ރަށްރަށުގެ މީހުންނަށް މާލެއިން ބޯހިޔާވަހިކަމުގެ ފުރުސަތު ކުޑަވުމަކީ ބޭއިންސާފެއް ނޫން: އަސްލަމް
މާލޭ ސަރަހައްދުގައި ދިރިއުޅޭ އެހެން ރަށްރަށުގެ ރައްޔިތުންނަށް މި ސަރަހައްދުން ބޯހިޔާވަހިކަމުގެ ފުރުސަތު ކުޑަވުމަކީ ބޭއިންސާފެއްކަމަށް ދެކިނުލައްވާކަމަށް ހައުސިންގ އެންޑް ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
މާލޭގައި ދިރިއުޅޭ އަތޮޅުތެރޭގެ ރައްޔިތުންނަށް ހުރި ބޯހިޔާވަހިކަމުގެ ފުރުސަތުތަކާ ގުޅިގެން އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މިނިސްޓަރާ ސުވާލު ކުރެއްވީ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ. އެ ސުވާލުގެ ޖަވާބުގައި މިނިސްޓަރު އަސްލަމް ވިދާޅުވީ ރަށްރަށުގެ ރައްޔިތުންނަށް މާލެ ސަރަހައްދުގައި ބޯހިޔާވަހިކަމުގެ ފުރުސަތު ކުޑަކަމަށް ގަބޫލުފުޅު ކުރައްވާ ކަމަށެވެ. އެ ފުރުސަތު ކުޑަވުމަކީ ބޭއިންސާފެއްކަމަށް މިވަގުތަށް ގަބޫލު ނުކުރައްވާކަމަށް އަސްލަމް ވިދާޅުވިއެވެ.
"މާލޭގެ އާބާދީގެ އަނެއްކާ ވެސް، ދިވެހިންގެ އާދަކާދަ ހުންނަ ގޮތުން އަޅުގަނޑުމެންގެ ދިރިއުޅުމުގައި ގޯތި ގެދޮރުގެ ކަންކަން މި ހަމަޖައްސަނީ އެމީހަކު ދިރިއުޅޭ ތަނެއްގައި. އެތަނަކުން އެއްޗެއް އަޅުގަނޑުމެން ހޯދަނީ އަދި ލިބެނީ ވެސް. އެއީ ރާއްޖޭގެ އެހެން ރަށްރަށުގައި ވެސް މިކަން އޮތް ގޮތް." އަސްލަމް ވިދާޅުވިއެވެ.
އަސްލަމް ވިދާޅުވީ މާލެ ރަށްވެހިންގެ ތެރޭގައި ބޯހިޔާވަހިކަމެއް ނެތް 5،000 އާއިލާ އެބަ ތިބި ކަމަށާއި މިސަރަހައްދުން ބޯހިޔާވަހިކަން ދިނުމުގައި އެމީހުންނަށް އިސްކަން ދިނުމަކީ ބޭއިންސާފު ނޫން ކަމަށެވެ. މިއީ ހަމައެކަނި މާލޭގައި ގެންގުޅޭ އުސޫލު ނޫން ކަމަށާއި ރާއްޖޭގެ ކޮންމެ ރަށެއްގައި ވެސް ގެންގުޅެނީ މި އުސޫލުކަމަށް އަސްލަމް ވިދާޅުވިއެވެ.
މިއީ މިވޭތުވެދިޔަ ތަނުގައި ވެސް ރާއްޖެ ހިނގަމުން އައިސްފައިވާ ގޮތްކަމަށާއި ބޯހިޔާވަހިކަން ދިނުމުގައި މާލެ ރައްޔިތުންނަށް އިސްކަންދޭ އުސޫލުން އެހެން ފަރާތްތަކަށް ވެސް ކުރީގެ ސަރުކާރުން އިސްކަން ދިންކަމަށް އަސްލަމް ވަނީ ވިދާޅުވެފައެވެ. އެގޮތުން ނުކުޅެދުންތެރިކަން ހުންނަ ކުދިންނަށާއި އެކަނިވެރި މައިންނަށް ވެސް ބޯހިޔާވަހިކަން ދިނުމުގައި އިސްކަން ދިންކަން ފާހަގަކުރައްވައި އަސްލަމް ވިދާޅުވީ މި ސަރުކާރުން މާލެ ރައްޔިތުންނަށް ބޯހިޔާވަހިކަން ދިނުމުގައި އިސްކަން ދިނުމަކީ ގާނޫނު އަސާސީއާ ހިލާފުވުން ނޫންކަމަށެވެ.
"ކޮންމެވެސް ހިސާބަކުން މި ހަމަހަމަކަން އައީމަ (ބޯހިޔާވަހިކަން ފޯރުކޮށްދިނުމުގައި) ހަމަހަމަ ފުރުސަތުތަކެއް އޮންނާނެ" މާލޭގައި ދިރިއުޅޭ ރަށްރަށުގެ ރައްޔިތުންނާއި މާލެ ރައްޔިތުންނާ ދެމެދު ބޯހިޔާވަހިކަން ދިނުމުގައި ގެންގުޅޭ އުސޫލާ ގުޅޭގޮތުން އަސްލަމް ވިދާޅުވިއެވެ.
Ads by STO
