންގެ އާބާދީގެ ދެބައިކުޅަ އެއްބައި ޒުވާނުންނަކީ ވަޒީފާ ނެތް އަދި ތައުލީމީ ގޮތުން ވެސް ހަރަކާތްތެރި ނޫން ޒުވާނުންކަމަށް މިއަހަރުގެ ޒުވާނުންގެ ދުވަހާ ގުޅިގެން ނޭޝަނަލް ބިއުރޯ އޮފް ސްޓެޓިސްޓިކްސްއިން ހާމަކޮށްފައިވާ ތަފާސްހިސާބުތަކުން ދައްކައިފިއެވެ.

Ads by STELCO

މިތަފާސް ހިސާބުތަކަށް ބަލައިލާއިރު ޒުވާނުންގެ އާބާދީ 56 އިންސައްތަ ވަޒީފާ ނެތި އަދި ތައުލީމީގޮތުން ވެސް ހަރަކާތްތެރި ނޫން އިރު މީގެ ތެރޭގައި ގިނައީ އަންހެނުންކަމަ ށްވެސް އެ ތަފާސްހިސާބުތަކުން ދައްކައެވެ.

ތަފާސްހިސާބުތަކަށް ބަލައިލާއިރު ރާއްޖޭގެ ޖުމްލަ އާބާދީގެ 45 އިންސައްތަ އަކީ ޒުވާނުންނެވެ. މީގެ ތެރޭގައި ހިމެނެނީ 188092 ފިރިހެނުންނާއި 69123 އަންހެނުންނާ އެކު ޖުމްލަ 257215 މީހުންނެވެ.

ރާއްޖޭގެ ޒުވާނުންގެ އާބާދީގެ ނިސްބަތުން ބަލާއިރު ޢާމްދަނީ ލިބޭ މަސައްކަތް ކުރަނީ 89956 ޒުވާނުންނެވެ. ޒުވާނުންގެ އާބާދީގެ ތަޢުލީމީ ފެންވަރަށް ބަލާއިރު 12 އިންސައްތަ ޒުވާނުން ވަނީ މަތީ ތަޢުލީމު ޙާސިލުކޮށްފައެވެ. އަދި 77 އިންސައްތައަކީ ސާނަވީ އަދި މަތީ ސާނަވީ ޙާސިލުކޮށްފައިވާ މީހުންނެވެ.

މި އާބާދީގެ ތެރެއިން 41 އިންސައްތަ އަންހެނުން އަދި 15 އިންސައްތަ ފިރިހެނުންނަކީ ވަޒީފާ އަދާ ނުކުރާ އަދި ތަޢުލީމު ވެސް ޙާސިލުކުރަމުން ނުދާ މީހުން ކަމަށް ސްޓެޓިސްޓިކްސް ބިއުރޯގެ ތަފާސް ހިސާބުން ދައްކައެވެ. އަންހެނުންގެ ނިސްބަތް މަތީގައި ހުރިކަމަށް ބެލެވެނީ ގޭތެރޭގައި ޢާއިލާގެ ޚިދުމަތުގައި ގިނަ ވަގުތު ހޭދަވެގެންދިޔުން ކަމަށް ސްޓެޓިސްޓިކް ބިއުރޯއިން ލަފާކުރެއެވެ.

ރާއްޖޭގެ ޒުވާނުންގެ އާބާދީގެ މިހާ ބޮޑު އިންސައްތައެއް ވަޒީފާނެތި އަދި ކިޔެވުމުގައި ވެސް ހަރަކާތްތެރި ނުވުމަކީ ރާއްޖޭގެ އިގްތިސާދަށް އެކަމުގެ ސަބަބުން ބޮޑެތި ގޮންޖެހުންތައް ކުރިމަތިވާނެ ކަމެއްކަމަށް އިގްތިސާދީ މާހިރުން ބުނެއެވެ. އެހެންކަމުން ޒުވާނުންނަށް އަމާޒުކޮށްގެން ވަޒީފާތައް އިތުރުކުރުމާއި ޒުވާނުން ކުރިއެރުވުމުގެ ހަރަކާތްތަކެއް ކުރިއަށް ގެންދިޔުމަކީ މުހިންމުކަމެއްކަމުގައި ވެސް އިގްތިސާދީ މާހިރުން ބުނެއެވެ.