ފައިސާ ޗާޕުކުރުން އިތުރު އެއް އަހަރަށް ދަންމައިލާން އެދެފި
ޕަބްލިކް އެކައުންޓުން އޯވަޑްރޯ ކުރުމުގެ ހުއްދަ ހޯދުމަށް ނުވަތަ ފައިސާ ޗާޕް ކުރުމުގެ ހުއްދަ ހޯދުމަށް ދައުލަތުގެ ހަރަދަށް ޒިންމާވުމުގެ ގާނޫނުގެ ބައެއް މާއްދާތަކަށް އަމަލުކުުރުން ހުއްޓައިލާފައި އޮތް އޮތުން އިތުރު އެއް އަހަރަށް އިތުރު ކުރުމަށް ފިނޭންސް މިނިސްޓަރ އިބްރާހިމް އަމީރު، ރައްޔިތުންގެ މަޖިލީހުގައި އެދިވަޑައިގަންނަވައިފިއެވެ.
ދައުލަތުގެ ހަރަދައް ޒިންމާވުމުގެ ގާނޫނުގެ ބައެއް މާއްދާތަކަށް އަމަލުކުރުން ހުއްޓައިލައިފައި އޮތް އޮތުން އިތުރު އެއް އަހަރަށް އިތުރުކޮށް ދެއްވުން އެދި މަޖިލީހަށް ފިނޭންސް މިނިސްޓަރ އިބްރާހިމް އަމީރު ފޮނުއްވައިފައިވާ ސިޓީފުޅުގައި ވިދާޅުވީ ދައުލަތުގެ ހަރަދަށް ޒިންމާވުމުގެ ގާނޫނުގެ ބައެއް މާއްދާތަކަށް އަމަލުކުރުން ހުއްޓައިލައިފައި އޮތުމުން ދައުލަތުގެ ޚަރަދުތައް ހަމަޖައްސައި، ޚިދުމަތްތަކަށް ބުރޫ އެރިޔަނުދީ، ދައުލަތް ހިންގުމުގެ ފުރުސަތު ލިބިގެން ދިޔަކަމަށެވެ.
"އަދި 2021 ވަނަ އަހަރުގެ އެޕްރީލް މަހު ވެސް ބަލިމަޑުކަމާ ގުޅިގެން ކުރިމަތިވި ހީނަރުކަން ފިލައި ގޮސްފައި ނުވާތީ، އިތުރު 1 އަހަރު ދުވަހުގެ މުއްދަތަށް އިސްތިސްނާގެ މުއްދަތު ދަންމާލުމަށް ރައްޔިތުންގެ މަޖިލީހުން ވަނީ ނިންމަވައިފައެވެ. ވޭތުވެދިޔަ 18 މަހެއްހާ ދުވަހުގެ ތެރޭގައި މި އިސްތިސްނާގެ ސަބަބުން ދައުލަތުގެ ޚަރަދުތައް ހަމަޖައްސައި، ޚިދުމަތްތަކަށް ބުރޫ އެރިޔަނުދީ، ދައުލަތް ހިންގުމުގެ ފުރުސަތު ލިބިގެން ދިޔައެވެ. މީގެ އިތުރުން، އިޤްތިސާދީގޮތުން ފުން ވަޅުގަނޑަކަށް ރާއްޖެ ވެއްޓުނު ވަގުތު، ވިޔަފާރިތަކަށާއި އާއްމު ފަރުދުންނަށް އެހީތެރިކަން ފޯރުކޮށްދިނުމަށާއި، ކޮވިޑް-19އާ ގުޅިގެން ކުރަން ޖެހުނު ސިއްޙީ ހޭދަތަކާއި ރައްކާތެރިކަމަށް ކުރަން ޖެހުނު ޚަރަދުތައް ހަމަޖެއްސުމުގެ ފުރުސަތު ލިބިގެން ދިޔައެވެ." މިނިސްޓަރ އަމީރުގެ ސިޓީފުޅުގައި ވިދާޅުވެފައިވެއެވެ.
މީގެ އިތުރުން ވެކްސިނާއެކު ކޮވިޑް-19 ގެ ބަލިމަޑުކަން ކޮންޓްރޯލް ކުރުމަށް އުންމީދީ ނިޝާންތަކެއް ފެނި، ގެ
ބޯޑަރު ހުޅުވައިލުމާ އެކު ރާއްޖޭގެ ފަތުރުވެރިކަމާއި އިގުތިސާދީ ދުވެލި ބާރުވަމުން ދިޔަ ނަމަވެސް، މިހާތަނަށް ވެސް ދުނިޔެއަށް ބަލިމަޑުކަމުން ފުރިހަމައަށް އަރައިގަނެވިފައި ނުވުމާއި، އިގުތިސާދީ ހިރާސްތައް އަދިވެސް މަތިކޮށް ހުރުމާއި، ކުރު މުއްދަތެއްގެ ތެރޭގައި ޕަބްލިކް ބޭންކް އެކައުންޓްގެ އޯވަރޑްރޯ ކުރި އަދަދު އަނބުރާ ދެއްކުމަކީ ދައުލަތުގެ ކޭޝް ފްލޯ މެނޭޖް ކުރުމުގަޔާއި ދައުލަތުގެ ބަޖެޓު ތަންފީޒުކުރުމުގައި ދަތިތަކާ ކުރިމަތި ވެދާނެ ކަމެއް ކަމުންނާއި، ފައިނޭންސިންގ ހޯދުމަށް ހުރަސްތަކެއް ހުރުމާ އެކު، 2022ވަނަ އަހަރުގެ އެޕްރީލް މަހުން ފެށިގެން ވެސް ޕަބްލިކް ބޭންކް އެކައުންޓް އޯވަރޑްރޯ ނުކޮށް ކުރިއަށް ދިއުމަކީ އިޤްތިސާދަށާއި ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތަކަށް ވެސް އެކަމުގެ ނުރަނގަޅު އަސަރުކުރާނެ ކަމެއް ކަމަށް ވެސް މިނިސްޓަރުގެ ސިޓީފުޅުގައި ވަނީ ފާހަގަކުރައްވައިފައެވެ.
މަރުކަޒީ ބޭންކް އެމްއެމްއޭގެ ޕަބްލިކް އެކައުންޓް އޯވަޑްރޯ ކުރުމުގެ ހުއްދަ ހޯދުމަށް ޓަކައި ނުވަތަ ފައިސާ ޗާޕް ކުރުމުގެ ހުއްދަ ހޯދުމަށް ދައުލަތުގެ ހަރަދަށް ޒިންމާވުމުގެ ގާނޫނުގެ ބައެއް މާއްދާތަކަށް އަމަލުކުރުން ހުއްޓައިލައިފައި އޮތް އޮތުން މީގެ ކުރިން ވަނީ ދެ ފަހަރެއްގެ މަތިން އިތުރުކޮށްދީފައެވެ.
