2022 ވަނަ އަހަރަށް 1.8 މިލިއަން ފަތުރުވެރިންގެ އަމާޒެއް
އަންނަ 2022ވަނަ އަހަރު ރާއްޖެއަށް 1.5 މިލިއަނާއި 1.8 މިލިއަނާ ދެމެދުގެ އަދަދަކަށް ފަތުރުވެރިން ޒިޔާރާތް ކުރާނެކަމަށް ސަރުކާރުން ލަފާކޮށްފިއެވެ.
އަންނަ އަހަރަށް ސަރުކާރުން އަމާޒުކުރާ ފަތުރުވެރިންގެ އަދަދު ހާމަކުރީ މިއަދު ރައްޔިތުންގެ މަޖިލީހުގައި އޮތް ޖަލްސާގައި ވާހަކަފުޅު ދައްކަވަމުން ފިނޭންސް މިނިސްޓަރު އިބްްރާހިމް އަމީރެވެ. އަމީރު ވިދާޅުވީ ކޮވިޑުގެ ބަލިމަޑުކަމަށް ފަހު ދުނިޔޭގެ އެކި ގައުމުތަކުގައި އިގްތިސޯދީ ހާލަތު ރަނގަޅުވަމުން އަންނަ ކަމަށެވެ. އެގޮތުން މިއަންނަ 2022 ވަނަ އަހަރު ދުނިޔޭގެ އިގްތިސޯދަށް 4.9 އިންސައްތައިގެ ކުރިއެރުމެއް އަންނާނެކަމަށް ދުނިޔޭގެ މާލީ އިދާރާ، އިންޓަރނޭޝަނަލް މަނިޓަރީ ފަންޑް (އައިއެމްއެފް)އިން ލަފާކުރާކަމަށް ވިދާޅުވިއެވެ.
އެހެން ނަމަވެސް ކޮވިޑުގެ ކުރިން ދުނިޔޭގެ އިޤްތިޞާދު އޮތް ހިސާބަށް އަނބުރާ ދިޔުމަށް އަހަރުތަކެއް ހޭދަވާނެކަމަށް އަމީރު ވިދާޅުވިއެވެ.
"ދުނިޔޭގެ އިގްތިޞާދަށް އަންނަ ފަހި ބަދަލުގެ މޯހިރުގައި ރާއްޖޭގެ ފަތުރުވެރިކަމަށް ވެސް އާރޯކަން ލިބޭ. ދުވާލެއްގެ މައްޗަށް ފަތުރުވެރިން ޒިޔާރާތް ކުރާ މިންވަރު މިހާރު ހުރީ 2019އާ ގާތްގަނޑަކަށް އެއް ހަމައެއްގައި" އަމީރު ވިދާޅުވިއެވެ.
މިއަހަރަށް ސަރުކާރުން އަމާޒު ހިފީ 1 މިލިއަން ފަތުރުވެރިން ރާއްޖެ ގެނައުމަށެވެ. ބާކީ ދެ މަސްދުވަސް އޮއްވާ މި އަދަދު ފަހަނައަޅާ ދިޔައިރު މިހާރު ސަރުކާރުން ވަނީ 1.2 މިލިއަން ފަތުރުވެރިން މި އަހަރު އަންނާނެކަމަށް އަންދާޒާ ކޮށްފައެެވެ.
2022ވަނަ އަހަރަށް ދައުލަތުން ލަފާކުރާ ބަޖެޓު ހުށަހެޅުމުގެ ކުރިން ދެއްވި ބަޔާނުގައި އަމީރު ވިދާޅުވީ އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ ގޯލްޑެން ޖުބިލީ ކަމަށާއި މިކަން ފާހަގަކުރުމަށް ޓަކައި ސަރުކާރުން ވަނީ ގިނަ މާކެޓިން ހަރަކާތްތަކެއް ރާވައިފައިކަމަށް އަމީރު ވިދާޅުވިއެވެ. އަދި ކޮވިޑުގެ ހާލަތުގައި ވެސް ރާއްޖޭގެ ރިޒޯޓުތައް ހިންގަން ތައްޔާރުވެފައިވީ ހިނދު ކޮވިޑުގެ ކުރިން ރާއްޖެ ޒިޔާރަތްކުރި ފަތުރުވެރިންގެ އަމާޒަށް 2022ވަނަ އަހަރު ވާސިލު ވެވޭނެކަމަށް އުއްމީދު ކުރާކަމަށް އަމީރު ވަނީ ވިދާޅުވެފައެވެ.
"އަންނަ އަހަރު ރާއްޖެއަށް 1.5 މިލިއަނާއި 1.8 މިލިއަނާ ދޭތެރޭ އަދަދަކަށް ފަތުރުވެރިން ޒިޔާރާތް ކުރާނެކަމަށް ލަފާކުރެވޭ." އަމީރު ވިދާޅުވިއެވެ.
ކޮވިޑުގެ ބަލިމަޑުކަމަށް ފަހު ފަތުރުވެރިންނަށް ބޯޑަރު ހުޅުވައިލި މަދު ގައުމުތަކުގެ ތެރޭގައި ރާއްޖެ ހިމެނެއެވެ. މީގެ ސަބަބުން ދުނިޔޭގެ ގިނަ ގައުމުތަކުގައި ރާއްޖޭގެ މަގުބޫލުކަން އިތުރުވެފައިވެއެވެ. މިހާރު ސަރުކާރުން ދަނީ ރާއްޖޭގެ ފަތުރުވެރިކަން ދުނިޔޭގައި އިޝްތިހާރުކުރަން އެކި ފެއާތަކުގައި ބައިވެރިވަމުންނެވެ. އަދި ދުނިޔޭގެ ބޮޑެތި ނޫސް އެޖެންސީތަކުގެ ނޫސްވެރިންނާ އެކު ވެސް ސަރުކާރުން ދަނީ މިކަަމަށް ޓަކައި ހާއްސަ މަސައްކަތްތަކެއް ކުރަމުންނެވެ.
Ads by STO
