ފުޓްބޯޅަ ދަނޑަކަށް ކުޅުދުއްފުށި ޒުވާނުން ކުރި އިންތިޒާރު: ބޮޑު ބައި ވަނީ ފުރިހަމަވެފައި
ފުޓުބޯޅައަކީ ދިވެހި ރާއްޖޭގެ ގިނަ ޒުވާނުން ވަރަށް ފޯރިއާއެކު ކުޅޭ ކުޅިވަރެކެވެ. އަދި އެއީ ދިވެހީންގެ ލެޔާ ގުޅިފައިވާ ކުޅިވަރެއް ވެސް މެއެވެ.
އެގޮތުން ހދ. ކުޅުދުއްފުއްޓަކީ ވެސް މިފަދަ ޖޯޝާއި ރޫހު ފުޓުބޯޅައަށް ޓަކައި އުފެދިފައިވާ ޒުވާނުން ގިނަ ސިޓީއެކެވެ.
އެ ސިޓީގަައި ފުޓުބޯޅަ ކުޅެން ޓާފް ދަނޑެއް ނެތި ގާތްގަނޑަކަށް ފަސް އަހަރު ވެފައިވާ އިރު، ޓާފް ދަނޑަކަށް ޒުވާނުން ކުރަމުން ދިޔަ އުންމީދުތައް ދިޔައީ ބޮޑުވަމުންނެވެ. އެ ޒުވާނުން އެދެމުން ދިޔައީ އަތޮޅު ތެރޭގެ ޓީމުތަކާ އެކު ފޯރިގަދަ މުބާރާތްތައް ބާއްވައި، ހަމަޖެހިގެން ފުޓުބޯޅަ ކުޅެވޭނެ ފަދަ އިންތިޒާމެއް ކުޅުދުއްފުށި ސިޓީގައި ވެސް ހަމަޖައްސައި ދިނުމެވެ.
ކުޅުދުއްފުށި ޒުވާނުންގެ މި ހުވަފެންތަކުގައި ކުލަޖަައްސައިދީ، މި ސަރުކާރުގެ ޔޫތު މިނިސްޓްރީއާއި ރައީސް އިބްރާހިމް މުޙައްމަދު ޞާލިޙް އިއްޔެ ވަނީ ކުޅުދުއްފުށި ސިޓީގައި "ޒިގްޒެގް" ޓާފް ދަނޑުގެ ނަމުގައި އައު ޓާފް ދަނޑެެއް އަޅައިދެއްވައިފައެވެ.
މި ޓާފް ދަނޑު އިއްޔެ ރަސްމީކޮށް ހުޅުވައިދެއްވީ ވެސް ރައީސް ޞާލިޙްގެ "ކިކްއޮފް" އަކުންނެވެ.
ކުޅުދުއްފުށީގެ ބައެއް ޒުވާނުން، އިއްޔެގެ މި ރަސްމިއްޔާތުގައި ބައިވެރިވެފައިވާއިރު، އޭގެ ތެރެއިން ބައެއް ޒުވާނުން ވަނީ މިކަމާ ބެހޭގޮތުން ނޫސްވެރިންނާ އެމީހުންގެ އިޙުސާސްތައް ޙިއްސާ ވެސް ކޮށްފައެވެ.
"މިހާރު ގާތްގަނޑަކަށް ފަސް ވަރަކަށް އަހަރުވެއްޖެ މިކަހަލަ ރީތި ދަނޑަކަށް އިންތިޒާރު ކުރާތާ. ވަރަށް އުންމީދު ކުރެވޭ، މި ދަނޑު އަޅައިދިނުމުގެ ސަބަބުން ސަރުކާރުން ރާވައިފައިވާ ގޮތަށް ގޮސްފި ނަމަ މާލޭގައި ކުޅެވޭނެ ވަރުގެ ޓީމެއް ކުޅުދުއްފުށިން ވެސް އުފެދޭނެ ކަމަށް" ދަނޑު ހުޅުވުމުގެ ރަސްމިއްޔާތަށް ދިޔަ ކުޅުދުއްފުށީ ރައްޔިތަކު ބުންޏެވެ.
އެހެން ރައްޔިތަކު ބުނީ ޤައުމީ ޓީމަށް ކުޅެވޭވަރު ޓީމެއް ކުޅުދުއްފުށީގައި ވެސް އެބަތިބި ކަމަށް ޤަބޫލު ކުރާ ކަމަށެވެ.
ކުޅުދުއްފުއްޓަކީ ފުޓުބޯޅައަށް ވަރަށް ތަރުހީބުދޭ ސިޓީއަކަށް ވާއިރު، އައު ޓާފް ދަނޑެއް ހެދި ކަމުގައިވީ ނަމަވެސް ފުރިހަމައަށް ތަރުހީބު ދޭން ރައްޔިތުންނަށް ތިބެވޭނެ އިންތިޒާމެއް އަދިއެއް ނެތެވެ. އެގޮތުން ސަޕޯޓަރުން އިށީންނަން ސިޑިބަރިއަކާއި ދަނޑުގެ ވަށައި އެއްކޮށް ޖަހާފައި ހުރި ފެންސެއް ވެސް އަދިއެއް ނެތެވެ. ނަމަވެސް އެ މަސައްކަތް ވެސް ވަރަށް އަވަހަށް ފުރިހަމަ ކުރެވޭނެ ކަމުގެ ޔަގީންކަން ސަރުކާރުން އިއްޔެ ވަނީ އެ ސިޓީއަށް ދެއްވައިފައެވެ.
