ދަރިންގެ ހިތްތަކުގައި އިސްލާމީ އަޤީދާ އަށަގެންނެވުމަށް ގަދައަޅާ މަސައްކަތްކުރަން ޖެހޭ: ނައިބު ރައީސް
ދަރިންގެ ހިތްތަކުގައި އިސްލާމީ އަޤީދާ އަށަގެންނެވުމަށް ގަދައަޅާ މަސައްކަތްކުރަން ޖެހޭކަމަށް ރައީސުލްޖުމްހޫރިއްޔާގެ ނައިބު ފައިސަލް ނަޞީމް ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ ރާއްޖެ އިސްލާމްވީ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.
މި ޖަލްސާގައި ނައިބު ރައީސް ދެއްކެވި ވާހަކަފުޅުގައި ވަނީ މިފަދަ ދުވަހެއް ފާހަގަކުރާއިރު އިސްލާމް ދީނުން ލިބިދޭ ފިލާވަޅުތަކަށް ވިސްނާ ފިކުރުކުރަން ޖެހޭ ކަމަށާއި، އަދި ދުނިޔެއާއި އާޚިރަތުގެ ނަސީބު ލިބިގަތުމަށް މަސައްކަތްކުރަން ޖެހޭ ކަމުގައި ވިދާޅުވެފައެވެ.
މީގެ އިތުރުން ވެސް އިސްލާމް ދީން ދައްކުވައިދެނީ ސީދާ ވެގެންވާ ތެދުމަގު ކަމަށާއި އިސްލާމް ދީނުން އެންމެ އަހަންމިއްޔަތުކަމެއްދޭ ސިފައަކީ ރިވެތި އަޚްލާޤު ކުރިއެރުވުން ކަމުގައި އެމަނިކުފާނު ވިދާޅުވިއެވެ. މިގޮތުން އެކަކު އަނެކަކަށް އިޙްތިރާމްކުރުމާއި، އެހީތެރިވުމާއި، އޯގާތެރިވުމާއި، ނުބައިކަންކަމުން ދުރުހެލިވެ ހެޔޮ ޢަލަމުކުރުމަށާއި، މުޖުތަމަޢު ތެރޭގައި އެއްބައިވަންތަކަން އާލާކުރުމަށް އެމަނިކުފާނު ބާރު އެޅުއްވިއެވެ.
މި ޖަލްސާގައި އިތުރަށް ވާހަކަފުޅު ދައްކަވަމުން ނައިބު ރައީސް ވަނީ ބަވަނަވެފައިވާ ދުނިޔެއެއްގައި އުޅޭ އިރު ބޭރުގެ އެކިއެކި ފަރާތްތަކުން ދަސްވާ ނޭދެވޭ ކަންކަން ދޫކޮށް އެދެވޭ ޢަމަލުތަކުގައި ހިފުމަށާއި ދަރިން ތަރުބިއްޔަތުކުރުމުގައި މިފަދަ ކަންކަމަށް އިތުރަށް ސަމާލުކަންދިނުމަށް ގޮވައިލައްވައިފައެވެ. އަދި އެމަނިކުފާނު ވަނީ ޙަޔާތުގައި ދިމާވާ ކޮންމެ ކަމަކުން ފިލާވަޅު ލިބިގަތުމަށް ވެސް އެދިވަޑައިގެންފައެވެ.
ނައިބު ރައީސްގެ އަރިހުގައި ކެބިނެޓް މިނިސްޓަރުންނާއި ސަރުކާރުގެ އިސްވެރިން ޖަލްސާގައި ބައިވެރިވެވަޑައިގެންނެވިއެވެ. މި ޖަލްސާގައި ރާއްޖެ އިސްލާމްވީ ދުވަހުގެ މުނާސަބަތުގައި ޚާއްޞަ ދުޢާއެއް ކުރެއްވިއެވެ. އިސްވެ ދުޢާކޮށްދެއްވައިފައި ވަނީ އައްޝައިޚް ނަޞްރުﷲ ޢަލީއެވެ.
